ନୂଆଦିଲ୍ଲୀ: ସ୍ମାର୍ଟ ସିଟି ମିଶନରେ ୬୮ ସହର ପଛରେ ପଡ଼ିବା ୩୨ ସହରର ପରିଶ୍ରମକୁ ବୃଥା କରୁଥିବା ନଜର ଆସୁଛି । ୬୮ ସହର ମଧ୍ୟରେ ୨୫ ଏପରି ସହର ଅଛନ୍ତି ଯାହାଙ୍କ ପ୍ରଗତି ଅର୍ଥାତ୍ ମିଶନ ଅଧିନରେ ଯୋଜନା ଶେଷ କରିବାର ସ୍କୋର କାର୍ଡ ନୈରସ୍ୟଜନକ ରହିଛି । ଏହି କାରଣରୁ ଆସନ୍ତା ଜୁନ ସୁଦ୍ଧା ଲକ୍ଷ୍ୟ ପୂରଣ କରିବା ଅସମ୍ଭବ ଲାଗୁଛି ।
ସ୍ମାର୍ଟ ସିଟି ମିଶନରେ ପ୍ରାୟ ଦୁଇ ତୃତୀୟାଂଶ ସହରର ଖରାପ ପ୍ରଦର୍ଶନ ମାମଲା ନଗର ବିକାଶ ମନ୍ତ୍ରାଳୟ ସମ୍ପର୍କିତ ସଂସଦର ସ୍ଥାୟୀ କମିଟିରେ ମଧ୍ୟ ଉଠିଥିଲା । ଛତିଶଗଡ଼ର ରାୟପୁର, ମଧ୍ୟ ପ୍ରଦେଶର ଗ୍ୱାଲିୟର, ଇନ୍ଦୋର ଏବଂ ସତନା, ରାଜସ୍ଥାନର ଅଜମେର, ଜୟପୁର, କୋଟା, ଉତ୍ତର ପ୍ରଦେଶର ଆଗରା, ଅଲିଗଡ଼, ବରେଲୀ, ଝାଂସୀ, ଲକ୍ଷ୍ନୌ, ପ୍ରୟାଗରାଜ, ବାରାଣସୀ ପରି କିଛି ସହର ଲକ୍ଷ୍ୟଠାରୁ ଅଧିକ ପରିଯୋଜନା କାମ ଶେଷ କରିଛନ୍ତି ।
ଲକ୍ଷ୍ୟର ୧୦ ପ୍ରତଶିତ ହାସଲ କରିପାରି ନାହାନ୍ତି
ପଞ୍ଜାବର ଅମୃତସର ଏବଂ ଲୁଧିୟାନା ଲକ୍ଷ୍ୟ ହାସଲ କରିଛନ୍ତି । କିନ୍ତୁ ଏପରି ବି ସହର ଅଛନ୍ତି ଯେଉଁମାନେ ୧୦ ପ୍ରତିଶତ ବି ପ୍ରଗତି କରି ନାହାନ୍ତି । ଭାଗଲପୁର, ମୁଜଫରପୁର, ପାଟନା, ଚଣ୍ଡିଗଡ, ବିଳାସପୁର, ଅହମଦାବାଦ, ଗାନ୍ଧୀନଗର, ରାଜକୋଟ, ବଦୋଦରା, ଫରିଦାବାଦ, କରନାଲ, ଧର୍ମଶାଳା, ରାଞ୍ଚି, ଉଜୈନ, ଭୁବନେଶ୍ୱର, ଜଳନ୍ଧର ଆଦି ଏଥିରେ ସାମିଲ ଅଛନ୍ତି ।
ମନ୍ତ୍ରାଳୟର ଜଣେ ଅଧିକାରୀଙ୍କ ବୟାନକୁ ନେଇ ଜାଗରଣ ଡଟ୍ କମ୍ ପ୍ରକାଶ କରିଥିବା ରିପୋର୍ଟ ଅନୁସାରେ, କାମ ଧିମେଇବା ପଛରେ କରୋନା ସହ କିଛି ସ୍ଥାନୀୟ ସମସ୍ୟା ରହିଛି । ଏଥିରେ ଭୂମି ଅଧିଗ୍ରହଣ ଏବଂ ଶ୍ରମଶକ୍ତିର ଉପଲବ୍ଧତା ଆଦି ସାମିଲ ରହିଛି । ଯଦି ମନ୍ତ୍ରାଳୟ ମିଶନର ଅବଧିକୁ ଆଗକୁ ବଢାଇବାକୁ ଅଛି ତେବେ ବ୍ୟୟ ବିଭାଗ ସହ ଆଲୋଚନା କରିବାକୁ ପଡ଼ିବ । ଯଦି ଏହାର ସମୟ ସୀମା ଆଗକୁ ନ ବଢା ଯାଏ ତେବେ ପ୍ରୋଜେକ୍ଟ ଅଧାରରେ ରହିଯିବ ।
