ମୁମ୍ଵାଇ ୨୧।୦୪: ବିଟାଉନ୍ର ସୁନ୍ଦରୀ ଅଭିନେତ୍ରୀ କିଆରା ଆଡଭାନୀ । ବର୍ତ୍ତମାନ ସେ ତାଙ୍କ ଫିଲ୍ମ ପାଇଁ ଖୁବ୍ ବ୍ୟସ୍ତ ଥିବା ଜଣାପଡିଛି। କାହିଁକି ନା ସେ ମୁମ୍ବାଇ ଠାରେ ଥିବା ଫିଲ୍ମ ପ୍ରଯୋଜକ ସାଜିଦ ନାଦିଆଦୱାଲାଙ୍କ ଅଫିସ୍ରେ ନଜର ଆସିଥିଲେ । ଗଣମାଧ୍ୟମ ନଜର ତାଙ୍କ ଉପରେ ପଡ଼ିବା ପରଠୁ ତାଙ୍କୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି । ସଲମାନ ଖାନ୍ଙ୍କ ଅପ୍କମିଙ୍ଗ ଫିଲ୍ମ ‘ସିକନ୍ଦର’ରେ କିଆରା ଲିଡ୍ ଲେଡି ଭୂମିକାରେ ନଜର ଆସିବେ ବୋଲି ଚର୍ଚ୍ଚା ହେଉଛି ।
ନିକଟରେ ଫିଲ୍ମର ନିର୍ଦ୍ଦେଶକ ଏଆର ମୁରୁଗଡୋସ ଇଦ୍ ଅବସରରେ ଫିଲ୍ମର ଟାଇଟଲ ଘୋଷଣା କରିଥିଲେ । ଆସନ୍ତା ବର୍ଷ ଇଦ୍ ଅବସରରେ ଫିଲ୍ମଟି ପରଦାକୁ ଆସିବ । ତେବେ କେବଳ କିଆରା ନୁହନ୍ତି, ଅଭିନେତା କାର୍ତ୍ତିକ ଆର୍ୟନଙ୍କୁ ମଧ୍ୟ ସେହି ଦିନ ସାଜିଦଙ୍କ ଅଫିସ୍ ସାମ୍ନାରେ ଦେଖିବାକୁ ମିଳିଥିଲା । ଉଭୟ ‘ଭୁଲ୍ ଭୁଲୈୟା-୨’ରେ ପୁଣି ଥରେ ସ୍କ୍ରିନ୍ ଶେୟାର କରିବେ ବୋଲି ଅନେକ କହୁଛନ୍ତି । ଏକ ଗଣମାଧ୍ୟମ ସହ ସାକ୍ଷାତକାରରେ ମୁରୁଗଡୋସ କହିଥିଲେ, ‘ସିକନ୍ଦର’ରେ ଦମ୍ଦାର ଆକ୍ସନ୍ ସହିତ ଆବେଗଭରା ଓ ଶକ୍ତିଶାଳୀ ସାମାଜିକ ବାର୍ତ୍ତା ରହିବ । ଏହି ଫିଲ୍ମରେ ସଲମାନଙ୍କ ନୂଆ ଲୁକ୍ ଦେଖିବାକୁ ପାଇବେ ଦର୍ଶକ ।
୫ ବର୍ଷ ପୂର୍ବେ ଏହି ଫିଲ୍ମ ବିଷୟରେ ସଲ୍ଲୁ ଓ ମୁରୁଗଡୋସ ଆଲୋଚନା କରିଥିଲେ । କିଆରାଙ୍କ ଅପ୍କମିଙ୍ଗ ଫିଲ୍ମରେ ଅଛି ଫରହାନ ଅଖତରଙ୍କ ‘ଡନ୍[1]୩’ । ଏଥିରେ ଡନ୍ ଭୂମିକାରେ ନଜର ଆସିବେ ରଣବୀର ସିଂହ । ବହୁଦିନ ହେଲା ଆକ୍ସନ୍ ଫିଲ୍ମରେ କାମ କରିବାକୁ ଚାହୁଁଥିବା କଥା କିଆରା ନିକଟରେ କହିଥିଲେ । ସେହି ଦୃଷ୍ଟିରୁ ‘ଡନ୍-୩’ ତାଙ୍କ ପାଇଁ ଭଲ ସୁଯୋଗ ହେବ ।
