⭐ଗୁଜୁରାଟ ରାଜନୀତିରେ ହୋଇପାରେ ବଡ଼ ସମୀକରଣ!
⭐ଗୁଜୁରାଟ ବିଜେପିରେ ବିଲିନ ହେବକି ଗୁଜୁରାଟ କଂଗ୍ରେସ?
ଭଡ଼ଦୋରା ୦୭/୦୮: ଦିଲ୍ଲୀର ମୁଖ୍ୟମନ୍ତ୍ରୀ ତଥା ଆମ୍ ଆଦ୍ମି ପାର୍ଟି (ଆପ)ର ମୁଖ୍ୟ ଅରବିନ୍ଦ କେଜରିୱାଲ ଗୁଜରାଟ ବିଧାନସଭା ନିର୍ବାଚନ ପାଇଁ ଜୋରଦାର ପ୍ରସ୍ତୁତି ଚଳାଇଛନ୍ତି। ଏହା ମଧ୍ୟରେ ସେ ଗୁଜରାଟର ରାଜ୍ୟ ବିଜେପି ଓ କଂଗ୍ରେସକୁ ଟାର୍ଗେଟ କରିଛନ୍ତି। ସେ କହିଛନ୍ତି ଖୁବଶୀଘ୍ର ଗୁଜରାଟରେ କଂଗ୍ରେସ ବିଜେପିରେ ବିଲିନ ହୋଇଯିବ।
ସାମ୍ୱାଦିକମାନଙ୍କ ସହିତ କଥାହେବା ସମୟରେ ଅରବିନ୍ଦ କେଜରିୱାଲ କହିଛନ୍ତି ''ଗୁଜରାଟରେ ବିଜେପି ଓ ଆପ୍ ମଧ୍ୟରେ ନିର୍ବାଚନରେ ଲଢ଼େଇ ହେବ। ଗୁଜରାଟ ବିଜେପିରେ ଗୁଜରାଟ କଂଗ୍ରେସ ବିଲିନ ହେବାକୁ ଯାଉଛି। ବିଜେପି ଓ କଂଗ୍ରେସ ମଧ୍ୟରେ ତୁତୁ-ମେମେ ସରିବାକୁ ଯାଉଛି। ଗୋଟିଏ ପଟେ ବିଜେପିର ୨୭ ବର୍ଷର ଖରାପ ଶାସନ ଓ ଅନ୍ୟ ପଟେ ଆପ୍ର ନୂଆ ରାଜନୀତି ରହିଛି''।
ଆଗାମି ଗୁଜରାଟ ବିଧାନସଭା ନିର୍ବାଚନକୁ ଆଖିଆଗରେ ରଖି କେଜରିୱାଲ ରାଜ୍ୟରେ ସ୍ୱାସ୍ଥ୍ୟ ସେବାରେ ସୁଧାର ଓ ମାଗଣା ବିଜୁଳି ଯୋଗାଇବାର ପ୍ରତିଶୃତି ଦେଇଛନ୍ତି। କେଜରିୱାଲ ଦାବିକରି କହିଛନ୍ତି ପଞ୍ଜାବରେ ୨୫ ଲକ୍ଷ ଲୋକଙ୍କ ଘର ବିଜୁଳି ଖର୍ଚ୍ଚ ୦ (ଶୂନ) ଆସିଛି ଓ ଦିଲ୍ଲୀରେ ଅନେକ ଲୋକଙ୍କୁ ଏହି ସୁବିଧା ମିଳୁଛି। ମାଗଣା ବିଜୁଳି ଆମର ପ୍ରଥମ ପ୍ରତିଶୃତି। ଗୁଜରାଟରେ ବିଜୁଳି ଖର୍ଚ୍ଚକୁ ନେଇ ଲୋକମାନେ ଦୁଃଖିତ ଅଛନ୍ତି।
