ନୂଆଦିଲ୍ଲୀ: ଭାରତର ଗଣତାନ୍ତ୍ରିକ ସଂରଚନା ଉପରେ ଆକ୍ରମଣ କରାଯାଉଛି। ବିରୋଧୀ ଦଳର ନେତାମାନେ ଏହାକୁ ରକ୍ଷା କରିବାକୁ ଲଢ଼େଇ ଜାରି ରଖିଛନ୍ତି। ବ୍ରିଟେନ୍‌ରେ ପୁଣିଥରେ ଏହି କଥାକୁ ଦୋହରାଇଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। ୟୁକେରେ ଭାରତୀୟ ସାମ୍ବାଦିକ ସଂଘର ସାମ୍ବାଦିକଙ୍କ ସହ ଆଲୋଚନା କଲାବେଳେ ଏଭଳି ପ୍ରତିକ୍ରିୟା ରଖିଛନ୍ତି ରାହୁଲ୍। ଏହା ପୂର୍ବରୁ କେମ୍ବ୍ରିଜ ୟୁନିଭର୍ସିଟିରେ ଛାତ୍ରଛାତ୍ରୀଙ୍କୁ ପଢ଼ାଉଥିବା ବେଳେ ଏପରି କହିଥିଲେ ରାହୁଲ୍।  

ତେବେ ଏଥର ସାମ୍ବାଦିକଙ୍କ ସହ ଆଲୋଚନା ବେଳେ ରାହୁଲ କହିଛନ୍ତି “ଆମ ଦେଶର ଗଣତନ୍ତ୍ର ସଂରଚନା ଉପରେ ଆକ୍ରମଣ କରାଯାଉଥିବାରୁ ଭାରତ ଯୋଡ଼ ଯାତ୍ରାର ଆବଶ୍ୟକତା ପଡିଲା। ଗଣମାଧ୍ୟମ, ସଂସ୍ଥାଗତ ଢାଞ୍ଚା, ନ୍ୟାୟପାଳିକା ଏବଂ ସଂସଦ ଉପରେ ବି ଆକ୍ରମଣ କରାଯାଉଛି। ଆଉ ସାଧାରଣ ଚ୍ୟାନେଲ୍‌ ମାଧ୍ୟମରେ ଆମେ ଆମ କଥା ଓ ଲୋକଙ୍କ କଥା ପହଞ୍ଚାଇବାର ସମସ୍ୟାର ସାମ୍ନା କଲୁ। ଆଧୁନିକ ଭାରତରେ ପୂର୍ବରୁ ଏଭଳି ଦୃଶ୍ୟ କେବେ ବି ଦେଖିବାକୁ ମିଳି ନଥିଲା।”

ସେହିପରି ୨୦୨୪ ନିର୍ବାଚନକୁ ନେଇ ଗାନ୍ଧୀ କହିଥିଲେ ” ସବୁ ଜିନିଷ କଳାଧଳା ହୋଇ ନଥାଏ। ଧାରଣ, ବିରୋଧ ଆଦି ବିଜେପି ବିରୋଧରେ ଲୋକଙ୍କର ଆକ୍ରୋଶ ରହିଛି। ଭାରତ ଯୋଡ଼ୋ ଯାତ୍ରାରେ ଏହା ଦେଖିବାକୁ ମିଳିଥିଲା। ଆପଣ କିନ୍ତୁ ଗଣମାଧ୍ୟମରେ ଏହା ଦେଖିବାକୁ ପାଇ ନଥିବେ। “

ସେହିପରି ବିଜେପି ବିରୋରେ ବିରୋଧୀଙ୍କ ମେଣ୍ଟ କରିବେ କି ନାହିଁ ସେ ପ୍ରଶ୍ନରେ ରାହୁଲ କହିଛନ୍ତି ବିରୋଧୀ ଦଳଙ୍କ ମଧ୍ୟରେ ସହଯୋଗ ରହିଛି। ଏନେଇ ଦଳଗୁଡ଼ିକ ମଧ୍ୟରେ ଆଲୋଚନା ହେଉଛ। ବିଜେପି ଓ ଆର୍‌ଏସ୍‌ଏସ୍‌କୁ ହରାଇବା ମୁଖ୍ୟ ଲକ୍ଷ ବୋଲି ରାହୁଲ କହିଛନ୍ତି।  

ସେହିପରି ଜର୍ଜ ସୋରୋସଙ୍କୁ ନେଇ ରାହୁଲ କହିଛନ୍ତି ଯେ ସୋରୋସଙ୍କର ନିଜସ୍ୱ ଦୃଷ୍ଟିଭଙ୍ଗି ଥାଇପାରେ। ତାଙ୍କ ଆଭିମୁଖ୍ୟ ବିଷୟରେ ଜାଣିବାକୁ ମୋର ଇଚ୍ଛା ନାହିଁ। ହେଲେ ମୁଁ ଯାହା ଆଖିରେ ଦେଖିଛି ତା ଉପରେ ବିଶ୍ୱାସ କରିବି। ଗୌତମ ଆଦାନୀ ଧନୀ ତାଲିକାରେ ୬୦୯ ତମ ସ୍ଥାନରୁ ଉଠି ହଠାତ୍ ଦ୍ୱିତୀୟ ସ୍ଥାନରେ ପହଞ୍ଚି ଯାଇଥିଲେ। ଗତ ୩ ବର୍ଷରେ ଏମିତି ହୋଇଥିଲା। ଏଥିରେ ସୋରସଙ୍କ କଥାର ଆମକୁ ଆବଶ୍ୟକ ନାହିଁ ବୋଲି ରାହୁଲ କହିଛନ୍ତି।