ନୂଆଦିଲ୍ଲୀ: ଆମେରିକାରେ ପ୍ରକୃତିର କୋପ । ଦକ୍ଷିଣ ସମତଳ ଅଞ୍ଚଳରେ ତାଣ୍ଡବ ରଚିଲା ଘୂର୍ଣ୍ଣିଝଡ଼ । ଟେକ୍ସାସ, ଓକଲାହୋମା, ଆର୍କାନସସ୍, ଇଲିନୟ, ମିସୋରୀ, ଟେନିସି ଓ କେଣ୍ଟକୀ ପ୍ରଦେଶରେ ଭୀଷଣ ଘୂର୍ଣ୍ଣିଝଡ଼ ଛାରଖାର କରିଛି । ପ୍ରବଳ ପବନ, ବର୍ଷା ଓ କୁଆପଥର ମାଡ଼ରେ ୨୨ଜଣଙ୍କ ମୃତ୍ୟୁ ହୋଇଛି । ସେହିପରି ଶତାଧିକ ଲୋକ ଆହତ ହୋଇଛନ୍ତି । ଏହି ଭୀଷଣ ଘୂର୍ଣ୍ଣିଝଡ଼ରେ ୧୦ କୋଟି ଲୋକ ପ୍ରଭାବିତ ହୋଇଛନ୍ତି । ୨୦୦ରୁ ଅଧିକ ଘର ଭାଙ୍ଗି ଯାଇଥିଲା ବେଳେ ବିଦ୍ୟୁତ୍ ସଂଯୋଗ ଓ ଗ୍ୟାସ୍ ଲାଇନ କ୍ଷତିଗ୍ରସ୍ତ ହୋଇଛି । କେତେକ ଇନ୍ଧନ ଷ୍ଟେସନ ମଧ୍ୟ ବ୍ୟାପକ ଭାବେ ନଷ୍ଟ ହୋଇଯାଇଛି ।
ଇଲିନୟ, କେଣ୍ଟକୀ, ମିସୋରୀ ଓ ଟେନିସି ସହର ସର୍ବାଧିକ କ୍ଷତିଗ୍ରସ୍ତ ହୋଇଛି । ଏଠାରେ ବେସ୍ ବଲ୍ ଆକାରରେ କୁଆପଥର ମାଡ଼ ହୋଇଥିଲା । ଘଣ୍ଟା ପ୍ରତି ୧୩୫ ରୁ ୧୬୫ କିମି. ବେଗରେ ପବନ ବହିଥିଲା । ଯାହାଫଳରେ ବ୍ୟାପକ କ୍ଷୟକ୍ଷତି ଘଟିଛି । ଲୋକମାନେ ଭୟଭୀତ ଅବସ୍ଥାରେ ରହିଛନ୍ତି । ଘଟଣା ସମ୍ପର୍କରେ ପଚାରି ବୁଜିଛନ୍ତି ରାଷ୍ଟ୍ରପତି ଜୋ ବାଇଡେନ । ପରିସ୍ଥିତି ଉପରେ ନଜର ରଖିବା ସହ ରିଲିଫ ଓ ଉଦ୍ଧାରକାରୀ ଦଳକୁ ପ୍ରଭାବିତ ଅଞ୍ଚଳକୁ ପଠାଇଛନ୍ତି ।
କେଣ୍ଟକୀ ପ୍ରଦେଶର ଗଭର୍ଣ୍ଣର ଏଣ୍ଡି ବେଶିୟର ସୋମବାର ରାଜ୍ୟରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି । ସୋମବାର ଝଡ଼ ତୁଫାନ ନେଇ ଆମେରିକାର ଜାତୀୟ ପାଣିପାଗ କେନ୍ଦ୍ର ସତର୍କ ଚେତାବନୀ ଦେଇଥିଲା । ଆଟଲାଣ୍ଟା କ୍ଷେତ୍ର ଏବଂ ଜର୍ଜିଆର ଅନ୍ୟ ଅଞ୍ଚଳରେ ଏବଂ ଦଣିକକ୍ଷ-ପଶ୍ଚିମ କ୍ଷେତ୍ରରେ ଭୀଷଣ ଘୂର୍ଣ୍ଣିଝଡ଼ ଆସିଥିଲା । ଗଭର୍ଣ୍ଣର ଏଣ୍ଡି ବେଶିୟର ସୋସିଆଲ୍ ମିଡିଆ ଏକ୍ସରେ ପୋଷ୍ଟ କରି କହିଛନ୍ତି, କେଣ୍ଟକୀ ପ୍ରଦେଶବାସୀଙ୍କ ପାଇଁ ଗୋଟିଏ ରାତି କଠନ ଥିଲା । ଏହି ବିନାଶକାରୀ ଝଡ଼ତୁଫାନ ପୂରା ରାଜ୍ୟକୁ ପ୍ରଭାବିତ କରିଛି । ପ୍ରାଶାସନିକ ଅଧିକାରୀଙ୍କ କହିବା ଅନୁଯାୟୀ, ଘୂର୍ଣ୍ଣଝଡ଼ ଶହେରୁ ଅଧିକ ଜାତୀୟ ରାଜପଥକୁ ନଷ୍ଟ କରିଛି ।