ନୂଆଦିଲ୍ଲୀ ୨୯।୨: ଦିଲ୍ଲୀ ହିଂସା ଥମିଛି, ହେଲେ ମୃତ୍ୟୁ ସଂଖ୍ୟା ବଢିଚାଲିଛି । ଏବେ ସୁଦ୍ଧା ମୃତ୍ୟୁ ସଂଖ୍ୟା ୪୨ ଛୁଇଁଥିବା ବେଳେ ୨୦୦ରୁ ଅଧିକ ଆହତ ଏବେବି ଚିକିତ୍ସାଧୀନ ଅଛନ୍ତି । ହିଂସା ପ୍ରଭାବିତ ଉତ୍ତରପୂର୍ବ ଦିଲ୍ଲୀରେ କିଛି ଅଞ୍ଚଳରେ ଦୋକାନ ବଜାର ଖୋଲିଛି । ପ୍ରଭାବିତ ଅଞ୍ଚଳରେ ୭ହଜାରରୁ ଅଧିକ ସୁରକ୍ଷାକର୍ମୀ ମୁତୟନ ହୋଇଛନ୍ତି । ହିଂସାକାଣ୍ଡ ନେଇ ମୋଟ୍ ୧୨୩ ଏତଲା ଦାୟର ହୋଇଥିବାବେଳେ ମୋଟ ୬୩୦ଜଣଙ୍କୁ ଗିରଫ କରାଯାଇଥିବା ପୋଲିସ ସୂଚନା ଦେଇଛି ।
ଦିଲ୍ଲୀ ପୋଲିସ କ୍ରାଇମବ୍ରାଞ୍ଚ ଅଧୀନରେ ଦୁଇଟି ଏସଆଇଟି ଟିମ୍ ମାରାଥନ ତଦନ୍ତରେ ଲାଗିଛନ୍ତି । ସେପଟେ ଦିଲ୍ଲୀ ପୋଲିସ କମିସନର ଅମୂଲ୍ୟ ପଟ୍ଟନାୟକଙ୍କ କାର୍ଯ୍ୟକାଳ ଆଜି ଶେଷ ହେଉଛି । ତାଙ୍କ ସ୍ଥାନରେ ନବନିଯୁକ୍ତ ସ୍ବତନ୍ତ୍ର କମିସନର ଏସ୍.ଏନ୍ ଶ୍ରୀବାସ୍ତବକୁ କମିସନର ଭାବେ ନିଯୁକ୍ତି ଦିଆଯାଇଛି। ମାସକ ଆଗରୁ ଅମୂଲ୍ୟଙ୍କ କାର୍ଯ୍ୟକାଳ ଶେଷ ହୋଇଥିଲେ ମଧ୍ୟ ଦିଲ୍ଲୀ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଏକ ମାସ ପାଇଁ ତାଙ୍କ କାର୍ଯ୍ୟକାଳ ବୃଦ୍ଧି କରାଯାଇଥିଲା।