ନୂଆଦିଲ୍ଲୀ: ଲୋକପ୍ରିୟ ତାମିଲ ଅଭିନେତା ତଥା ରାଜନେତା ଆରୁଲମାନୀଙ୍କ ଦେହାନ୍ତ। ଗତକାଲି ରାତିରେ ତାଙ୍କର ହୃଦଘାତରେ ପରଲୋକ ହୋଇଛି। ମୃତ୍ୟୁ ବେଳକୁ ତାଙ୍କୁ ୬୫ ବର୍ଷ ହୋଇଥିଲା। ସୂଚନା ଅନୁଯାୟୀ, ଚେନ୍ନାଇରୁ ଫେରି ଘରେ ଆରାମ କରୁଥିବା ସମୟରେ ତାଙ୍କୁ ହୃଦଘାତ ହୋଇଥିଲା। ଯାହାପରେ ପରିବାର ଲୋକେ ତାଙ୍କୁ ରୋୟାପେଟ୍ଟା ସରକାରୀ ହସ୍ପିଟାଲକୁ ନେଇଥିଲେ। ମାତ୍ର ସେଠାରେ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ସେପଟେ ତାଙ୍କର ଅକାଳ ମୃତ୍ୟୁ ଉଭୟ ଫ୍ୟାନ୍ସ ଏବଂ ଏଆଇଡିଏମକେ କର୍ମୀରେ ମର୍ମାହତ ହୋଇଛନ୍ତି ଫ୍ୟାନ୍ସ।
ଆରୁଲମାନୀ ତାମିଲ ସିନେମା ‘ଆଜାଗୀ’, ‘ଥେନ୍ଦ୍ରାଲ’, ‘ଥାଣ୍ଡବକ୍କୋନ’ ଭଳି ଅନେକ ଫିଲ୍ମ ପାଇଁ ବେଶ୍ ଖ୍ୟାତି ଅର୍ଜନ କରିଥିଲେ। ତେବେ ଖାଲି ଯେ, ସିନେମାରେ ଜଣେ ଭଲ ଅଭିନେତା ଭାବରେ ସେ ଖ୍ୟାତି ଅର୍ଜନ କରିଥିଲେ ତାହା ନୁହେଁ, ସେ ରାଜନୀତିରେ ମଧ୍ୟ ଖୁବ୍ ଲୋକପ୍ରିୟ ହୋଇପାରିଥିଲେ। ସେ ଏଆଇଏଡିଏମକେ ରେ ଜଣେ ସକ୍ରିୟ ନେତା ମଧ୍ୟ ଥିଲେ।
ହେବାକୁ ଥିବା ଲୋକସଭା ନିର୍ବାଚନ ପାଇଁ ଦଳ ତରଫରୁ ପ୍ରଚାର ମଧ୍ୟ କରୁଥିଲେ। ଆଉ ବିଗତ ୧୦ ଦିନରୁ ସେ ଦଳ ପାଇଁ ପ୍ରଚାର ହିଁ କରୁଥିଲେ। ଏମିତିକି ପ୍ରଚାର ପାଇଁ ଭିନ୍ନ ଭିନ୍ନ ସ୍ଥାନକୁ ମଧ୍ୟ ଯାତ୍ରା କରୁଥିଲେ। ତାଙ୍କର ଅନ୍ୟ ଚର୍ଚ୍ଚିତ ଫିଲ୍ମ ମଧ୍ୟରେ ରହିଛି ‘ସିଙ୍ଗମ’, ‘ଲିଙ୍ଗା’, ‘ଥାଣ୍ଡବାକୋନ’ ଏବଂ ‘ଧର୍ମା ସିଲନ’।
ଉଲ୍ଲେଖଯୋଗ୍ୟ, ଆୁରଲମାନୀଙ୍କ ବ୍ୟତୀତ ଚଳିତ ମାସରେ ତିନି ଜଣ ତାମିଲ ଅଭିନେତା ହୃଦଘାତରେ ପ୍ରାଣ ହରାଇଲେଣି। ପୂର୍ବରୁ ହୃଦ୍ଘାତରେ ଅଭିନେତା ଶେଷୁ, ଡାନିଏଲ ବାଲାଜୀ ଏବଂ ବିଶେଶ୍ବରା ରାଓ ପ୍ରାଣ ହରାଇଛନ୍ତି।