ଇସ୍‌ଲାମାବାଦ: ପାକିସ୍ତାନ ପୁଲିସ ଉପରେ ପୁଣି ଥରେ ଆତଙ୍କବାଦୀ ଆକ୍ରମଣ। ମଟରସାଇକେଲ୍‌ ନେଇ ପୁଲିସ ଟ୍ରକ୍‌ ଭିତରେ ପଶିଗଲା ଆତ୍ମଘାତୀ ଆକ୍ରମଣକାରୀ। ଭୟଙ୍କର ବିସ୍ଫୋରଣରେ ୯ ପୁଲିସ କର୍ମୀଙ୍କର ମୃତ୍ୟୁ ହୋଇଛି।ସୋମବାର ଦକ୍ଷିଣପଶ୍ଚିମ ପାକିସ୍ତାନରେ ଏହି ବିସ୍ଫୋରଣ ହୋଇଥିବା ପାକ୍ ପୁଲିସ ପ୍ରବକ୍ତା ସୂଚନା ଦେଇଛନ୍ତି।

ପ୍ରବକ୍ତା ମେହେମୁଦ ଖାନ ନୋତିଜାଇଙ୍କ ସୂଚନା ଅନୁସାରେ, ବଲୋଚିସ୍ତାନ ରାଜ୍ୟର ରାଜଧାନୀ କ୍ୱେଟା ଠାରୁ ୧୬୦ କିମି ଦୂରରେ ଥିବା ସିବ୍ବୀ ସହରରେ ଏହି ବିସ୍ଫୋରଣ ହୋଇଛି। ଏହି ଆକ୍ରମଣରେ ୭ ପୁଲିସକର୍ମୀ ଆହତ ହୋଇଛନ୍ତି ବୋଲି ଚିକିତ୍ସା କରୁଥିବା ହସ୍‌ପିଟାଲ୍‌ ପକ୍ଷରୁ ସୂଚନା ଦିଆଯାଇଛି। ତେବେ ଏହି ଆକ୍ରମଣରେ କୌଣସି ଆତଙ୍କବାଦୀ ସଂଗଠନ ବର୍ତ୍ତମାନ ସୁଧା ନିଜକୁ ଦାୟୀ କରି ନାହାନ୍ତି।  

ସୂଚନା ଥାଉକି ପାକିସ୍ତାନର ବୋଲୋଚିସ୍ତାନ ଗରିଲା ଫାଇଟରମାନେ ଦୀର୍ଘ ଦଶନ୍ଧୀ ଧରି ପାକିସ୍ତାନ ସରକାର ସହ ଲଢ଼େଇ ଜାରି ରଖିଛନ୍ତି। ବଲୋଚିସ୍ତାନର ପ୍ରାକୃତିକ ସମ୍ପଦକୁ ପାକିସ୍ତାନ ସରକାର ଶୋଷଣ କରୁଛନ୍ତି ବୋଲି ସେମାନଙ୍କର ଅଭିଯୋଗ ରହିଛି। ବଲୋଚିସ୍ତାନର ପ୍ରାକୃତିକ ସମ୍ପଦକୁ ଲୁଟ୍ କରି ସେଠାକାର ଲୋକଙ୍କୁ ଅଣଦେଖା କରାଯାଉଛି ବୋଲି ଲୋକେ ଅଭିଯୋଗ କରିଆସୁଛନ୍ତି।   

ଏହା ପୂର୍ବରୁ ୩୧ ଜାନୁଆରୀ ୨୦୨୩ରେ ପାକିସ୍ତାନର ଉତ୍ତରପଶ୍ଚିମାଞ୍ଚଳ ପେଶାୱାର୍‌ ହାଇ ସକ୍ୟୁରିଟି ଜୋନ୍‌ରେ ଥିବା ଏକ ମସ୍‌ଜିଦ୍‌ରେ ଭୟଙ୍କର ବିସ୍ଫୋରଣ ହୋଇଥିଲା। ତାଲିବାନର ଜଣେ ଆତ୍ମଘାତି ଆତଙ୍କବାଦୀ ହେଲ୍‌ମେଟ୍ ପିନ୍ଧି ମ୍‌ସିଜିଦ୍‌ ଭିତରକୁ ପଶିଯାଇ ନିଜକୁ ବିସ୍ଫୋରଣ କରି ଉଡ଼ାଇ ଦେଇଥିଲା। ଏଥିରେ ୧୦୦ ଜଣଙ୍କର ମୃତ୍ୟୁ ହୋଇଥିଲା। ୧୫୦ରୁ ଅଧିକ ଆହତ ହୋଇଥିଲେ। ଏଥିରେ ଅଧିଂକାଶ ପୁଲିସ କର୍ମୀ ଥିଲେ। ପାକିସ୍ତାନ ପୁଲିସ ଉପରେ ରାଗ ସୁଝାଇବାକୁ ଯାଇ ଏହି ଆକ୍ରମଣ କରିଥିଲେ ଆତଙ୍କବାଦୀ। ପାକିସ୍ତାନ ପୁଲିସ ପକ୍ଷରୁ ଏହି ସୂଚନା ଦିଆଯାଇଥିଲା। ତେବେ ଏହି ଦୁର୍ଘଟଣା ପୂରା ଦେଶକୁ ଦୋହଲାଇ ଦେଇଥିଲା।  

ଏହାପରେ ଫେବ୍ରୁଆର ୫ ତାରିଖରେ କ୍ୱେଟା ସହରର ଏଫ୍‌ସି ମୁସା ଚେକ୍‌ପଏଣ୍ଟ ନିକଟରେ ଏହି ବିସ୍ଫୋରଣ ହୋଇଥିଲା। ଏଥିରେ ୫ ଜଣ ଆହତ ହୋଇଥିଲେ। ପୁଣି ଫେବ୍ରୁଆରୀ ୧୭ ତାରିଖରେ ପାକିସ୍ତାନ କରାଚୀ ପୁଲିସ ମୁଖ୍ୟଙ୍କ ଅଫିସ୍‌ରେ ଆତଙ୍କବାଦୀଙ୍କ ଆକ୍ରମଣ କରିଥିଲେ। କରାଚୀର ଶରିଆ ଫୈଜଲରେ ଥିବା ପୁଲିସ ମୁଖ୍ୟଙ୍କ ଅଫିସ୍‌ରେ ୮ ରୁ ୧୦ ଆତଙ୍କବାଦୀ ପଶି ପୁଲିସଙ୍କୁ ବନ୍ଧକ ରଖିଥିଲେ।