ମୁମ୍ଵାଇ ୨୦।୦୫: କ୍ରିତି ସାନନ୍ ଏବେ ବଲିଉଡ୍ର ଆଗଧାଡ଼ିର ଅଭିନେତ୍ରୀଙ୍କ ମଧ୍ୟରେ ଅନ୍ୟତମ । ଚଳିତବର୍ଷ ରିଲିଜ୍ ହୋଇଥିବା ତାଙ୍କର ଦୁଇଟି ଯାକ ଫିଲ୍ମ ‘ତେରି ବାତୋଁ ମେଁ ଐସା ଉଲ୍ଝା ଜିୟା’ ଓ ‘କ୍ରୁ’କୁ ବେଶ୍ ଦର୍ଶକୀୟ ଆଦୃତି ମିଳିଛି । ବକ୍ସ ଅଫିସ୍ରେ ମଧ୍ୟ ସେଗୁଡି଼କର ପ୍ରଦର୍ଶନ ଭଲ ରହିଛି । ଆଗକୁ କ୍ରିତିଙ୍କୁ ଅଭିନେତା ସିଦ୍ଧାର୍ଥ ମଲହୋତ୍ରାଙ୍କ ସହିତ ଏକ ଫିଲ୍ମରେ ଦେଖିବାକୁ ମିଳିପାରେ ବୋଲି କୁହାଯାଉଛି । ତାହା ଏକ ରୋମାଣ୍ଟିକ୍ ଫିଲ୍ମ ହେବ । ସେଥିରେ କ୍ରିତିଙ୍କ ଚରିତ୍ରକୁ ବହୁତ ଗୁରୁତ୍ୱ ମିଳିବ ବୋଲି ରିପୋର୍ଟ ଆସିଛି । ନିକଟରେ କ୍ରିତି ଓ ସିଦ୍ଧାର୍ଥଙ୍କୁ ମ୍ୟାଡକ୍ ଫିଲ୍ମସ ଅଫିସ୍ ବାହାରେ ଏକତ୍ର ଦେଖିବାକୁ ମିଳିଥିଲା ।
ଏହାପରେ ଏହି ଖବରକୁ ନେଇ ଚର୍ଚ୍ଚା ବଢ଼ିଯାଇଛି । ମ୍ୟାଡକ୍ ଫିଲ୍ମସର ଏକ ଲଭ୍ ଷ୍ଟୋରିରେ ସେମାନଙ୍କୁ ଦେଖିବାକୁ ମିଳିପାରେ ବୋଲି କୁହାଯାଉଛି । ତେବେ ସେମାନଙ୍କ ପକ୍ଷରୁ ଏ ସଂପର୍କରେ କିଛି ଆନୁଷ୍ଠାନିକ ଭାବେ ଘୋଷଣା କରାଯାଇନାହିଁ । ୱାର୍କଫ୍ରଣ୍ଟ କଥା କହିବାକୁ ଗଲେ କ୍ରିତିଙ୍କୁ ଆଗକୁ ‘ଦୋ ପତ୍ତି’ରେ ଦେଖିବାକୁ ମିଳିବ । ସେହି ଥ୍ରିଲରରେ ତାଙ୍କ ସହିତ କାଜୋଲ ଓ ତନ୍ଭି ଆଜମୀଙ୍କ ଭଳି କଳାକାର ନଜର ଆସିବେ । କ୍ରିତି ଏହି ଫିଲ୍ମର ପ୍ରଯୋଜିକା ମଧ୍ୟ ଅଛନ୍ତି । ଶଶାଙ୍କ ଚତୁର୍ବେଦୀ ଫିଲ୍ମର ନିର୍ଦ୍ଦେଶନା ଦେଉଥିବାବେଳେ ତାହା ନେଟ୍ଫ୍ଲିକ୍ସରେ ରିଲିଜ୍ ହେବ ।