ରାଉରକେଲା ୧୮|୬: ଷ୍ଟିଲ ସିଟିରେ ବିହାରୀ ଲିଚୁ ବିକ୍ରି ଉପରେ ଲାଗିଲା କଟକଣା । ରାଜ୍ୟର ବିଭିନ୍ନ ସ୍ଥାନରେ ବିହାରୀ ଲିଚୁ ବିକ୍ରି ନେଇ  ନ୍ୟୁଜ୍ ସେଭେନରେ ଖବର ପ୍ରସାରଣ ପରେ ଆକ୍ସନକୁ  ଆସିଛନ୍ତି ସୁନ୍ଦରଗଡ ଜିଲ୍ଲାପାଳ । ରାଉରକେଲାରେ ଲିଚୁ କୋଳି ବିକ୍ରି ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି । ମସ୍ତିଷ୍କ ଜ୍ବରରେ ବିହାର ମୁଜାଫରପୁରରେ ଲିଚୁ ଖାଇ  ଶିଶୁ ମଡ଼କ ପରେ ଏଠି ଦେଖାଦେଇଛି ତତ୍ପରତା । ସେହିଭଳି ରାଜ୍ୟକୁ ଆସୁଥିବା ଲିଚୁର ମାନ ପରୀକ୍ଷା ପାଇଁ ସ୍ବାସ୍ଥ୍ୟ ଓ ପରିବାର କଲ୍ୟାଣମନ୍ତ୍ରୀ ନବ କିଶୋର ଦାସ ନିର୍ଦ୍ଦେଶ ଦେଇଛନ୍ତି ।

ଦେଖିବାକୁ ଯେମିତି ଲାଲ ଟହ ଟହ ହେଇ ସୁନ୍ଦର, ପାଟିକି ବି ସେତିକି ସୁଆଦିଆ । ହେଲେ ଆଖିକୁ ସନ୍ଦର, ପାଟିକୁ ମିଠା ଏଇ ଫଳଟି ଏବେ ରାଉରକେଲା ମାର୍କେଟ୍ ରୁ ଗାଏବ । ବିହାର ମୁଜାଫରପୁରରେ ଲିଚୁ ଖାଇ ଗଲାଣି ୧୦୦ରୁ ଅଧିକ ପିଲାଙ୍କ ଜୀବନ । ଅନେକ ପିଲା ଡାକ୍ତରଖାନାରେ ମୃତ୍ୟୁ ସହ ସଂଗ୍ରାମ କରୁଛନ୍ତି ।  ତେଣୁ ଆକ୍ସନ ମୋଡ୍ କୁ ଆସିଯାଇଛନ୍ତି ସୁନ୍ଦରଗଡ଼ ଜିଲ୍ଲାପାଳ । ରାଉରକେଲାରେ ବିହାରୀ ଲିଚୁ ବିକ୍ରି ଉପରେ ଲାଗିଛି କଟକଣା । ଦେଖନ୍ତୁ ଫଳ ମାର୍କେଟ୍‌ର ଚିତ୍ର । ଆମ୍ବ, ଅଙ୍ଗୁର, ସପୁରୀ, କଦଳୀ କେତେ ଅଛି । ହେଲେ ଲିଚୁ କୌଣସି ଦୋକାନରେ  ଦେଖିବାକୁ ପାଇବେନି ଆପଣ ।

ଜିଲ୍ଲା ପ୍ରଶାସନର ନିର୍ଦ୍ଦଶେକୁ କଡ଼ାକଡ଼ି ଭାବେ ପାଳ କରୁଛନ୍ତି ବ୍ୟବସାୟୀ । ମୁଜାଫରପୁର ଘଟଣାକୁ ଆଖି ଆଗରେ ରଖି ଫଳ ବ୍ୟବସାୟୀମାନେ ଲିଚୁ ଆମଦାନୀ ଏବଂ  ବିକ୍ରି ଅନିର୍ଦ୍ଧିଷ୍ଟ କାଳ ପାଇଁ ବନ୍ଦ କରିଦେଇଛନ୍ତି  ।