ମୁମ୍ଵାଇ ୧୬।୦୫: ଚେନ୍ନାଇରେ ଏକ ମର୍ମନ୍ତୁଦ ସଡକ ଦୁର୍ଘଟଣା । ଚେନ୍ନାଇ-ତ୍ରିଚି ଜାତୀୟ ରାଜପଥରେ ମଦୁରନ୍ତକମରେ ଏକ ବସ୍ ଏବଂ ଟ୍ରକ ଧକ୍କା ହେବା ଫଳରେ ୪ ଜଣଙ୍କର ମୃତ୍ୟୁ ହୋଇଛି। ଏହା ସହ ୧୫ରୁ ଅଧିକ ଆହତ ହୋଇଛନ୍ତି। ଆହତମାନଙ୍କୁ ସ୍ଥାନୀୟ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି।
ପୋଲିସର ସୂଚନାନୁସାରେ, ଗୁରୁବାର (ମେ ୧୬, ୨୦୨୪) ପୂର୍ବାହ୍ନରେ ଚେନ୍ନାଇ-ତ୍ରିଚି ଜାତୀୟ ରାଜପଥରେ ଏକ ବସକୁ ଓଭରଟେକ୍ କରୁଥିବା ବେଳେ ଏହି ଦୁର୍ଘଟଣା ଘଟିଛି। ଓଭରଟେକିଂ ବେଳେ ବସ୍ ଡ୍ରାଇଭର ନିୟନ୍ତ୍ରଣ ହରାଇ ବସ୍ ଏକ ଟ୍ରକ ସହିତ ମୁହାଁମୁହିଁ ଧକ୍କା ହୋଇଥିଲା। କିଛି ଆହତଙ୍କ ଅବସ୍ଥା ଗୁରୁତର ଥିବା କୁହାଯାଉଛି।
ଏହାପୂର୍ବରୁ ବୁଧବାର (୧୫ ମେ’୨୦୨୪) ତାମିଲନାଡୁରେ ଦୁଇଟି ପୃଥକ ସଡ଼କ ଦୁର୍ଘଟଣାରେ ପ୍ରାୟ ୯ ଜଣଙ୍କ ମୃତ୍ୟୁ ଖବର ପ୍ରକାଶ ପାଇଥିଲା। ଏକ କାର ନିୟନ୍ତ୍ରଣ ହରାଇ ଗଛ ସହ ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣାରେ କାରରେ ଯାତ୍ରା କରୁଥିବା ୫ ଜଣ ଯୁବକ ଘଟଣାସ୍ଥଳରେ ମୃତ୍ୟୁ ବରଣ କରିଛନ୍ତି। ଅନ୍ୟ ଏକ ଦୁର୍ଘଟଣାରେ ଚେନ୍ନାଇର କାର ଓ ଟ୍ରକ ଧକ୍କା ହୋଇଥିଲା। ଏହି ଦୁର୍ଘଟଣାରେ କାରରେ ଯାତ୍ରା କରୁଥିବା ସମାନ ପରିବାରର ଚାରିଜଣ ସଦସ୍ୟଙ୍କର ମୃତ୍ୟୁ ଘଟିଛି।