ମୁମ୍ବାଇ ୧।୨: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବୁଧବାର ସଂସଦରେ ୨୦୨୩-୨୪ ଆର୍ଥିକ ବର୍ଷ ନିମନ୍ତେ ବଜେଟ୍ ଉପସ୍ଥାପନ କରିଛନ୍ତି। ସଂସଦରେ ବଜେଟ୍ ଉପସ୍ଥାପନ ସହ ସେୟାର ବଜାରରେ ବେଶ୍ ଉତ୍ସାହ ଦେଖାଯାଇଥିଲା। ତେବେ ଏହି ଉତ୍ସାହ ବେଶି ସମୟ ପର୍ଯ୍ୟନ୍ତ ସ୍ଥାୟୀ ହୋଇ ପାରି ନାହିଁ। ସଂସଦରେ ବଜେଟ୍ ଉପସ୍ଥାପନ ପରେ ସେନସେକ୍ସ ଉଚ୍ଚତମ ସ୍ତର ୬୦୭୭୩କୁ ଛୁଇଁଥିଲା। ତେବେ ପରବର୍ତ୍ତି ବ୍ୟବସାୟ କାଳରେ ୧୦୬୫ ପଏଣ୍ଟ ହ୍ରାସ ହୋଇ ବନ୍ଦ ହେବା ବେଳକୁ ୫୯,୭୦୮ ସ୍ତରରେ ପହଞ୍ଚିଥିଲା।    

ତେବେ ମଙ୍ଗଳବାରର କ୍ଲୋଜିଂ ଲେବୁଲରୁ ସେନସେକ୍ସ ୧୫୮ ପଏଣ୍ଟ ଅଭିବୃଦ୍ଧି ହାସଲ କରିବାରେ ସଫଳ ହୋଇଛି। ସେହିପରି ନିଫ୍ଟି ୧୭୯୭୨ପଏଣ୍ଟରୁ ହ୍ରାସ ହୋଇ ୧୭୬୧୬ରେ ବନ୍ଦ ହୋଇଛି। ପୂର୍ବାହ୍ନରେ ନିଫ୍ଟି ୧୭୮୧୧ ପଏଣ୍ଟରେ ଖୋଲିଥିଲା। ତେବେ ଦିନର ବ୍ୟବସାୟ କାଳରେ ହାସଲ କରିଥିବା ଉଚ୍ଚତମ ସ୍ତରରୁ ୬୫୩ ପଏଣ୍ଟ ହ୍ରାସ ହୋଇ ୪୫ ପଏଣ୍ଟ ତଳେ ବନ୍ଦ ହୋଇଛି। ସେନସେକ୍ସରେ ବଜାଜ ଫିନସର୍ଭରେ ସର୍ବାଧିକ ୫.୪୫ ପ୍ରତିଶତ ହ୍ରାସ ଦେଖାଯାଇଛି।

ଏହା ଛଡା ଭାରତୀୟ ଷ୍ଟେଟ୍‌ ବ୍ୟାଙ୍କ ସେୟାର ମୂଲ୍ୟରେ ୪.୮୦ ପ୍ରତିଶତ ହ୍ରାସ ହୋଇଥିବା ବେଳେ ବଜେଟ ଘୋଷଣା ପରେ ସବୁଠୁ ଅଧିକ ହ୍ରାସ ହୋଇଥିବା ସେୟାର ମଧ୍ୟରେ ଇଣ୍ଡସଣ୍ଡ ବ୍ୟାଙ୍କ, ମହିନ୍ଦ୍ରା ଏଣ୍ଡ ମହିନ୍ଦ୍ରା, ସନଫାର୍ମା, ଏକ୍ସିସ୍ ବ୍ୟାଙ୍କ, ମାରୁତି, ଟାଇଟନ, ଟାଟା ମୋଟର୍ସ, ବଜାଜ ଫାଇନାନ୍ସ, ଏନଟିପିସି, ରିଲାଏନ୍ସ, ଏୟାରଟେଲ ଓ ହିନ୍ଦୁସ୍ତାନ ୟୁନିଲିଭରର ସେୟାର ରହିଛନ୍ତି। ତେବେ ଆଇଟିସି, ଟାଟା ଷ୍ଟିଲ, ଆଇସିଆଇସିଆଇ ବ୍ୟାଙ୍କ, ଟିସିଏସ୍, ଏଚଡିଏଫସି ବ୍ୟାଙ୍କ, କୋଟକ ବ୍ୟାଙ୍କ, ୱିପ୍ରୋ, ଏଲଏଣ୍ଡଟି ଓ ଇନଫୋସିସ୍ ଆଦି ସବୁଜ ସଂକେତରେ ବନ୍ଦ ହୋଇଛନ୍ତି।