ଭୋପାଲ: ମଧ୍ୟପ୍ରଦେଶ ମୁରୈନା ଜିଲ୍ଲାରେ ଅଘଟଣ।  ଚମ୍ବଲ ନଦୀରେ ୧୭ଜଣ ଶ୍ରଦ୍ଧାଳୁ ଭାସିଯାଇଥିବା ସୂଚନା ମିଳିଛି । ଏମାନଙ୍କ ମଧ୍ୟରୁ ୮ଜଣ ସୁରକ୍ଷିତ ଉଦ୍ଧାର ହୋଇଥିବା ବେଳେ ୩ଜଣଙ୍କ ମୃତ୍ୟୁ ହୋଇଛି । ୪ଜଣ ଏବେବି ନିଖୋଜ ରହିଛନ୍ତି । ସ୍ଥାନୀୟ ପୋଲିସ ଓ ଅଗ୍ନିଶମ ବାହୀନି ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି ।

ସୂଚନା ଅନୁଯାୟୀ, ମୁରୈନା ଜିଲ୍ଲାର ଟେଣ୍ଟରା ଥାନା ରାୟଡି-ରୋଧନ ଘାଟରେ ଏହି ଦୁର୍ଘଟଣା ଘଟିଛି। ଚମ୍ବଲ ନଦୀ ପାର୍ ହୋଇଥିବା ବେଳେ ପାଣିର ପ୍ରଖର ସ୍ରୋତରେ କୁଶଓ୍ବାହ ସମ୍ପ୍ରଦାୟର ୧୭ଜଣ ଭାସିଯାଇଥିଲେ । ଏମାନଙ୍କ ମଧ୍ୟରୁ ୮ଜଣ ପହଁରି ପହଁରି କୂଳରେ ଲାଗିଥିଲେ ଏବଂ ୭ ପାଣିରେ ବୁଡ଼ିଯାଇଥିଲେ । ସ୍ଥାନୀୟ ଲୋକ ତୁରନ୍ତ ନିକଟସ୍ଥ ଥାନାକୁ ଜଣାଇଥଲେ । ପୋଲିସ, ଜିଲ୍ଲା ପ୍ରଶାସନ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ରେସକ୍ୟୁ କାର୍ଯ୍ୟ ଆରମ୍ଭ କରିଥିଲେ । ୨ ଘଣ୍ଟାର କଠିନ ପରିଶ୍ରମ ପରେ ଜଣେ ମହିଳାଙ୍କ ସମେତ ୩ଜଣଙ୍କୁ ମୃତଦେହ ପାଣିରୁ ଉଦ୍ଧାର କରାଯାଇଛି । ଏବେବି ୪ଜଣ ନିଖୋଜ ରହିଛନ୍ତି, ଅଗ୍ନିଶମ ବାହୀନି ତନତନ କରି ଖୋଜୁଛି ।