ନୂଆଦିଲ୍ଲୀ: କେଜରିୱାଲ୍ଙ୍କ ସହଯୋଗୀ ବିଭବ କୁମାରଙ୍କ ବିରୋଧରେ ଅଭିଯୋଗ ଆଣିବା ପରେ ସ୍ୱାତୀ ମାଲିୱାଲ୍ଙ୍କ ଜୀବନ ପ୍ରତି ବିପଦ ବଢ଼ିଯାଇଛି। ତାଙ୍କୁ ଦୁଷ୍କର୍ମ ଓ ହତ୍ୟା ଭଳି ଧମକ ଦିଆଯାଉଛି। ତେବେ ଧ୍ରୁବ୍ ରାଠିଙ୍କ ଏକତରଫା ଭିଡିଓ ଆସିବା ପରେ ଏହି ଧାରା ଅଧିକ ବଢ଼ିଯାଇଛି ବୋଲି ଦିଲ୍ଲୀ ମହିଳା କମିଶନର ପୂର୍ବତନ ଅଧ୍ୟକ୍ଷା ସ୍ୱାତୀ ମାଲିୱାଲ୍ ଅଭିଯୋଗ କରିଛନ୍ତି।
ରବିବାର ଏକ୍ସରେ ପୋଷ୍ଟ କରି ସ୍ୱାତୀ ଲେଖିଛନ୍ତି “ ମୋ ଦଳ ଆପ୍ର ନେତା ଓ କାର୍ଯ୍ୟକର୍ତ୍ତା ଦ୍ୱାରା ମୋ ଚରିତ୍ର ସଂହାର କରି ମୋତେ ଲଜ୍ଜିତ କରିବା ଓ ମୋ ବିରୋଧ୍ୱରେ ଉସ୍କାଇବା କାମ କରୁଛନ୍ତି। ମୋତେ ବର୍ତ୍ତମାନ ଦୁଷ୍କର୍ମ ଓ ହତ୍ୟା ଧମକ ଦିଆଯାଉଛି। ତେବେ ଧ୍ରୁବ୍ ରାଠି ମୋ ବିରୋଧରେ ଏକତରଫା ଭିଡିଓ ପୋଷ୍ଟ କରିବା ପରେ ଏହି ମାମଲା ଅଧିକ ବଢ଼ିଯାଇଛି।”
ସ୍ୱାତୀ କହିଛନ୍ତି ଯେ ଅନ୍ୟ ଆପ୍ ମୁଖପାତ୍ର ଭଳି କାର୍ଯ୍ୟ କରିବା ଧ୍ରୁବ ରାଠୀଙ୍କ ପରି ସ୍ୱାଧୀନ ସାମ୍ବାଦିକଙ୍କ ପାଇଁ ଲଜ୍ଜାଜନକ। ପୀଡ଼ିତାଙ୍କୁ ଏମିତି ଲଜ୍ଜିତ କରାଯାଉଛି ଯେ ତାଙ୍କୁ ବର୍ତ୍ତମାନ ଅତ୍ୟଧିକ ନିର୍ଯାତନା ତଥା ଧମକ ଦିଆଯାଉଛି ବୋଲି ସ୍ୱାତୀ କହିଛନ୍ତି। ପାର୍ଟି ନେତୃତ୍ୱ ମୋତେ ଅଭିଯୋଗ ୱିଡ୍ର କରିବାକୁ ଧମକ ଦେଉଛନ୍ତି। ଧ୍ରୁବ ରାଠୀଙ୍କୁ ମୁଁ କଣ୍ଟାକ୍ଟ କରି ମୋ କଥା କହିବାକୁ ଚେଷ୍ଟା କରୁଥିଲେ ବି ସେ ମୋ କଲ୍ କି ମେସେଜ୍ର ଉତ୍ତର ଦେଉ ନାହାନ୍ତି ବୋଲି ସ୍ୱାତୀ କହିଛନ୍ତି।
ସୂଚନା ଥାଉକି ମେ ୨୨ ତାରିଖରେ ଧ୍ରୁବ ରାଠୀ ଭିଡିଓ ପୋଷ୍ଟ କରି ସ୍ୱାତୀ ମାଲିୱାଲ୍ କେସ୍ର ବର୍ଣ୍ଣନା କରିଥିଲେ। ଧ୍ରୁବ ରାଠୀ ଦୁଇଟି ଭିଡିଓ ପୋଷ୍ଟ କରିଥିଲେ। ଏଥିରେ ସ୍ୱାତୀ କେଜରିୱାଲ୍ଙ୍କ ସୁରକ୍ଷାକର୍ମୀଙ୍କ ସହ ଦୁର୍ବ୍ୟବାହର କରିଥିବା କଥା କହିଥିଲେ। ଏବଂ ଘଟଣା ପରେ ସ୍ୱାତୀ ଛୋଟେଇ ଛଟୋଇ ଆସୁଥିବା କଥା କହିଥିଲେ। ହେଲେ ଧ୍ରୁବ୍ ରାଠୀ ଏକ ଭିଡିଓ ଶେୟାର କରିଥିଲେ। ଯେଉଁଥିରେ ସେ ଆରାମ୍ରେ ଚାଲି ଚାଲି ଯାଉଥିବାର ଦେଖିବାକୁ ମିଳିଛି। ଏଥିରେ ଧ୍ରୁବ ପଚାରୁଛନ୍ତି ଆମ ପାଖରେ ଦୁଇଟି ଭିଡିଓ ଅଛି। ଏଥିରେ କିଏ ସତ କହୁଛି କିଏ ମିଛ ଆପଣ ବିଚାର କରନ୍ତୁ।
ଅନ୍ୟପଟେ ସ୍ୱାତୀ କହିଛନ୍ତି ଯେ ଧ୍ରୁବ୍ ଭିଡିଓର ସତ୍ୟାସତ୍ୟ କହି ନାହାନ୍ତି। କେବଳ ନିର୍ଦ୍ଦିଷ୍ଟ ଭିଡିଓ ଅପ୍ଲୋଡ୍ କରାଯାଇଛି ବୋଲି ସ୍ୱାତୀ ଅଭିଯୋଗ କରିଛନ୍ତି। ତେବେ ତାଙ୍କୁ ମିଳିଥିବା ଧମକ ବିଷୟରେ ସେ ଦିଲ୍ଲୀ ପୁଲିସକୁ ଜଣାଇଛନ୍ତି। ଯଦି ମୋର କିଛି ହୁଏ ତେବେ କିଏ ଏହାକୁ ଉସ୍କାଇଥିବା ସମସ୍ତେ ଜାଣିଛନ୍ତି ବୋଲି ସ୍ୱାତୀ କହିଛନ୍ତି।
ସୂଚନା ଥାଉକି ସ୍ୱାତୀ ମାଲିୱାଲ୍ଙ୍କ ମାମଲାକୁ ନେଇ ବିଜେପି- ଆପ ମୁହାଁମୁହିଁ ହୋଇଛନ୍ତି। ବିଜେପି ଏସବୁ ଷଡ଼ଯନ୍ତ୍ର ରଚିଛି ବୋଲି ଆପ୍ ଅଭିଯୋଗ କରୁଥିବା ବେଳେ ଅକାଧିକ ବିଜପି ନେତା ଆପ୍କୁ ଟାର୍ଗେଟ୍ କରିଛନ୍ତି। ଅନ୍ୟପଟେ ମାମଲାର ଅଭିଯୁକ୍ତ ବିଭବ କୁମାରଙ୍କୁ ଶୁକ୍ରବାର(ମେ ୨୪)ରେ ଦିଲ୍ଲୀ ପୁଲିସ ବିଚାରବିଭାଗୀୟ ହାଜତକୁ ନେଇଛି। ସେ ମେ ୨୮ ତାରିଖ ପର୍ଯ୍ୟନ୍ତ କଷ୍ଟୁଡିରେ ରହିବେ।