ନୂଆଦିଲ୍ଲୀ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାରି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ଟେଷ୍ଟ ମ୍ୟାଚ୍ ଶୁକ୍ରବାର ଫେବ୍ରଆରୀ ୧୭ରେ ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଖେଳାଯିବ । ଦୁଇ ଟିମ ଦିଲ୍ଲୀରେ ପହଞ୍ଚି ସାରିଛନ୍ତି ଏବଂ ପରବର୍ତ୍ତୀ ମ୍ୟାଚ ପାଇଁ ପ୍ରସ୍ତୁତି ଶେଷ କାରିଛନ୍ତି । ଏହାରି ଭିତରେ ଭାରତୀୟ ଟିମକୁ ନେଇ ଏକ ବଡ଼ ଖବର ସାମନାକୁ ଆସିଛି । ବିବାହ ସିଜିନ୍ ଏବଂ ଜି ୨୦ ଶିଖର ସମ୍ମିଳନୀ ଯୋଗୁଁ ଦିଲ୍ଲୀର ପାଞ୍ଚ ତାରକା ହୋଟଲର ଅଧିକାଂଶ ରୁମ୍ ପୂର୍ବରୁ ବୁକ୍ ହୋଇସାରିଛି । ଏହି କାରଣରୁ ଭାରତୀୟ ଟିମ ଦ୍ୱିତୀୟ ଟେଷ୍ଟ ପୂର୍ବରୁ ହୋଟେଲ ପରିବର୍ତ୍ତନ କରିବା ପାଇଁ ବାଧ୍ୟ ହୋଇଛି ।

ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଦ୍ୱିତୀୟ ଟେଷ୍ଟ ଫେବ୍ରୁଆରୀ ୧୭ରୁ ୨୧ ମଧ୍ୟରେ ଖେଳାଯିବ । ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ୬ ବର୍ଷ ପରେ ଟେଷ୍ଟ ମ୍ୟାଚ୍ ଖେଳାଯିବ । ଶେଷ ଥର ପାଇଁ ୨୦୧୭ରେ ଏଠାରେ ମ୍ୟାଚ୍ ଖେଳା ଯାଇଥିଲା । ନାଗପୁରରେ ପ୍ରଥମ ଟେଷ୍ଟରେ ଭାରତୀୟ ଟିମ୍ ଇନିଂସ ଏବଂ ୧୩୨ ରନରେ ବିଜୟ ସହ ସିରିଜରେ ୧-୦ରେ ଆଗୁଆ ହୋଇଥିଲା ।

ରିପୋର୍ଟ ଅନୁସାରେ ଭାରତୀୟ କ୍ରିକେଟ୍ ଟିମ୍ ସାଧାରଣତଃ ଦିଲ୍ଲୀର ତାଜ ପ୍ୟାଲେସ କିମ୍ୱା ଆଇଟିସି ମୌର୍ଯ୍ୟରେ ରହିଥାଏ, କିନ୍ତୁ ଚଳିତ ଥର କଡ଼କଡ଼ଡୁମାରେ ହୋଟେଲ ଲୀଲାରେ ରହିଛି । ସେହିପରି ବିରାଟ କୋହଲି ମଧ୍ୟ ଟିମ୍ ସହ ରହୁ ନାହାନ୍ତି । ଗୁରୁଗ୍ରାମରେ ନିଜ ଘରେ କିଛି ଦିନ ପାଇଁ ନିଜ ପରିବାର ସହ ସମୟ ବିତାଇବାକୁ ନିଷ୍ପତ୍ତି ନେଇଛନ୍ତି ।