ନୂଆଦିଲ୍ଲୀ: ହିଣ୍ଡେନବର୍ଗ ରିସର୍ଚ୍ଚ ରିପୋର୍ଟ ପରେ ଆଦାନୀ ଗ୍ରୁପରେ ତୁଫାନ ଆସିଛି । କ୍ରମାଗତ ସେୟାର ହ୍ରାସ ପାଇବାରେ ଲାଗିଛି । କମ୍ପାନୀ ପକ୍ଷରୁ ସଫେଇ ଦିଆଯାଇଥିଲେ ମଧ୍ୟ ସୋମବାର ମଧ୍ୟ ଡଲାର ବଣ୍ଡ୍ ଖସିଛି । ଗତ ୩ଦିନ ମଧ୍ୟରେ ନିବେଶକଙ୍କ ସେୟାର ପ୍ରାୟ ୫୮ ହଜାର କୋଟି ଟଙ୍କା ବୁଡ଼ିଯାଇଛି।

ଗୌତମ ଆଦାନୀ କମ୍ପାନୀ ସମୂହ ପକ୍ଷରୁ ବାରମ୍ବାର ସଫେଇ ଦିଆଯାଉଥିଲେ ମଧ୍ୟ ଏହା ଉପରେ କୌଣସି ପ୍ରଭାବ ପଡ଼ୁନାହିଁ । ସୂଚନା ଅନୁଯାୟୀ, ହିଣ୍ଡେନବର୍ଗ ରିପୋର୍ଟ ପ୍ରକାଶ ପରେ ରବିବାର ଏହାର ଜବାବ ଦେଇଥିଲା କମ୍ପାନୀ । ଆଗାନୀ ଗ୍ରୁପ ୪୧୩ ପୃଷ୍ଠାର ପ୍ରତିକ୍ରିୟା ଜାରି କରିଥିଲା । କମ୍ପାନୀ କର୍ତ୍ତୃପକ୍ଷ ଏହାକୁ ଦେଶ ଉପରେ ଆକ୍ରମଣ ବୋଲି କହିଥିଲେ । ହେଲେ ହିଣ୍ଡେନବର୍ଗ ନିଜ ରିପୋର୍ଟକୁ ସଠିକ୍ କହିବା  ସହିତ ଆଦାନୀ କମ୍ପାନୀ ସମୂହ ରାଷ୍ଟ୍ରବାଦ ନାଁରେ ଦେଶକୁ ଲୁଟୁଛି ଏବଂ ଏହି ଜାଲିଆତିରୁ ବର୍ତ୍ତି ପାରିବ ନାହିଁ ବୋଲି କହିଛନ୍ତି ।   

ଅନ୍ୟପଟେ ସ୍ମାର୍ଟକର୍ମାର ବିଶ୍ଳେଷକ ବ୍ରାଏନ ଫ୍ରିଟାସ୍‌ଙ୍କ କହିବା ଅନୁଯାୟୀ, ଆଦାନୀ ଗ୍ରୁପର ପକ୍ଷରୁ ଦିଆଯାଇଥିବା ସଫେଇ ନିବେଶକଙ୍କ ଚିନ୍ତା ଦୂର କରିବା ପାଇଁ ପର୍ଯ୍ୟାପ୍ତ ନୁହେଁ ବୋଲି କହିଛନ୍ତି । ଗତ ମଙ୍ଗଳବାର ସେୟାର ବଜାର କାରବାର ବନ୍ଦ ହେବା ପରେ  ଆଦାନୀ ଟ୍ରାନ୍ସମିସନର ସେୟାର ୪୧.୬୬ ପ୍ରତିଶତ ହ୍ରାସ ପାଇଥିଲା । ସେହିପରି ଆଦାନୀ  ଟୋଟଲ୍ ଗ୍ୟାସ୍‌ରେ ୩୯.୫୭ ପ୍ରତିଶତ, ଆଦାନୀ ଗ୍ରୀନ ଏଜେନ୍ସି ୩୭.୫୫ ପ୍ରତିଶତ ଏବଂ ଆଦାନୀ ପୋର୍ଟ୍ସରେ ୨୩.୭୫ ପ୍ରତିଶତ ସେୟାର ପ୍ରଭାବିତ ହୋଇଛି ।

ଆଦାନୀ ସମୂହ କମ୍ପାନୀଙ୍କ ଋଣ ଓ ନିବେଶ କାରଣରୁ ବ୍ୟାଙ୍କ ସେୟାର ଓ ଜୀବନ ବୀମା ନିଗମର ସେୟାର ମଧ୍ୟ କ୍ରମାଗତ ହ୍ରାସ ପାଇବାରେ ଲାଗିଛି । ତିନି ଦିନ ଭିତରେ ବ୍ୟାଙ୍କ ଅଫ୍ ବରୋଦାର ସେୟାର ୧୩ ପ୍ରତିଶତ, ଏସବିଆଇର ୧୦.୭୭ ପ୍ରତିଶତ ଏବଂ ଏଲଆଇସିର ୮.୯୦ ପ୍ରତିଶତ ସେୟାର ହ୍ରାସ ପାଇଛି ।