ମୁମ୍ଵାଇ ୨୩।୦୯: ଦୀର୍ଘ ଦିନର ଡେଟିଂ ପରେ ୨ ମାସ ତଳେ ଅଶେଷ ସଜନାନିଙ୍କୁ ବିବାହ କରିଛନ୍ତି ଅଭିନେତ୍ରୀ ସୋନାଲି ସେଗଲ ।  ବ୍ୟକ୍ତିଗତ ଜୀବନର ସବୁଠୁ ବଡ଼ ସେଲିବ୍ରେସନ୍‌ ପରେ ବୃତ୍ତିଗତ ଜୀବନକୁ ନେଇ ତାଙ୍କର ସେଲିବ୍ରେସନ୍‌ର ସମୟ  ଆସିଛି । ତାଜା ଖବର, ଜିଓ ଷ୍ଟୁଡିଓ ସହିତ ସେ ୩ ଫିଲ୍ମରେ କାମ କରିବାକୁ ଚୁକ୍ତି କରିଛନ୍ତି । ପ୍ରତ୍ୟେକ ଫିଲ୍ମର  କାହାଣୀ ଓ ତାଙ୍କ ଚରିତ୍ର ଭିନ୍ନ ହେବ । ସବୁ ପ୍ରୋଜେକ୍ଟ ମଜାଦାର ବୋଲି ଶୁଣିବାକୁ ମିଳୁଛି ।

ଫିଲ୍ମ ‘ପ୍ୟାର୍‌ କା  ପଞ୍ଚନାମା’ ଓ ‘ହୈ ମମ୍ମି’ ଭଳି ଫିଲ୍ମରେ ଅଭିନୟ ଲାଗି ସୋନାଲି ଖାସ୍‌ ପରିଚିତି ପାଇଛନ୍ତି । ସେ ସାଇନ୍‌ କରିଥିବା ୩ ଫିଲ୍ମ ମଧ୍ୟରେ ପ୍ରଥମଟି ରୋମାଣ୍ଟିକ୍‌ ହରର୍‌ ଫିଲ୍ମ ‘ଅସେକ୍‌’ ଯାହା ଗତ ଜୁନ୍‌ ମାସରେ  ମୁକ୍ତିଲାଭ କରିଥିଲା । ଏଥିରେ ସେ ବର୍ଦ୍ଧନ ପୁରୀଙ୍କ ଅପୋଜିଟ୍‌ରେ ନଜର ଆସିଥିଲେ । ବିବାହ ପରେ ଏଇଟି  ସୋନାଲିଙ୍କର ପ୍ରଥମ ମୁକ୍ତିପ୍ରାପ୍ତ ଫିଲ୍ମ ଥିଲା । ଫିଲ୍ମର ପ୍ରମୋସନ୍‌ ପାଇଁ ସେ ନିଜ ହନିମୁନ୍‌ ଯୋଜନା ବାତିଲ  କରିଥିଲେ।

ହାତରେ ଥିବା ଆଉ ଦୁଇ ଫିଲ୍ମ ମଧ୍ୟରେ ଗୋଟିଏ କମେଡି ଓ ଅନ୍ୟଟି ରୋମାଣ୍ଟିକ୍‌ କମେଡି । ଚଳିତ  ବର୍ଷ ଦୁଇଟିଯାକ ମୁକ୍ତିଲାଭ କରିବ। ଏହାକୁ ବାଦ୍‌ଦେଲେ ବିଭିନ୍ନ ପ୍ରଡକ୍ସନ୍‌ ହାଉସ୍‌ ଅଧୀନରେ ସୋନାଲିଙ୍କ  ହାତରେ ଏକାଧିକ ପ୍ରୋଜେକ୍ଟ ରହିଛି । ଫିଲ୍ମ ‘ନୂରାନି ଚେହ୍‌ରା’ରେ ସେ ନୱାଜୁଦ୍ଦିନ ସିଦ୍ଦିକି ଓ ନୂପୁର ସାନନ୍‌ଙ୍କ  ସହ ନଜର ଆସିବେ । ‘ବୁନ୍ଦି ରାଇତା’ରେ ମଧ୍ୟ ତାଙ୍କୁ ଦେଖିବାକୁ ପାଇବେ ସିନେପ୍ରେମୀ ।