ଭୁବନେଶ୍ୱର ୨୧।୦୪: ରବିବାର ପଶ୍ଚିମ ଓଡ଼ିଶାରେ ସାମାନ୍ୟ ବର୍ଷା ହୋଇପାରେ । କାଳବୈଶାଖୀ ପ୍ରଭାବରେ ବର୍ଷା ହେବ। ରାଜଧାନୀରେ ବି ହାଲୁକା ବର୍ଷା ସମ୍ଭାବନା ଅଛି । ହେଲେ ୨୬ ପରେ ପ୍ରଚଣ୍ଡ ତାତିରେ ଆଉଟପାଉଟ ହେବ ପୂରା ଓଡ଼ିଶା । ଅନେକ ସ୍ଥାନରେ ତାତି ୪୬ ଡିଗ୍ରୀ ଟପିବ । କିଛି ସ୍ଥାନରେ ଅବିଶ୍ୱସନୀୟ ଭାବେ ୪୭ରୁ ୪୮ ଡିଗ୍ରୀରେ ଛୁଇଁପାରେ । ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ଏଭଳି ଆଶଙ୍କା କରିଛନ୍ତି ।
ପ୍ରଫେସର ପଶୁପାଳକ କହିଛନ୍ତି, ୨୫ ତାରିଖ ଠାରୁ ଗ୍ରୀଷ୍ମ ପ୍ରବାହ ସ୍ଥିତି ଅତି ଭୟାନକ ହୋଇପାରେ । ମାସ ଶେଷ ଯାଏ ଏଥିରୁ ମୁକ୍ତି ମିଳିବା ଆଶା ଦେଖାଯାଉ ନାହିଁ, ବରଂ ବଢ଼ିବ ପ୍ରକୋପ । ଉତ୍ତର ପଶ୍ଚିମ ଦିଗରୁ ରାଜ୍ୟକୁ ଶୁଷ୍କ ବାୟୁ ପ୍ରବାହିତ ହେଉଛି । ମହାନଦୀ ଅବବାହିକା ଦେଇ ଉପକୂଳ ଯାଏ ମାଡ଼ି ଆସୁଛି । ତତଲା ବାଲି ଓ ଏକ ପ୍ରକାର ନିଶ୍ଚଳ ପବନ ଯୋଗୁଁ ତାତି ଜମାଟ ବାନ୍ଧି ଭୟଙ୍କର ରୂପ ଧାରଣ କରୁଛି । ଏପଟେ ପୂର୍ବରୁ ସାମୁଦ୍ରିକ ପବନ ପ୍ରବାହ ପ୍ରାୟ ନାହିଁ । ଯେଉଁଥିପାଇଁ ଭୀଷଣ ମାତ୍ରାରେ ବଢ଼ିବ ତାପମାତ୍ରା । ତା ସାଙ୍ଗକୁ ଭୁବନେଶ୍ୱରରେ କଂକ୍ରିଟ ଜଙ୍ଗଲ, ପିଚୁ ରାସ୍ତା ଆଉ ପେଭର୍ ବ୍ଲକ୍ ତାତିକୁ ବହୁ ଗୁଣରେ ବଢ଼ାଇ ଦେବ । ଜଳିଯିବ ରାଜଧାନୀ ।
ଆଗକୁ ଦୁଇ ଦିନ କାଳବୈଶାଖୀ ବର୍ଷା ପ୍ରଭାବ ସତ୍ତେ୍ୱ ଗ୍ରୀଷ୍ମପ୍ରବାହରୁ ଆଶ୍ୱସ୍ତି ମିଳିବନି ବୋଲି ପ୍ରଫେସର ପଶୁପାଳକ କହିଛନ୍ତି । ବର୍ଷା ହେଉଥିବା ସ୍ଥାନରେ ତାପମାତ୍ରା ଅଳ୍ପ କମିବ । ୨୧ ତାରିଖରେ କାଳବୈଶାଖୀର କୌଣସି ପ୍ରଭାବ ରହିବନି । ୨୨ରେ ଦକ୍ଷିଣ ଓଡ଼ିଶାର ଅନେକ ସ୍ଥାନରେ ବର୍ଷା ହେବ । ୨୩ରେ ପଶ୍ଚିମ ଓଡ଼ିଶାର କିଛି ସ୍ଥାନରେ ବର୍ଷା ସମ୍ଭାବନା ଅଛି । କିନ୍ତୁ ଭୁବନେଶ୍ୱର ସମେତ ଉପକୂଳରେ ବର୍ଷା ହେବନି । ପାଗ ଆଂଶିକ ମେଘୁଆ ରହିବ । ୨୫ ପରେ ତାତି ପୁଣି ବଢ଼ିବ । ୨୬ରୁ ବିଭିନ୍ନ ସ୍ଥାନରେ ୪୬ ଡିଗ୍ରୀ ଟପିବ ବୋଲି ସେ ପୂର୍ବାନୁମାନ କରିଛନ୍ତି।
ପ୍ରଚଣ୍ଡ ଖରା ଓ ତାତି ଯୋଗୁ ଏବେ ୟୁଭି (ତେଜଷ୍କ୍ରିୟ ଯୋଗ୍ୟ ଅଲ୍ଟ୍ରା ଭାୟୋଲେଟ୍ ରଶ୍ମୀ) ମାତ୍ରା ୧୨ ରହୁଛି । ୟୁଭି ସ୍ତର ୧୧ରୁ ଅଧିକ ଟପିଲେ ଅତି ବିପଜ୍ଜନକ ପାଲଟିଥାଏ । ୟୁଭି ସ୍ତର ଅଧିକ ଥିବାବେଳେ ଲଗାତର ଖରା ସଂସ୍ପର୍ଶରେ ଆସିଲେ ଚର୍ମ କର୍କଟ ହେବାର ଆଶଙ୍କା ଅଧିକ ବୋଲି ଅନେକ ଅଙ୍କୋଲୋଜିଷ୍ଟ ମତ ରଖିଛନ୍ତି ।
ଅଧିକ ଖରା ସଂସ୍ପର୍ଶରେ ଆସୁଥିଲେ ଅପର ଲିପ୍ କ୍ୟାନସର ହେବାର ଅଧିକ ନଜିର ରହୁଛି । ସେହିଭଳି ୟୁଭି ସ୍ତର ଅଧିକ ଥିବାବେଳେ ସନବର୍ଣ୍ଣ ଓ ଆଖି ଖରାପ ହେବାର ଆଶଙ୍କା ମଧ୍ୟ ଅଧିକ । ଏଥିପାଇଁ ଜରୁରୀ ନଥିଲେ ଖରାକୁ ନ ଯିବାକୁ ବିଶେଷଜ୍ଞମାମେ ପରାମର୍ଶ ଦେଇଛନ୍ତି । ଶରୀର ସିଧାସଳଖ ଖରା ସଂସ୍ପର୍ଶରେ ନ ଆସିବାକୁ ଛତା ବ୍ୟବହାର କରିବା, ଦେହ ଓ ହାତକୁ ଘୋଡ଼ାଇବା ଓ ସନଗ୍ଲାସ ପିନ୍ଧବାକୁ ପରାମର୍ଶ ଦିଆଯାଇଛି ।
୨୧ରେ ମୟୂରଭଞ୍ଜ, କେନ୍ଦୁଝର ଓ ଅନୁଗୁଳରେ ଭୀଷଣ ଗ୍ରୀଷ୍ମଲହରୀ ବହିବ ବୋଲି ପାଣିପାଗ ବିଭାଗ ସତର୍କ କରାଇଛି । ଉପକୂଳ ଓଡ଼ିଶାରେ ବି ଗ୍ରୀଷ୍ମପ୍ରବାହ କଲବଲ କରିବ । ଭୀଷଣ ତାତି ଓ ଗୁଳୁଗୁଳି ଅସହ୍ୟ କରିବ । ତେବେ ଆସନ୍ତା ୨୪ ଘଣ୍ଟାରେ ରାଜ୍ୟର ଅନେକ ସ୍ଥାନରେ ତାପମାତ୍ରା ୨ରୁ ୩ ଡିଗ୍ରୀ କମିବ । କନ୍ଧମାଳ, ଗଞ୍ଜାମ, ରାୟଗଡ଼ା, ଗଜପତି, କୋରାପୁଟ, ମାଲକାନଗିରି, ନବରଙ୍ଗପୁର, ନୂଆପଡ଼ା, କଳାହାଣ୍ଡି ଓ ବଲାଙ୍ଗୀରର କିଛି ସ୍ଥାନରେ କାଳବୈଶାଖୀ ପ୍ରଭାବରୁ ବର୍ଷା ହୋଇପାରେ ।
୨୨ରେ ଉତ୍ତର ଓ ଦକ୍ଷିଣ ଓଡ଼ିଶାର କିଛି ସ୍ଥାନରେ ଝଡ଼ବର୍ଷା ସହିତ ୫୦ କିମି ବେଗରେ ପବନ ବହିପାରେ । ୨୩ରେ ଉତ୍ତର ଆଭ୍ୟନ୍ତରୀଣ ଓଡ଼ିଶାର ବିଭିନ୍ନ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ । ୨୪ରେ ଦକ୍ଷିଣ ଉପକୂଳ ଓଡ଼ିଶା ସହିତ ମାଲକାନଗିରି, କୋରାପୁଟ, ରାୟଗଡ଼ା, କଳାହାଣ୍ଡି ଓ କନ୍ଧମାଳର କିଛି ସ୍ଥାନରେ ଘଡ଼ଘଡ଼ି ସହ ବର୍ଷା ସମ୍ଭାବନା ଅଛି ବୋଲି ପାଣିପାଗ ବିଭାଗ ପୂର୍ବାନୁମାନ ଦେଇଛି ।
