କାବୁଲ,୧୭/୦୮: ଆଫଗାନିସ୍ତାନକୁ କବଜା କରିନେଇଛି ତାଲିବାନ । ଚାରିଆଡେ ଭୟର ମାହୋଲ । ବେଶୀ ଆତଙ୍କରେ ରହିଛନ୍ତି ମହିଳା ଓ ଶିଶୁ । ଘରୁ ବାହାରୁ ନାହାଁନ୍ତି । ଅନେକ ଆଫଗାନ୍ ନାଗରିକ ଦେଶ ଛାଡି ପଳାୟନ କରିବାକୁ ବିମାନ ବନ୍ଦରରେ ଅପେକ୍ଷା କରିଛନ୍ତି । ଏହାମଧ୍ୟରେ ତାଲିବାନ ପକ୍ଷରୁ ବିବୃତି ପ୍ରକାଶ ପାଇଛି । ନାଗରିକଙ୍କୁ ଭୟ ନକରିବାକୁ ଏଥିରେ ଉଲ୍ଲେଖ ହୋଇଛି ।
ଦେଶରେ ଦେଖାଦେଇଥିବା ଅସ୍ଥିରତାକୁ ନେଇ ତାଲିବାନ କହିଛି ଯେ, ନାଗରିମାନେ ଭୟଭୀତ ହୁଅନ୍ତୁ ନାହିଁ । ଏଥିପାଇଂ ଆତଙ୍କବାଦୀ ସଙ୍ଗଠନ ନିବେଦନ କରିଛି । ଆହୁରି ମଧ୍ୟ ସାଧାରଣ ଜୀବନ ଯାତ୍ରାରେ ସାମିଲ ହେବାକୁ ଲୋକଙ୍କୁ ଆହ୍ବାନ କରାଯାଇଛି । ଏହାସହ ସମସ୍ତ କର୍ମଚାରୀଙ୍କୁ ସର୍ବକ୍ଷମା ଘୋଷଣା କରାଯାଇଛି । ସେହିପରି ଅଫିସ କାମରେ ଯୋଗ ଦେବାକୁ ସମସ୍ତ କର୍ମଚାରୀଙ୍କୁ ତାଲିବାନ ଆଦେଶ ଦେଇଛି ।
ସୂଚନାଯୋଗ୍ୟ, ଆଫଗାନିସ୍ତାନରେ ପୁଣି ତାଲିବାନୀ ଶାସନ ଫେରିଛି । ରାଷ୍ଟ୍ରପତି ଅଶରଫ୍ ଗନୀ ଦେଶ ଛାଡି ଚାଲିଯାଇଛନ୍ତି । ରାଷ୍ଟ୍ରପତି ଘନୀଙ୍କ ସମେତ ତାଙ୍କ ପୁରା ଟିମ ଦେଶ ଛାଡି ଚାଲିଯାଇଥିବା ସୂଚନା ମିଳିଛି । ତାଲିବାନ ଆଗରେ ସମ୍ପୂର୍ଣ୍ଣ ଭାବେ ଆତ୍ମସମର୍ପଣ କରିଛନ୍ତି ଆଫଗାନ୍ ସରକାର । ଏଣିକି ସେଠାରେ ତାଲିବାନ ସରକାର ଚାଲିବ । ଦେଶର ଅଧିକାଂଶ ସ୍ଥାନରେ ବର୍ତ୍ତମାନ କଠୋରପନ୍ଥୀ ତାଲିବାନମାନେ କବ୍ଜା କରିସାରିଲେଣି ।ଏପରିକି ସେମାନେ ସଂସଦ ଭବନରେ ପଶି ଉତ୍ପାତ କରୁଥିବା ମଧ୍ୟ ଦେଖିବାକୁ ମିଳିଥିଲା ।
