ବରଗଡ ୧୭।୭: ବରଗଡ ଜିଲ୍ଳାର ବିଭିନ୍ନ ଗାଁ ଗୁଡିକରେ ଏବେ ଦେଖିବାକୁ ମିଳୁଛି ବିଦେଶୀ ପକ୍ଷୀଙ୍କ ଆସର । ଅକ୍ଷୟ ତୃତୀୟାଠାରୁ ଏହି ବିଦେଶୀ ପକ୍ଷୀଙ୍କ ଆଗମନ ହେଉଥିବା ବେଳେ ଏମାନଙ୍କ କିଚିରି ମିଚିରି ଶଦ୍ଦରେ ଗାଁ ପରିବେଶ ହୋଇ ଉଠିଥାଏ ଉତ୍ସବ ମୁଖର । ବିଶେଷ ଭାବେ ଜିଲ୍ଲାର ଅନ୍ତପାଲି, କର୍ଲାଜୁରୀ, ବାଲିଜୋରୀ, କେନ୍ଦମୁଣ୍ଡି ଗାଁରେ ବିପୁଳ ସଂଖ୍ୟାରେ ଏହି ଅତିଥି ପକ୍ଷୀଙ୍କ ଆଗମନ ହୋଇଥାଏ ।

ଭ୍ରମଣକାରୀ ପକ୍ଷୀ ବା ବିଦେଶୀ ପକ୍ଷୀ କହିଲେ ଆମେ ସାଇବେରିଆନ୍ ପକ୍ଷୀଙ୍କୁ ବୁଝିଥାଉ । ଏମିତି ଭ୍ରମଣକାରୀ ପକ୍ଷୀ ବରଗଡ଼ ଜିଲ୍ଲା ପାଇଁ ନୂଆ ନୁହେଁ । କେଉଁ ଆବାହମାନ କାଳରୁ ବରଗଡ଼ର କୁର୍ଲାଜୁରୀ, ଅନ୍ତପାଲି, ବାଲିଜୋରୀ, କେନ୍ଦମୁଣ୍ଡି ପରି ଗାଁକୁ ଏହି ପକ୍ଷୀମାନେ ନିୟମିତ ଭାବେ ଆସିଥାନ୍ତି । ଏହି ଗାଁର ଅନୁକୂଳ ପରିବେଶ ପକ୍ଷୀଙ୍କୁ ଖାଦ୍ୟ ଓ ସୁରକ୍ଷା ଯୋଗାଉ ଥିବାରୁ ସାଇବେରିଆନ୍ ଅଞ୍ଚଳରୁ ବହୁ ସଂଖ୍ୟାରେ ପକ୍ଷୀଙ୍କ ସୁଅ ଛୁଟିଥାଏ ଏହି ଗାଁକୁ । ଏମାନଙ୍କ ଆଗମନରେ ଗାଁ ଲୋକଙ୍କ ମନରେ ଭରିଯାଏ ଆନନ୍ଦର ଲହରି । ପକ୍ଷୀମାନଙ୍କ କଳରାବ ଶବ୍ଦ ସାଙ୍ଗକୁ ଶାବକ ପକ୍ଷୀଙ୍କ କିଚିରି ମିଚିର ଶବ୍ଦ ଗାଁ ଦାଣ୍ଡକୁ କରିଥାଏ ସଂଗୀତମୟ ।

ଅକ୍ଷୟତୃତୀୟାଠାରୁ ଆରମ୍ଭ କରି ଦୀପାବଳୀ ପର୍ଯ୍ୟନ୍ତ ଏହି ବିଦେଶୀ ପକ୍ଷୀମାନେ ବରଗଡ଼ର ଏହି ଗାଁ ଗୁଡ଼ିକରେ ରହିଥାନ୍ତି । ଏହି ସମୟ ମଧ୍ୟରେ ପକ୍ଷୀମାନେ ଅଣ୍ଡାଦେଇ ସେଥିରୁ ଛୁଆ ଜନ୍ମ କରିବା ପରେ ତାଙ୍କୁ ଉଡ଼ିବା ଶିଖାଇଥାନ୍ତି ଓ ପରେ ସାତ ସମୁଦ୍ର ପାରି ହୋଇ ପୁଣି ଫେରିଯାଆନ୍ତି ସେଇ ସୁଦୂର ସାଇବେରିଆ ଅଂଚଳକୁ ।

ଗ୍ରାମବାସୀଙ୍କ ପାଇଁ ଶୁଭଙ୍କର ଅଟନ୍ତି ଏହି ଭ୍ରମଣକାରୀ ପକ୍ଷୀ । ଏମାନଙ୍କ ଆଗମନକୁ ଗାଁ ଲୋକେ ଚାହିଁ ବସିଥାନ୍ତି, କାରଣ ଏମାନେ ଆସିଲେ ଗାଁରେ ଭଲ ବର୍ଷା ହୁଏ ଆଉ ଯେଉଁ ବର୍ଷ ଏମାନେ ନଆସନ୍ତି ସେବର୍ଷ ମରୁଡ଼ି ଭଳି ପରିସ୍ଥିତି ସୃଷ୍ଟି ହେଉଥିବାର ନଜିର ଥିବା ଗାଁ ଲୋକେ କୁହନ୍ତି । ସେଥିପାଇଁ ଗ୍ରାମବାସୀ ଏହି ପକ୍ଷୀଙ୍କ ସୁରକ୍ଷା କରିବା ସହ ତାଙ୍କର ଖାଦ୍ୟ ସୁରକ୍ଷା ଉପରେ ମଧ୍ୟ ଧ୍ୟାନ ଦେଇଥାନ୍ତି । ତେବେ ଗତ କିଛି ବର୍ଷ ହେଲା ଏହି  ଅତିଥି ପକ୍ଷୀଙ୍କ ସଂଖ୍ୟା ଧିରେ ଧିରେ କମିବାରେ ଲାଗିଛି । ପାଣିପାଗର ପରିବର୍ତ୍ତନ ସହ ବଡ ବଡ ଗଛ କାଟିଦିଆ ଯାଉଥିବାରୁ ଏପରି ପରିସ୍ଥିତି ସୃଷ୍ଟି ହେଉଥିବା କୁହାଯାଉଛି । ଯାହାକୁ ନେଇ ପରିବେଶବିତ୍ ଓ ପ୍ରକୃତିପ୍ରେମୀ ଉଦବେଗ ପ୍ରକାଶ କରିଥିବା ବେଳେ ପକ୍ଷୀଙ୍କ ସୁରକ୍ଷା ପାଇଁ ଲୋକଙ୍କୁ ସଚେତନତା କରିବା ସହ ଗଛ ନକାଟିବାକୁ ଅନୁରୋଧ କରିଛନ୍ତି ।

You Can Read :