ନୂଆଦିଲ୍ଲୀ ୨୨।୦୮: ଦେଶରେ ରହିଛନ୍ତି ଅନେକ ବ୍ୟବସାୟୀ । ଯେତେବେଳେ ଲୋକମାନେ ଅବସର ନେଇ ଘରେ ରେଷ୍ଟ ନେବା କଥା ସେତେବେଳେ ସେ ଆରମ୍ଭ କରିଥିଲେ ନିଜର ବିଜନେସ୍ । ନିଜ ସ୍ବପ୍ନ ପୂରଣ କରିବାକୁ ୫୦ ବର୍ଷରେ ଅଣ୍ଟା ଭିଡିଥିଲେ । ଆଉ ସକ୍ସେସ୍‌ ବି ହୋଇଛନ୍ତି । ଏବେ ବି ୯୦ ବର୍ଷ ବୟସରେ ସେ ଅଫିସ୍ ଯାଆନ୍ତି । ଅନ୍ୟମାନଙ୍କ ପରି ସପ୍ତାହକୁ ୬ ଦିନ ଅଫିସ୍‌ ଯାଆନ୍ତି । ୧୦ଟାରୁ ୫ଟା ଯାଏଁ ଅଫିସ୍‌ରେ ରୁହନ୍ତି ।  ଚ୍ୟାଲେଞ୍ଜକୁ ପାର୍‌ କରି ଛିଡା କରିଛନ୍ତି ଏତେ ବଡ ବ୍ୟବସାୟ ସାମ୍ରାଜ୍ୟ ।  ଏବେ ସେ ଅନ୍ୟମାନଙ୍କ ପାଇଁ ପାଲଟିଛନ୍ତି ପ୍ରେରଣା ।

ଆମେ କହୁଛୁ ଡକ୍ଟର ପ୍ରତାପ ସି ରେଡ୍ଡୀଙ୍କ ବିଷୟରେ ।  ଆପୋଲୋ ହସ୍ପିଟାଲ ଏଣ୍ଟରପ୍ରାଇଜେସର ଏମ୍‌ଡି । ଦେଶର ସବୁଠାରୁ ପ୍ରେରଣାଦାୟକ ବ୍ୟବସାୟୀ । ଏ ନାଁକୁ ସାରା ବିଶ୍ବରେ କିଏ ବା ନଜାଣେ । ପ୍ରତାପ ରେଡ୍ଡୀ ଯେତିକି ପରିଶ୍ରମ କରିଛନ୍ତି କି ଦେଶରେ ତାଙ୍କ ହସ୍ପିଟାଲ୍‌ର ନାଁ ବିଶ୍ବରେ ପରିଚିତ ।  ସେ ବ୍ୟବସାୟ ସେତେବେଳେ ଆରମ୍ଭ କରିଥିଲେ ଯେତେବେଳେ ଅଧିକାଂଶ ଲୋକ ଅବସର ଖୋଜିବା ଆରମ୍ଭ କରନ୍ତି ।

ବ୍ୟବସାୟ ଆରମ୍ଭ କରିବାର ୪୦ ବର୍ଷ ପରେ ବି ଆଜି ବି ସେ ସପ୍ତାହକୁ ୬ ଦିନ ଅଫିସ୍ ଯାଆନ୍ତି । ଆଉ ୯୦ ବର୍ଷ ବୟସରେ ୮ଘଣ୍ଟାରୁ ଅଧିକ ସମୟ ଅଫିସ୍‌ରେ କାମ କରନ୍ତି ।ହୃଦରୋଗ ବିଶେଷଜ୍ଞ ପ୍ରତାପ ସି ରେଡ୍ଡୀ ୧୯୭୦ରେ ଆମେରିକାରୁ ଫେରି ୧୯୮୩ରେ ଆପୋଲୋ ହସ୍ପିଟାଲ ଏଣ୍ଟରପ୍ରାଇଜେସ୍ ପ୍ରତିଷ୍ଠା କରିଥିଲେ ।

 ଷ୍ଟକ୍ ମାର୍କେଟରେ ତାଲିକାଭୁକ୍ତ ଆପୋଲୋ ହସ୍ପିଟାଲରେ ତାଙ୍କ ପରିବାରର ପ୍ରାୟ ୨୮ ପ୍ରତିଶତ ଅଂଶଧନ ଅଛି । ତାଙ୍କର ନିଟ୍ ମୂଲ୍ୟ ୧୮ହଜାର କୋଟିରୁ ଅଧିକ । ପ୍ରତାପ ସି ରେଡ୍ଡୀଙ୍କ ଏହି ସ୍ୱାସ୍ଥ୍ୟ ସେବା ବ୍ୟବସାୟ ଉଦ୍ୟୋଗକୁ ତାଙ୍କର ୪ ଝିଅ- ପ୍ରୀତା ରେଡ୍ଡୀ, ସୁନୀତା ରେଡ୍ଡୀ, ଶୋଭାନା କାମିନେନି ଏବଂ ସଙ୍ଗିତା ରେଡ୍ଡୀ ପରିଚାଳନା କରୁଛନ୍ତି ।

ବର୍ତ୍ତମାନ ସମୟରେ ଆପୋଲୋ ଗ୍ରୁପ୍ ସାରା ଦେଶରେ ୭୨ ଡାକ୍ତରଖାନା, ୫୦୦୦ ଫାର୍ମାସି, ୨୯୧ ପ୍ରାଥମିକ ଚିକିତ୍ସା କ୍ଲିନିକ୍, ଡାଇଗ୍ନୋଷ୍ଟିକ୍ ଚେନ୍ ମାଧ୍ୟମରେ ସେବା ଯୋଗାଉଛି ।