ବିମାନରେ ବସି ସିଗାରେଟ୍ ଟାଣିବା ଅଭିଯୋଗରେ ଗିରଫ ହୋଇଥିବା ୟୁଟ୍ୟୁବର ବବି କଟାରିଆଙ୍କୁ ଜାମିନ ଦେଲେ କୋର୍ଟ

Published By : Prameya-News7 Bureau | September 30, 2022 IST

ନୂଆଦିଲ୍ଲୀ: କେବେ ମଝି ରାସ୍ତାରେ ମଦ ପିଇ ଟ୍ରାଫିକ୍ ଜାମ କରୁଛନ୍ତି ତ ଆଉ କେତେବେଳେ ବିମାନ ବସି ସିଗାରେଟ୍ ଟାଣୁଛନ୍ତି। ଜେଲ୍ ଗଲେ ବେଲରେ ଆସି ପୁଣି କାରନାମା କରୁଛନ୍ତି। ସୋସିଆଲ୍ ମିଡିଆରେ ଲୋକପ୍ରିୟ ବବି କଟାରିଆ ଏଭଳି କାରନାମା କରୁଛନ୍ତି।

ବିମାନରେ ସିଗାରେଟ୍ ଟାଣିବା ମାମଲାରେ ସେପ୍ଟେମ୍ବର ୨୭ ତାରିଖରେ ତାଙ୍କୁ ଦିଲ୍ଲୀ ପୁଲିସ ଗିରଫ କରିଥିଲା। ୨୮ ତାରିଖରେ ତାଙ୍କୁ ବେଲ୍ ମିଳିଯାଇଛି। ଗତ ମାସରେ ସୋସିଆଲ୍ ମିଡିଆରେ ଏକ ଭିଡିଓ ଭାଇରାଲ ହୋଇଥିଲା। ଯେଉଁଥିରେ କଟାରିଆ ସ୍ପାଇସ୍‌ ଜେଟ୍ ବିମାନରେ ସିଗାରେଟ୍ ଟାଣୁଥିବାର ଦେଖାଯାଇଛି।

ଏହି ଘଟଣା ଅଗଷ୍ଟ ୨୩ ତାରିଖର ହୋଇଥିବା ବେଳେ ଭିଡିଓ ଆସିବା ପରେ ବିମାନ କମ୍ପାନୀ ପକ୍ଷରୁ ବବିଙ୍କ ବିରୋଧରେ ମାମଲା ହୋଇଥିଲା। ଏହାର ତୁରନ୍ତ ପରେ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଭାଇରାଲ ଭିଡିଓର ତଦନ୍ତ ନିର୍ଦ୍ଦେଶ ଦେଇଥିଲେ। ଲୋକମାନେ ମଧ୍ୟ ତାଙ୍କୁ ଗିରଫ କରିବାକୁ ଦାବି କରିଥିଲେ। ଏହି ଘଟଣାରେ ମଙ୍ଗଳବାର ଦିଲ୍ଲୀ ପୁଲିସ ବବିଙ୍କୁ ପଚରାଉଚରା କରିବା ସହ ଏକ କୋର୍ଟରେ ହାଜର କରାଇଥିଲା। ସେଠାରୁ ଜୁଡ଼ିସିଆଲ୍ କଷ୍ଟୁଡିକୁ ନେଇଥିଲା। ବୁଧବାର କଟାରିଆ କୋର୍ଟରେ ବେଲ୍ ଆବେଦନ କରିବାରୁ କୋର୍ଟରୁ ତାଙ୍କୁ ବେଲ୍ ମିଳିଯାଇଛି।

ଏହା ପୂର୍ବରୁ ବବି ମସୁରୀ କିମାଡ଼ି ରାସ୍ତା ମଝିରେ ଲୋକଙ୍କୁ ଅଟକାଇ ଚେୟାର ଟେବଲୁ ପକାଇ ମଦ ପିଉଥିବାର ଦେଖାଯାଇଥିଲା। ଏହାକୁ ନେଇ କଟାରିଆ ବିରୋଧରେ କୋତୱଲି ଥାନାରେ ଅଭିଯୋଗ ହୋଇଥିଲା। ଏଥିପାଇଁ ପୁଲିସ କଟାରିଆକୁ ବାରମ୍ବାର ନୋଟିସ ପଠାଇଥିଲେ ବି ନା ସେ ଏହାର ଜବାବ ଦେଇଥିଲେ ନା ଥାନାକୁ ଆସିଥିଲା। ଫଳରେ ତାଙ୍କୁ ଧରାଇ ଦେବାକୁ ୨୫ ହଜାର ପୁରସ୍କାର ରାଶି ଘୋଷଣା କରିଥିଲା ଡେରାଡୁନ ପୁଲିସ୍।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.