ନୂଆଦିଲ୍ଲୀ: ରଖେ ହରି, ମାରେ କିଏ… ଏହି କଥା ସମସ୍ତେ ଶୁଣିଥିବେ । ଏବେ ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ତୁର୍କୀରେ । ଫେବ୍ରୁଆରୀ ୬ରେ ତୁର୍କୀ ଏବଂ ସିରିଆରେ ହୋଇଥିବା ବିନାଶକାରୀ ଭୂକମ୍ପର ୧୧ ଦିନ ପରେ ୧୪ ବର୍ଷୀୟ ଉସ୍ମାନଙ୍କୁ ସୁରକ୍ଷିତ ଉଦ୍ଧାର କରାଯାଇଛି ।

ତୁର୍କୀର ସ୍ୱାସ୍ଥ୍ୟ ମନ୍ତ୍ରୀ ଫହାର୍ଟିନ କୋକା ଟ୍ୱିଟ୍ କରି ଉସ୍ମାନଙ୍କ ବିଷୟରେ ଏହି ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ ଯେ ଭୂକମ୍ପର ୨୬୦ ଘଣ୍ଟା ପରେ ଉସ୍ମାନଙ୍କୁ ଉଦ୍ଧାର କରାଯାଇ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି ଯେ ୧୪ ବର୍ଷୀୟ ଉସ୍ମାନ ୨୬୦ ଘଣ୍ଟା ପରେ ପୁଣି ଥରେ ଆମ ସହ ଅଛନ୍ତି । ବର୍ତ୍ତମାନ ସମୟରେ ତାଙ୍କୁ ହଟେ ମୁସ୍ତଫା କେମଲ ବିଶ୍ୱବିଦ୍ୟାଳୟ ହସ୍ପିଟାଲରେ ଭର୍ତ୍ତି କରାଯାଇଛି । ସ୍ୱାସ୍ଥ୍ୟ ମନ୍ତ୍ରୀ ଉସ୍ମାନଙ୍କ ଫଟୋ ମଧ୍ୟ ସେୟାର କରିଛନ୍ତି ।  

ରିପୋର୍ଟ ଅନୁସାରେ ତୁର୍କୀର ହାଟେ ପ୍ରାନ୍ତରେ ଗୁରୁବାର ରାତିରେ ଉଦ୍ଧାରକାରୀ ଟିମ୍ ଦୁଇ ଜଣଙ୍କୁ ଭଗ୍ନାବଶେଷ ତଳୁ ବାହାର କରାଯାଇଛି । ଉଦ୍ଧାର ହୋଇଥିବା ଦୁଇ ଜଣ ହେଲେ ୨୬ ବର୍ଷୀୟ ମେହମତ ଏବଂ ୩୪ ବର୍ଷୀୟ ମୁସ୍ତଫା ଅବସୀ । ଦୁଇ ଜଣଙ୍କ ନିଶ୍ୱାସ ଚାଲୁଥିବାରୁ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।

ତୁର୍କୀ ଏବଂ ସିରିଆରେ ବିନାଶକାରୀ ଭୂକମ୍ପରେ ମୃତକଙ୍କ ସଂଖ୍ୟା ୪୧,୦୦୦ ଟପିଛି । ଏବେ ବି ଭୂକମ୍ପ ଅଞ୍ଚଳରେ ଉଦ୍ଧାର କାର୍ଯ୍ୟ ଜାରି ରହିଛି ।