ନୂଆଦିଲ୍ଲୀ: ଖରା ଦିନରେ ସାଧାରଣତଃ ମହଙ୍ଗା ହେଉଥିବା ଫ୍ରିଜ ଏବଂ ଏସି ସହ ସ୍ମାର୍ଟଫୋନ ଏଥର ଶସ୍ତା ହୋଇଛି । ତିନି ବର୍ଷରେ ପ୍ରଥମ ଥର ପାଇଁ ଇଲେକ୍ଟ୍ରୋନିକ୍ସ ସାମଗ୍ରୀ ଗୁଡିକ ମୂଲ୍ୟ ୪ ହଜାର ଟଙ୍କା ଯାଏ ଶସ୍ତା ହୋଇଛି । ନିର୍ମାଣରେ କମ ଖର୍ଚ୍ଚ ଏବଂ ବଳକା ସାମଗ୍ରୀର ଶୀଘ୍ର ବିକ୍ରି ପାଇଁ ମୂଲ୍ୟ ଗୁଡିକରେ ୫ରୁ ୧୦ ପ୍ରତିଶତ ଯାଏ କମ କରାଯାଇଛି ।
ଜଣେ ଅଧିକାରୀ କହିଛନ୍ତି ଯେ ୨୦୨୦ ଏବଂ ୨୦୨୧ରେ ସ୍ମାର୍ଟଫୋନ ଗୁଡିକର ଚାହିଦା ବୃଦ୍ଧି ପାଇଥିଲା । ମୋବାଇଲ କମ୍ପାନି ଗୁଡିକ ଗତ ବର୍ଷ ଚାହିଦାର ସଠିକ୍ ଆକଳନ କରିପାରି ନଥିଲେ ଏବଂ ଏଥିପାଇଁ ବର୍ତ୍ତମାନ ସମୟରେ ବହୁ ମାତ୍ରାରେ ସାମଗ୍ରୀ ବଳକା ରହିଛି ।
ଅଧିକ ଖର୍ଚ୍ଚ କାରଣରୁ ଇଲେକ୍ଟ୍ରୋନିକ୍ସ କମ୍ପାନି ବର୍ଷରେ ଦୁଇ-ତିନି ଥର ସାମଗ୍ରୀଗୁଡିକର ମୂଲ୍ୟରେ ୪ ପ୍ରତିଶତ ଯାଏ ବୃଦ୍ଧି କରିଥାନ୍ତି । ଚଳିତ ବର୍ଷ ଜାନୁଆରୀ ସୁଦ୍ଧା ସ୍ମାର୍ଟଫୋନ ଏବଂ ଅନ୍ୟ ଇଲେକ୍ଟ୍ରୋନିକ୍ସ ସାମଗ୍ରୀର ମୂଲ୍ୟ କରୋନା ପୂର୍ବର ମୂଲ୍ୟଠାରୁ ହାରାହାରି ୧୮-୨୫ ପ୍ରତିଶତ ଅଧିତ ରହିଥିଲା ।
କିଛି କମ୍ପାନି ସ୍ମାର୍ଟଫୋନ ମଡେଲ ୫ରୁ ୧୫ ପ୍ରତିଶତ ଶସ୍ତାରେ ବିକ୍ରି କରୁଛନ୍ତି । ଏହିପରି ୨୦ ହଜାର ଟଙ୍କାର ଫୋନ ଉପରେ ତିନି ହଜାର ଟଙ୍କା ଯାଏ ରିହାତି ମିଳୁଛି । ଏହାପରେ ମଧ୍ୟ ଚାହିଦାରେ ବୃଦ୍ଧି ଦେଖିବାକୁ ମିଳୁ ନାହିଁ । ଏଲଜି, ସାମସଙ୍ଗ ଏବଂ ହାୟର ପରି ଫ୍ରିଜ କମ୍ପାନି ନିଜର ଲୋକପ୍ରିୟ ମଡେଲ ମୂଲ୍ୟରେ ୪ ହଜାର ଟଙ୍କା ଯାଏ ଶସ୍ତା କରିଛନ୍ତି । ଏକ ଲକ୍ଷ ଟଙ୍କାର ଫ୍ରିଜରେ ୭ ହଜାର ଯାଏ ରିହାତି ମିଳୁଛି ।
