ନୂଆଦିଲ୍ଲୀ ୨୦।୦୭; ୟୁପିର ଗାଜିୟାବାଦରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି । କାଉଡିଆଙ୍କୁ ଚାପି ଦେଲା ଦ୍ରୁତଗାମୀ ଆମ୍ବୁଲାନ୍ସ । ଏହି ଦୁର୍ଘଟଣାରେ ୨ ଜଣଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ୩ ଜଣ ଗମ୍ଭୀର ଭାବରେ ଆହତ ହୋଇଛନ୍ତି । ଯେଉଁ ହସ୍ପିଟାଲର ଆମ୍ବୁଲାନ୍ସ ଦୁର୍ଘଟଣା ଘଟାଇଛି ତାହା ମୋଦିନଗରର ବିଜେପି ବିଧାୟକ ମଞ୍ଜୁ ସିୱାଚଙ୍କ ସ୍ୱାମୀଙ୍କର ବୋଲି ସୂଚନା ମିଳିଛି ।
ସୂଚନାନୁଯାୟୀ, ଦିଲ୍ଲୀ-ମରାଠୀ ନିକଟସ୍ଥ କାଦରାବାଦରେ ଦୁର୍ଘଟଣା ଘଟିଥିଲା । ପାଣି ଆଣିବାକୁ ୫ ଜଣ ହରିଦ୍ବାର ଯାଉଥିବା ସମୟରେ ଏପରି ଅଘଟଣ ଘଟିଥିଲା । ସ୍କୁଟି ଏବଂ ବାଇକରେ ଯାଉଥିବା ୨ ଜଣ କାଉଡିଆଙ୍କୁ ଆମ୍ବୁଲାନ୍ସ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ୨ଜଣଙ୍କର ମୃତ୍ୟୁ ଘଟିଥିଲା । ଏଥି ସମତେ ଆମ୍ବୁଲାନ୍ସ ଧକ୍କାରେ ଅନ୍ୟ ୩ଜଣ ମଧ୍ୟ ଆହତ ହୋଇଥିଲେ । ସୂଚନା ପାଇବା ମାତ୍ରେ ଘଟଣାସ୍ଥଳରେ ପୋଲିସ ପହଞ୍ଚିଥିଲା । ଚିକିତ୍ସା ପାଇଁ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ଏପର୍ଯ୍ୟନ୍ତ ମୃତକଙ୍କ ପରିଚୟ ମିଳିପାରିନାହିଁ ।
ଅନ୍ୟପଟେ ପୋଲିସ୍ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା। ଏହା ସହିତ ଆମ୍ବୁଲାନ୍ସକୁ ମଧ୍ୟ ନିଜ ହେପାଜତକୁ ନେଇଥିଲା । ଦୁର୍ଘଟଣା ଘଟାଇଥିବା ଆମ୍ବୁଲାନ୍ସଟି ଜୀବନ ହସ୍ପିଟାଲର ମୋଦିନଗରର ବିଜେପି ବିଧାୟକ ଡକ୍ଟର ମଞ୍ଜୁ ସିୱାଚଙ୍କ ସ୍ୱାମୀ ଦେବେନ୍ଦ୍ର ସିୱାଚଙ୍କର ବୋଲି ଜଣାପଡିଛି । ଏସିପି ମୋଦିନଗର ଜ୍ଞାନ ପ୍ରକାଶ ରାୟ ଏବଂ ପୋଲିସ ଷ୍ଟେସନ ଇନଚାର୍ଜ ମୋଦିନଗର ନରେଶ ଶର୍ମା ପୋଲିସ ଫୋର୍ସ ସହିତ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ।
