ମୁମ୍ଵାଇ ୧୬।୦୯: ସୋସିଆଲ ମିଡିଆର ବ୍ୟବହାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ପ୍ରାଥମିକ ସ୍କୁଲ ପିଲାଙ୍କ ଠାରୁ ସବୁ ଯୁବ ବର୍ଗ ପର୍ଯ୍ୟାପ୍ତ ନିଦ ପାଉ ନାହାନ୍ତି । ଏକ ଅଧ୍ୟୟନ ଏହାର ଖୁଲାସା କରିଛି । ୧୦ରୁ ୧୧ ବର୍ଷ ବୟସର ପିଲା ପ୍ରତି ରାତିରେ ୧୨ ଘଣ୍ଟା ନିଦ ପାଉନାହାନ୍ତି । ଏହା ପରିବର୍ତ୍ତେ ସେମାନେ ହାରାହାରି ୮.୭ ଘଣ୍ଟା ଶୋଇବାକୁ ପାଉଛନ୍ତି । ଡି ମଣ୍ଟଫର୍ଟ ବିଶ୍ୱବିଦ୍ୟାଳୟର ଗବେଷକ ଡା. ଜନ୍ ଶ ଙ୍କ ନେତୃତ୍ୱରେ ଲିସେଷ୍ଟର୍ ସ୍ଥିତ ସମସ୍ତ ସ୍କୁଲରେ ଏହି ଅଧ୍ୟୟନ କରାଯାଇଥିଲା । ଅଧ୍ୟୟନରେ ସୋସିଆଲ ମିଡିଆରେ ସମୟ ବିତାଉଥିବା ୧୦ ବର୍ଷ ବୟସର ୬୦ ପିଲାଙ୍କୁ ସାମିଲ କରାଯାଇଥିଲା । ସେମାନଙ୍କ ମଧ୍ୟରୁ ୮୯ ପ୍ରତିଶତ ପିଲାଙ୍କର ନିଜର ସ୍ମାର୍ଟଫୋନ୍ ଥିଲା । ୫୫.୪ ପ୍ରତିଶତ ଟ୍ୟାବ୍ ବ୍ୟବହାର କରୁଥିଲେ । ୨୩.୨ ପ୍ରତିଶତ କମ୍ପ୍ୟୁଟର ଏବଂ ୯ ପ୍ରତିଶତ ପିଲା ସ୍ମାର୍ଟୱାଚ୍ ବ୍ୟବହାର କରୁଥିବା କଥା କହିଥିଲେ ।
କିଶୋରଙ୍କ ଉପରେ ସୋସିଆଲ ମିଡିଆ, ନିଦ ଓ ଫୋମୋ (ଫିଅର୍ ଅଫ୍ ମିସିଙ୍ଗ ଆଉଟ୍ ବା ହରାଇବାର ଭୟ)ର ଏହି ଅଧ୍ୟୟନ ପ୍ରଥମ । ରାତିରେ ଯେଉଁ ସମୟରେ ଶୋଇବା ଉଚିତ୍, ସେହି ସମୟରେ ପ୍ରତି ୮ ଜଣ ପିଲାଙ୍କ ମଧ୍ୟରେ ଜଣେ ସୋସିଆଲ ମିଡିଆ ବ୍ୟବହାର କରୁଥିଲେ ବୋଲି ଗବେଷକମାନେ ଜାଣିବାକୁ ପାଇଲେ । ପ୍ରାୟ ୬୯ ପ୍ରତିଶତ ପିଲା କହିଥିଲେ ଯେ ଦିନକୁ ସେମାନେ ୪ ଘଣ୍ଟାରୁ ଅଧିକ ସମୟ ସୋସିଆଲ ମିଡିଆରେ ବ୍ୟସ୍ତ ରହୁଛନ୍ତି । ୬୬ ପ୍ରତିଶତ ପିଲା ବିଛଣାକୁ ଯିବା ପୂର୍ବରୁ ପ୍ରାୟ ୨ ଘଣ୍ଟା ଫୋନ୍ରେ ସମୟ ବିତାଉଛନ୍ତି । ୧୨.୫ ପ୍ରତିଶତ ଅର୍ଦ୍ଧରାତ୍ରିରେ ଫୋନ୍ ବ୍ୟବହାର କରିବା ବିଷୟରେ କହିଛନ୍ତି । ଏହା ଆଶ୍ଚର୍ଯ୍ୟଜନକ ତଥ୍ୟ ବୋଲି ଗବେଷକମାନେ କହିଛନ୍ତି । ୮୯ ପ୍ରତିଶତ ପିଲା ସବୁଠୁ ଲୋକପ୍ରିୟ ପ୍ଲାଟ୍ଫର୍ମ ଟିକ୍ ଟକ୍ ବ୍ୟବହାର କରୁଛନ୍ତି । ୮୩.୯ ପ୍ରତିଶତ ସ୍ନାପ୍ଚାଟ୍, ୮୭.୫ ପ୍ରତିଶତ ୟୁଟ୍ୟୁବ୍, ୫୭ ପ୍ରତିଶତ ପିଲା ଇନ୍ଷ୍ଟାଗ୍ରାମ୍, ୧୭ ପ୍ରତିଶତ ରେଡିଟ୍ ଏବଂ ୨ ପ୍ରତିଶତରୁ କମ୍ ପିଲା ଫେସ୍ବୁକ୍ ବ୍ୟବହାର କରୁଥିବା ଜଣାପଡ଼ିଲା । ସେମାନେ ଯେତେ ଅଧିକ ସମୟ ସୋସିଆଲ ମିଡିଆରେ ସମୟ ବିତାଉଥିଲେ, ନିଦର ଗୁଣବତ୍ତା ଆହୁରି ଖରାପ ହେଉଥିଲା ।
ନିଦ ଉପରେ ପ୍ରଭାବ ପଡ଼ିବା ଦ୍ୱାରା ପିଲାଙ୍କ ଧୀ ସମ୍ବନ୍ଧୀୟ ବିକାଶରେ ବାଧା ଉପୁଜୁଛି ବୋଲି ଗବେଷକମାନେ ଚେତାଇ ଦେଇଛନ୍ତି । ଅଧିକ ସମୟ ସୋସିଆଲ ମିଡିଆରେ ବିତାଉଥିବା ପିଲାଙ୍କ ଉଦ୍ବେଗ, ଚିଡ଼ିଚିଡ଼ାପଣ ସ୍ତର ବଢ଼ିଥିବା ଏଥିରେ ଲକ୍ଷ୍ୟ କରାଯାଇଛି । ପିଲାଙ୍କ ଶୋଇବା ସମୟ ସେମାନଙ୍କ ଆବେଗର ପ୍ରକ୍ରିୟାକରଣ ଓ ସ୍ମରଣଶକ୍ତି ଏକୀକରଣ, ସୃଜନଶୀଳତା ଓ ସମସ୍ୟା ସମାଧାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥାଏ । କିନ୍ତୁ ଯଦି ପର୍ଯ୍ୟାପ୍ତ ନିଦ ନ ହୁଏ, ଏହି ପ୍ରକ୍ରିୟା ହେବାକୁ ସୁଯୋଗ ପାଆନ୍ତି ନାହିଁ । ଯେତେବେଳେ ଆମେ ଧୀମା-ତରଙ୍ଗ ନିଦ୍ରାରେ ପ୍ରବେଶ କରୁ³ ଆମ ଶରୀର ଆରାମ କରେ, ପୁନରୁଦ୍ଧାର ହୁଏ, ବୃଦ୍ଧି ହର୍ମୋନ୍ ନିର୍ଗତ ହୁଏ । ଏଗୁଡ଼ିକର ବୃଦ୍ଧି ପ୍ରକ୍ରିୟା ଜାରି ରହେ । ତେଣୁ ଛୋଟ ପିଲା ବୟସ୍କଙ୍କ ଅପେକ୍ଷା ଅଧିକ ସମୟ ଶୋଇବା ଉଚିତ୍, କାରଣ ସେମାନେ ଜୈବ ପରିବର୍ତ୍ତନ ମଧ୍ୟଦେଇ ଗତି କରୁଛନ୍ତି ବୋଲି ଗବେଷକମାନେ କହିଛନ୍ତି।
