ନୂଆଦିଲ୍ଲୀ ୧୩।୦୮: ଜଣେ ସଫଳ ବ୍ୟବସାୟୀଙ୍କ କାହାଣୀ ଲୋକଙ୍କୁ ପ୍ରେରଣା ଦେଇଥାଏ । ସଫଳତାର ଏହି ଯାତ୍ରା ଯେତିକି କଷ୍ଟସାଧ୍ୟ, କାହାଣୀ ମଧ୍ୟ ସେତିକି ପ୍ରେରଣାଦାୟକ । ଏପରି ଜଣେ ପ୍ରେରଣାଦାୟୀ ବ୍ୟକ୍ତିତ୍ବ ମଧ୍ୟ ଭାରତୀୟ ଶିଳ୍ପ ଜଗତରେ ରହିଛନ୍ତି । ତାଙ୍କର ସଫଳତା ଯାତ୍ରା ଏତେ ସହଜ ନଥିଲା ।  ସେ ଥରେ କି ଦୁଇଥର ନୁହେଁ  ବ୍ୟବସାୟରେ ୯ ଥର ହୋଇଥିଲେ ବିଫଳ । ଏମିତିକି ତାଙ୍କୁ ଡିପ୍ରେସନର ସାମ୍ନା ମଧ୍ୟ କରିବାକୁ ପଡିଥିଲା । କିନ୍ତୁ ସେ ହାର ମାନିନଥିଲେ ।  ଆଜି ସେ 1.5 ଲକ୍ଷ କୋଟି ଟଙ୍କାର ଏକ କମ୍ପାନୀ ପରିଚାଳନା କରୁଛନ୍ତି । କେବଳ ଏତିକି ନୁହେଁ ଇଂଲଣ୍ଡର କେମ୍ବ୍ରିଜ୍ ବିଶ୍ୱବିଦ୍ୟାଳୟର ବ୍ୟବସାୟିକ ଛାତ୍ରମାନଙ୍କୁ ସମ୍ବୋଧିତ କରିବା ପାଇଁ ତାଙ୍କୁ ଡକାଯାଇଥିଲା।

ଏବେ ଭାବୁଥିବେ ଆମେ କାହା ବିଷୟରେ କଥା ହେଉଛୁ । ଆମେ ଯେଉଁ ବ୍ୟକ୍ତିଙ୍କ ବିଷୟରେ କହୁଛୁ ସେ ହେଉଛନ୍ତି ବେଦାନ୍ତ ରିସୋର୍ସେସ୍ ଲିମିଟେଡ୍ର ଅଧ୍ୟକ୍ଷ ଅନିଲ ଅଗ୍ରୱାଲ । ପାଟଣାର ଏକ ମାରୱାଡୀ ପରିବାରରେ ଜନ୍ମ ହୋଇଥିଲେ ଅନୀଲ୍ । ପ୍ରଥମରୁ ହିଁ ବଡ ବ୍ୟବସାୟ କରିବାକୁ ସେ ସ୍ବପ୍ନ ଦେଖୁଥିଲେ । ମାତ୍ର ୧୯ ବର୍ଷ ବୟସରେ ଛାଡିଥିଲେ ପିତାଙ୍କ ବ୍ୟବସାୟ । ଆଉ ମୁମ୍ବାଇ ଯାଇ ନିଜ ପାଇଁ ଖୋଜିଥିଲେ ନୂଆ ସୁଯୋଗ ।

ଆଜିକା ସମୟରେ ମାଇନିଙ୍ଗ୍‌ ଟାଇକୁନ୍‌ ଭାବେ ସାରା ଦୁନିଆରେ ଚର୍ଚ୍ଚିତ ଅନୀଲ ଅଗ୍ରଓ୍ବାଲ । ସେ ପ୍ରଥମେ ଆରମ୍ଭ କରିଥିଲେ ‘କବାଡି’ର କାମ । ମାତ୍ର ୨୦ରୁ ୩୦ ବର୍ଷ ବୟସରେ କରିଥିଲେ ବହୁତ ସଂଘର୍ଷ । ସେ ଥରେ କି ୨ ଥର ନୁହେଁ ୯ ଥର ହୋଇଥିଲେ ବିଫଳ । ଆଉ ଏହାପରେ ହିଁ ପାଇଥିଲେ ପ୍ରଥମ ସଫଳତା । ଏହାପରେ ଆଉ ଚାହିଁନଥିଲେ ପଛକୁ । ତିଆରି କରି ଚାଲିଥିଲେ ନୂଆ ନୂଆ ରାସ୍ତା । ଅନିଲ ଅଗ୍ରୱାଲ ନିଜ ଟ୍ୱିଟର ହ୍ୟାଣ୍ଡେଲରେ ବ୍ୟବସାୟ ସମୟରେ ନିଜର କିଛି ଅନୁଭୂତି ବାଣ୍ଟିଛନ୍ତି । ସେ ଲେଖିଛନ୍ତି- ‘ଯେଉଁ ବ୍ୟକ୍ତି କେବେ କଲେଜ ଯାଇ ନାହାଁନ୍ତି, କେମ୍ବ୍ରିଜ୍ ବିଶ୍ୱବିଦ୍ୟାଳୟକୁ ଆମନ୍ତ୍ରିତ ହେବା ଏବଂ ଛାତ୍ରମାନଙ୍କ ସହ କଥାବାର୍ତ୍ତା ହେବା କୌଣସି ସ୍ୱପ୍ନଠାରୁ କମ୍ ନୁହେଁ ।

ସୋସିଆଲ ମିଡିଆରେ ଅନିଲ ଅଗ୍ରୱାଲଙ୍କୁ ଫଲୋଅର୍ସଙ୍କ ସଂଖ୍ୟା କିଛି କମ୍‌ ନୁହେଁ । ଲୋକମାନେ ତାଙ୍କର ପ୍ରେରଣାଦାୟକ ପୋଷ୍ଟକୁ ବହୁତ ପସନ୍ଦ କରନ୍ତି ।  ଟ୍ୱିଟରରେ ତାଙ୍କର ପ୍ରାୟ  ୧.୬୩ଲକ୍ଷ ଅନୁସରଣକାରୀ ଅଛନ୍ତି । ଫୋର୍ବସ୍ ଅନୁଯାୟୀ ତାଙ୍କର ମୋଟ ସମ୍ପତ୍ତି  ୧୬ହଜାର କୋଟି ଟଙ୍କା । ଯଦି ତାଙ୍କ ପରିବାରର ମୋଟ ସମ୍ପତ୍ତିକୁ ଦେଖାଯାଏ, ତେବେ ସେ ୩୨ ହଜାର କୋଟି ଟଙ୍କାର ମାଲିକ ଅଟନ୍ତି ।  ବର୍ତ୍ତମାନ ତାଙ୍କ ବେଦାନ୍ତ ଗ୍ରୁପ୍  ୧ ଲକ୍ଷ ୪୮ ହଜାର ୭୨୯ କୋଟି ଟଙ୍କାରେ ପହଞ୍ଚିଛି।

You Can Read: