ନୂଆଦିଲ୍ଲୀ: ଚୀନର ଗୁଇନ୍ଦା ଜାହାଜକୁ ନେଇ ଭାରତର ବିରୋଧ କାମ କରିଛି । ଶ୍ରୀଲଙ୍କା ସରକାର ଭାରତର ଚାପ ପରେ ଚୀନକୁ ନିଜର ଗୁପ୍ତଚର ଜାହାଜ ୟୁଆନ ୱାଙ୍ଗ ୫କୁ ଆଗକୁ ନ ବଢାଇବାକୁ କହିଛି । ଏହି ଜାହାଜ ଅଗଷ୍ଟ ୧୧ରେ ଶ୍ରୀଲଙ୍ଗାର ହମନଟୋଟା ବନ୍ଦରରେ ପହଞ୍ଚିଥାନ୍ତା । ସେଠାରେ ୬ ଦିନ ରହିବା ପରେ ଏହି ଗୁଇନ୍ଦା ଜାହାଜ ଶ୍ରୀଲଙ୍କାରୁ ଅଜଣା ସ୍ଥାନକୁ ଯାତ୍ରା କରିବ ବୋଲି ଖବର ଥିଲା ।
ଚୀନର ଏହି ଜାହାଜ ଶ୍ରୀଲଙ୍କାରେ ପହଞ୍ଚିବା ଭାରତର ସୁରକ୍ଷାକୁ ବଡ଼ ବିପଦ ବୋଲି କୁହାଯାଉଥିଲା । ଏହାପରେ ଭାରତୀୟ ଅଧିକାରୀମାନେ ଶ୍ରୀଲଙ୍କା ଆଗରେ ଏହି ଜାହାଜର ଆଗମନକୁ ନେଇ ବିରୋଧ କରିଥିଲେ । ଆରମ୍ଭରେ ଶ୍ରୀଲଙ୍କା ଭାରତର ଏହି ଅନୁରୋଧ ଉପରେ ଧ୍ୟାନ ଦେଇ ନଥିଲା, କିନ୍ତୁ ଚାପ ବଢିବା ପରେ ଚୀନକୁ ଚିଠି ଲେଖି ଜାହାଜକୁ ଆଗକୁ ନବଢାଇବା ପାଇଁ ଅନୁରୋଧ କରିଛି ।
ୟୁଆନ ୱାଙ୍ଗ ୫ ଚୀନର ଅତ୍ୟନ୍ତ ଶକ୍ତିଶାଳୀ ଗୁଇନ୍ଦା ଜାହାଜ । ଏହା ସ୍ପେସ ଏବଂ ସାଟେଲାଇଟ ଟ୍ରାକିଂ ସହ ଇଣ୍ଟରକଣ୍ଟିନେଣ୍ଟାଲ ବାଲେଷ୍ଟିକ ମିଶାଇଲ ଲଞ୍ଚର ମଧ୍ୟ ସନ୍ଧାନ କରିପାରିବ । ଏହା ୟୁଆନ ୱାଙ୍ଗ ସିରିଜର ତୃତୀୟ ପିଢିର ଟ୍ରାକିଂ ଜାହାଜ । ୨୦୦୭ ସେପ୍ଟେମ୍ୱର ୨୭ରେ ଏହାକୁ ସେବାରେ ସାମିଲ କରାଯାଇଥିଲା । ଏହି ଜାହାଜରେ ଅତ୍ୟନ୍ତ ଶକ୍ତିଶାଳୀ ଆଣ୍ଟିନା ଲାଗିଛି, ଯାହା ଦୀର୍ଘ ଦୂର ଯାଏଁ ନଜର ରଖିବାରେ ଏହାକୁ ସହାୟତା କରିଥାଏ । ଆରବ ସାଗରରେ ଗୁଇନ୍ଦାଗିରି କରିବା ଭାରତ ଏବଂ ଆମେରିକାର ଚିନ୍ତା ବଢାଇପାରେ। ଭାରତ ମହାସାଗରରେ ହିଁ ଆମେରିକାର ନୌସେନା ଶିବିର ଡିୟୋଗା ଗାର୍ସିଆ ରହିଛି।
