ସମ୍ବଲପୁର ୮|୬: ସମ୍ବଲପୁରରେ ଶୀତଳଷଷ୍ଠୀର ଧୁମ୍ । ବିଳମ୍ବିତ ରାତିରେ ଧୁମଧାମରେ ସମ୍ପନ୍ନ ହେଲା ଶିବ ବିବାହ ।  ଜ୍ୟେଷ୍ଠ ଶୁକ୍ଲପକ୍ଷ ଷଷ୍ଠୀ ଲଗ୍ନରେ ମଙ୍ଗଳବାର ବ୍ରାହ୍ମ ମୁହୂର୍ତ୍ତରେ ଦେବାଧିଦେବ ମହାଦେବ ଜଗଜ୍ଜନନୀ କରୁଣାମୟୀ ମା’ ପାର୍ବତୀଙ୍କ ପାଣିଗ୍ରହଣ କରିଛନ୍ତି।

ଆଜି ସକାଳେ କନ୍ୟା ବିଦାୟ, ମଧ୍ୟରାତ୍ରରୁ ଆରମ୍ଭ ହେବ ଦେବଦମ୍ପତିଙ୍କ ବର୍ଣ୍ଣାଢ୍ୟ ଲେଉଟାଣୀ । ନବବଧୂ ପାର୍ବତୀଙ୍କ ସହ ମହାଦେବ ସ୍ୱମନ୍ଦିର ପ୍ରତ୍ୟାବର୍ତ୍ତନ କରିବା ସହିତ ଆରମ୍ଭ ହେବ ସମ୍ବଲପୁର ଶୀତଳଷଷ୍ଠୀ ଯାତ୍ରା ।  ମଧ୍ୟରାତ୍ରିରୁ ଦେବଦମ୍ପତି ନଗର ପରିକ୍ରମା ଆରମ୍ଭ କରି ରବିବାର ସନ୍ଧ୍ୟାରେ ସ୍ୱମନ୍ଦିର ପ୍ରବେଶ କରିବେ। ଶୀତଳଷଷ୍ଠୀ ଅବସରରେ ସମଗ୍ର ସମ୍ବଲପୁର ଶିବମୟ ହୋଇପଡ଼ିଛି । 

ଶୁକ୍ରବାର ସକାଳେ ଶିବ-ପାର୍ବତୀ ଗତ ବର୍ଷର କନ୍ୟା ମାତାପିତାଙ୍କ ବାସଭବନକୁ ଯାଇଥିଲେ । ସେଠାରେ ଦୁହିଙ୍କ ମଧ୍ୟରେ ପଡ଼ିଥିବା ଗଣ୍ଠି ଖୋଲା ଯାଇଥିଲା। ଶିବ-ପାର୍ବତୀ ସେଠାରୁ ମନ୍ଦିରକୁ ଫେରିଲା ପରେ ଏ ବର୍ଷର କନ୍ୟା ପିତାମାତା ଦେବୀ ପାର୍ବତୀଙ୍କୁ ନିଜ ଘରକୁ ପାଛୋଟି ନେଇଥିଲେ । ଶିବାଳୟରେ ଶିବଙ୍କ ରୁଦ୍ରାଭିଷେକ ଓ ପିତ୍ରାଳୟରେ ପାର୍ବତୀଙ୍କ ହରିଦ୍ରାଭିଷେକ ବା ‘ଗଣଷଣ’ ହୋଇଥିଲା। ରାତିରେ ବରପିତା, ପୁରୋହିତ, ସପ୍ତଋଷି, ମୁରବୀ, ଶୀତଳଷଷ୍ଠୀ ଯାତ୍ରା କମିଟିର କର୍ମକର୍ତ୍ତାଙ୍କ ଗହଣରେ ବରବେଶୀ ମହାଦେବ ଥାଟ ପଟୁଆର ଧରି ବାହାରିଥିଲେ ପାର୍ବତୀଙ୍କ ବାସଭବନ ଅଭିମୁଖେ।

ନନ୍ଦପଡ଼ାର ବମ୍‍ବରାଡ଼ ଶ୍ରୀ ବାଲୁଙ୍କେଶ୍ୱର ବାବା, ଝାଡ଼ୁଆପଡ଼ାର ଶ୍ରୀ ଲୋକନାଥ ବାବା, ମୁଦିପଡ଼ାର ଶ୍ରୀ ଜାଗେଶ୍ୱର ବାବା, ବଡ଼ବଜାରର ଶ୍ରୀ ଶୀତଳେଶ୍ୱର ବାବା, ଠାକୁରପଡ଼ାର ଶ୍ରୀ ଗୁପ୍ତେଶ୍ୱର ବାବା ଓ ଅନ୍ୟ ସମସ୍ତ ଶିବାଳୟରୁ ବାହାରିଥିଲା ବରଯାତ୍ରୀ ଶୋଭାଯାତ୍ରା।। ବରବେଶୀ ଶିବଙ୍କ ‘ଗାଲସେକା’ ପରେ ତାଙ୍କୁ ବିବାହ ବେଦୀକୁ ପାଛୋଟି ନେଇ ପୁରୋହିତଙ୍କ ମନ୍ତ୍ରପାଠ ଓ ଶ୍ଲୋକ ଉଚ୍ଚାରଣ ମଧ୍ୟରେ ଲୋକାଚାରରେ ବରବେଶୀ ମହାଦେବ ମାତା ପାର୍ବତୀଙ୍କ ପାଣିଗ୍ରହଣ କରିଛନ୍ତି।