ନୂଆଦିଲ୍ଲୀ: ଆରଆରଟିଏସ ପ୍ରୋଜେକ୍ଟ (ରାପିଡ୍ ରେଳ) ପାଇଁ ଦିଲ୍ଲୀ ସରକାର ପାଣ୍ଠି ନଦେବା ଉପରେ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଛନ୍ତି । କେଜ୍ରିୱାଲ ସରକାରଙ୍କୁ କଡ଼ା ଶବ୍ଦରେ ଭର୍ତ୍ସନା କରି ସୁପ୍ରିମକୋର୍ଟ କହିଛନ୍ତି ଯେ ତାଙ୍କ ବିଜ୍ଞାପନ ଟଙ୍କାକୁ ଏହି ପ୍ରୋଜେକ୍ଟରେ ଖର୍ଚ୍ଚ କରାଯାଉ । ସର୍ବୋଚ୍ଚ ଅଦାଲତ ଏଥିପାଇଁ ଦିଲ୍ଲୀ ସରକାରଙ୍କୁ ଏକ ସପ୍ତାହ ସମୟ ଦେଇଛନ୍ତି ।   

ସୁପ୍ରିମକୋର୍ଟ ଏହା ପୂର୍ବରୁ ଜୁଲାଇରେ ମଧ୍ୟ କେଜ୍ରିୱାଲ ସରକାରଙ୍କ ଉପରେ ଅସନ୍ତୋଷ ଝାଡିଥିଲେ । ଏହାସହ ପ୍ରୋଜେକ୍ଟ ପାଇଁ ଅର୍ଥ ଜାରି କରିବାକୁ କହିଥିଲେ । ନ୍ୟୁଜ୍ ଏଜେନ୍ସି ଏଏନଆଇ ଅନୁସାରେ ସୁପ୍ରିମକୋର୍ଟ କହିଛନ୍ତି, ‘ଦିଲ୍ଲୀ ସରକାର କୋର୍ଟଙ୍କ ଆଦେଶ କାହିଁକି ପାଳନ କଲେ ନାହିଁ ? ଆମେ ଆପଣଙ୍କ (ଦିଲ୍ଲୀ ସରକାର) ବଜେଟ ଉପରେ ରୋକ ଲଗାଇବା ଦେବୁ । ଆମେ ଏହାକୁ ସିଜ୍ କରିଦେବୁ ଓ ଏହି ପ୍ରୋଜେକ୍ଟରେ ଲଗାଇବୁ’।

ଜଷ୍ଟିସ ସଞ୍ଜୟ କିଷନ କୌଲ ଓ ଜଷ୍ଟିସ୍ ସୁଧାଂଶୁ ଧୂଳିଆଙ୍କ ଖଣ୍ଡପୀଠ ଏହା ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ଦିଲ୍ଲୀ ସରକାରଙ୍କ ବିଜ୍ଞାପନ ଫଣ୍ଡକୁ ପ୍ରୋଜେକ୍ଟ ପାଇଁ ଟ୍ରାନ୍ସଫର କରିଦିଆଯାଉ । ତେବେ ଏହି ଆଦେଶକୁ ଏକ ସପ୍ତାହ ଅବଧି ପାଇଁ ସ୍ଥଗିତ ରଖାଯାଇଛି । ସର୍ବୋଚ୍ଚ ଅଦାଲତ କହିଛନ୍ତି ଯେ ଯଦି ଗୋଟିଏ ସପ୍ତାହରେ ଦିଲ୍ଲୀ ସରକାର ଟଙ୍କା ଟ୍ରାନ୍ସଫର ନକରନ୍ତି ତେବେ ଏହି ଆଦେଶ ଲାଗୁ କରାଯିବ । ଦିଲ୍ଲୀ ସରକାରଙ୍କ ପକ୍ଷରୁ ହାଜର ହୋଇ ବରିଷ୍ଠ ଆଇନଜୀବୀ ମୀନାକ୍ଷୀ ଅରୋରା ଏକ ସପ୍ତାହ ସମୟ ମାଗିଥିଲେ । ଜଷ୍ଟିସ କୌଲ କହିଛନ୍ତି ଯେ ମାମଲାକୁ ଏକ ସପ୍ତାହ ପରେ ସୂଚୀବଦ୍ଧ କରାଯାଉଛି । ଯଦି ଅର୍ଥ ଦିଆନଯାଏ ତେବେ ଆଦେଶ ପ୍ରଭାବୀ ହେବ ।

Also Read: କେଜ୍ରିୱାଲଙ୍କ ବଢିଲା ଅଡ଼ୁଆ, ମଦ ଦୁର୍ନୀତି ମାମଲାରେ ପଚରାଉଚରା ପାଇଁ ନୋଟିସ୍ ପଠାଇଲା ଇଡି