ଢେଙ୍କାନାଳ ୨୪।୬: ଟାଟା ଏସିଇ ଚକରେ ପମ୍ପ୍ ଦେଉଥିବା ବେଳେ ଅଘଟଣ । ଟ୍ରକ୍ ଚଢିଯିବାରୁ ଘଟଣାସ୍ଥଳରେ ଟାଟା ଏସିଇ ଡ୍ରାଇଭରଙ୍କ ଜୀବନ ଚାଲିଯାଇଛି । ଏପରି ଅଭାବନୀୟ ଘଟଣା ଘଟିଛି ଢେଙ୍କାନାଳ ସଦର ଥାନା ଅନ୍ତର୍ଗତ ବଳଦିଆବନ୍ଧ ଛକ ନିକଟରେ । ମୃତକ ଜଣଙ୍କ ସଦର ଥାନା ଅନ୍ତର୍ଗତ ବୋରାପଦା ଗ୍ରାମର ସୁଶାନ୍ତ ନାୟକ ।
ସୂଚନାଯୋଗ୍ୟ ଯେ, ଗୁରୁବାର ରାତିରେ ୫୫ନମ୍ବର ଜାତୀୟ ରାଜପଥ ପାର୍ଶ୍ଵ ବଳଦିଆବନ୍ଧରେ ଏକ ଟାୟାର ରିପ୍ୟାରିଂ ଦୋକାନରେ ସୁଶାନ୍ତ ଚଳାଉଥିବା ଏକ ଟାଟା ଏସିଇରେ ପମ୍ପ୍ ଦେଉଥିଲେ । ମାତ୍ର ଜାତୀୟ ରାଜପଥରେ ଏକ ଟ୍ରକ୍ ଦ୍ରୁତ ଗତିରେ ଆସି ଚକ ନିକଟରେ ଥିବା ସୁଶାନ୍ତଙ୍କ ଉପରେ ଚଢ଼ି ଯାଇଥିଲା । ଫଳରେ ଘଟଣାସ୍ଥଳରୁ ଗୁରୁତର ଅବସ୍ଥାରେ ସୁଶାନ୍ତଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ସେତେବେଳକୁ ତାଙ୍କର ମୃତ୍ୟୁ ଘଟି ସାରିଥିବା ଜଣାପଡିଛି । ଗୋବିନ୍ଦପୁର ଫାଣ୍ଡି ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଦୁର୍ଘଟଣା ଘଟାଇ ଟ୍ରକ୍ଟି ପଳାଇଯାଇଥିବା ଜଣାପଡିଛି ।
