ନୂଆଦିଲ୍ଲୀ: ଓଡ଼ିଆ ପୁଅଙ୍କୁ ଗୁରୁ ଦାୟିତ୍ବ ଦେଲା ଭାରତୀୟ କ୍ରିକେଟ ବୋର୍ଡ । ଓଡ଼ିଆ ପୁଅ ତଥା ଟିମ୍ ଇଣ୍ଡିଆର ପୂର୍ବତନ ଓପନର ଶିବ ସୁନ୍ଦର ଦାସଙ୍କୁ ଭାରତୀୟ ସିନିୟର ଚନୟକର୍ତ୍ତା ଟିମର ସଦସ୍ୟ ଭାବେ ବିସିସିଆଇ ପକ୍ଷରୁ ନିଯୁକ୍ତ କରାଯାଇଛି । ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ(ବିସିସିଆଇ) ଶନିବାର ଭାରତୀୟ ଜାତୀୟ ଦଳର ନୂତନ ଚୟନକର୍ତ୍ତା କମିଟି ଘୋଷଣା କରିଛି । ପୁଣି ଥରେ ପୂର୍ବତନ କ୍ରିକେଟର ଚେତନ ଶର୍ମା ନୂତନ ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତ ହୋଇଛନ୍ତି । ଟି-୨୦ ବିଶ୍ଵ କପ୍ ୨୦୨୨ରେ ଖରାପ ପ୍ରଦର୍ଶନ ପରେ ବିସିସିଆଇ ଚୟନ କମିଟି ଭଙ୍ଗ କରିଥିଲା। ଏହା ପରେ ନୂତନ ଚୟନ କମିଟି ଗଠନ ନେଇ ପ୍ରକ୍ରିୟା ଜାରି ରହିଥିଲା । ପୂର୍ବ ଚୟନ କମିଟିର ଅଧ୍ୟକ୍ଷ ଚେତନ ଶର୍ମା ଥିଲେ । ଓଡିଶା ପାଇଁ ଗୌରବର ବିଷୟ ଯେ, ନୂତନ ଚୟନକର୍ତ୍ତା କମିଟିରେ ଅଭିଜ୍ଞ ପୂର୍ବତନ କ୍ରିକେଟର ଶିବ ସୁନ୍ଦର ଦାସ ସାମିଲ୍ ।
ଶିବ ସୁନ୍ଦର ଦାସ ପ୍ରଥମ ଶ୍ରେଣୀ କ୍ରିକେଟ୍ରେ ୧୦ ହଜାରରୁ ଅଧିକ ରନ୍ କରିଛନ୍ତି । ଏହି ଡାହାଣହାତୀ ବ୍ୟାଟର ୧୮୦ଟି ମ୍ୟାଚ୍ରେ ୩୯ ହାରରେ ୧୦,୯୦୮ ରନ କରିଛନ୍ତି । ଏଥିରେ ୨୪ ଶତକ ଓ ୫୨ ଅର୍ଦ୍ଧଶତକ ସାମିଲ । ଅପରାଜିତ ୩୦୦ ରନ ତାଙ୍କର ସର୍ବୋଚ୍ଚ ସ୍କୋର । ଶିବ ସୁନ୍ଦର ଦାସ ଭାରତ ପକ୍ଷରୁ ୨୩ଟି ଟେଷ୍ଟ ମ୍ୟାଚ୍ ଖେଳି ୩୫ ହାରରେ ୧୩୨୬ ରନ କରିଛନ୍ତି । ଏଥିରେ ଦୁଇ ଶତକ ଓ ୯ ଅର୍ଦ୍ଧଶତକ ସାମିଲ । ସେ ଭାରତ ପକ୍ଷରୁ ୪ ଦିନିକିଆ ମ୍ୟାଚ୍ ଖେଳିଛନ୍ତି । ସେ ଅନ୍ତର୍ଜାତୀୟ କ୍ରିକେଟ୍ ଖେଳିବାର ଓଡିଶାର ତୃତୀୟ ଖେଳାଳି ।
ସେ ଶେଷ ଥର ପାଇଁ ୨୦୦୨ ମସିହା ମେ ୨୨ ତାରିଖରେ ଭାରତ ପାଇଁ ଟେଷ୍ଟ ମ୍ୟାଚ୍ ଖେଳିଥିଲେ । ସେ ଓ୍ବେଷ୍ଟଇଣ୍ଡିଜ ବିପକ୍ଷରେ ଏହି ମ୍ୟାଚ ଖେଳିଥିଲେ। ସେହିପରି ୨୦୦୨ ଡିସେମ୍ବର ୨୬ ତାରିଖରେ ନ୍ୟୁଜିଲାଣ୍ଡ ବିପକ୍ଷରେ ଶେଷ ଦିନିକିଆ ଖେଳିଥିଲେ।