ପରୀକ୍ଷା ଫଳ ଖରାପ ହେବାରୁ ଦୁଇ ପୁଅଙ୍କୁ ବିଷ ଦେଇ ନିଜେ ବିଷ ପିଇଦେଲେ ମାଆ । ବଡପୁଅ ମୃତ, ମାଆ ଏବଂ ସାନପୁଅ ଗୁରୁତର । ଭଦ୍ରକ ବନ୍ତ ବ୍ଲକ ତାଳବାଙ୍କ ଗାଁରେ ଘଟିଛି ଅଘଟଣ । ପର୍ଶୁରାମ ନାୟକଙ୍କ ପୁଅ ଦେବେନ୍ଦ୍ର ଏବର୍ଷ ଯୁକ୍ତ ଦୁଇ ବିଜ୍ଞାନ ପରୀକ୍ଷା ଦେଇଥିଲେ । ସେ ପରୀକ୍ଷାରେ ଫେଲ ହୋଇ ଯାଇଥିଲେ । ଯାହାକୁ ନେଇ ଘରେ ଅଶାନ୍ତି ଦେଖା ଦେଇଥିଲା । ବାପା ବାରମ୍ବାର ଏହି ଘଟଣାକୁ ନେଇ ପୁଅ ଉପରେ ବିରକ୍ତି ପ୍ରକାଶ କରୁଥିବା ଅଭିଯୋଗ ହୋଇଛି । ବୁଧବାର ବାପା ଘରେ ନଥିବା ବେଳେ ମାଆ ତାଙ୍କ ଦୁଇ ପୁଅଙ୍କୁ ବିଷ ଦେଇଥିଲେ । ଏମାନଙ୍କୁ ଗୁରୁତର ଅବସ୍ଥାରେ ଗାଁ ଲୋକେ ଭଦ୍ରକ ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଡାକ୍ତର ବଡ ପୁଅ ଭବାନୀଙ୍କୁ ମୃତ ଘୋଷଣା କରିଥିଲେ । ମାଆ ରୀତାରାଣୀ ଏବଂ ସାନପୁଅ ଦେବେନ୍ଦ୍ରଙ୍କୁ ଗୁରୁତର ଅବସ୍ଥାରେ କଟକ ସ୍ଥାନାନ୍ତର କରାଯାଇଛି ।