ପୁଣେ ୨୮/୧୧ : ବିଶ୍ବର ସବୁଠାରୁ ବଡ ଭ୍ୟାକସିନ୍ ନିର୍ମାତା କମ୍ପାନୀ ସେରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ସିଇଓ ଆଦର ପୁନାଓ୍ବାଲା ଏକ ବଡ ଘୋଷଣା କରିଛନ୍ତି । ସେ କହିଛନ୍ତି, ଖୁବ ଶୀଘ୍ର ଦେଶରେ ଉପଲବ୍ଧ ହେବ କରୋନା ଭ୍ୟାକସିନ୍ । କୋଭିସିଲଡ୍ ଟ୍ରାଏଲ ସମୟରେ ଏହାର ଫଳାଫଳ ବହୁତ ଭଲ ହୋଇଛି । କୋଭିସିଲଡ୍ ଭ୍ୟାକସିନକୁ ଅତି ଜରୁରୀ ସମୟରେ ବ୍ୟବହାରରେ ଅନୁମତି ପ୍ରଦାନ ପାଇଁ ଆବେଦନ କରାଯିବ । ଏହାର ସ୍ପଷ୍ଟ ଅର୍ଥ ହେଉଛି ଭାରତରେ ଟିକା ଉତ୍ପାଦନ ଉନ୍ନତ ପର୍ଯ୍ୟାୟରେ ଅଛି ।
ଆଦର ପୁନାୱାଲା କହିଛନ୍ତି ଯେ ଜରୁରୀକାଳୀନ ପରିସ୍ଥିତିରେ କୋଭିସିଲଡ୍ ବ୍ୟବହାର କରିବାକୁ ଅନୁମତି ପାଇଁ ଆମେ ଆସନ୍ତା ୨ ସପ୍ତାହ ମଧ୍ୟରେ ଆବେଦନ କରିବା ପ୍ରକ୍ରିୟାରେ ଅଛୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସେରମ୍ ପ୍ରତିଷ୍ଠାନ ଗସ୍ତକୁ ନେଇ ପୁନାୱାଲା କହିଛନ୍ତି ଯେ ଟିକା ବିଷୟରେ ପ୍ରଧାନମନ୍ତ୍ରୀଙ୍କ ସହ ବିସ୍ତୃତ ଆଲୋଚନା ହୋଇଛି । ସେ ସୂଚନା ଦେଇଛନ୍ତି ଯେ ସେରମ୍ ପ୍ରତିଷ୍ଠାନ ପୁଣେରେ ସବୁଠାରୁ ବଡ କାରଖାନା ଏବଂ ମାଣ୍ଡାରିରେ ଏକ ନୂଆ କ୍ୟାମ୍ପସ୍ ନିର୍ମାଣ କରିଛି ।
ଆଦର ପୁନାୱାଲା କହିଛନ୍ତି ଯେ ଏହି ଟିକା ପ୍ରଥମେ ଭାରତରେ ବିତରଣ କରାଯିବ ଏବଂ ପରେ ଅନ୍ୟ ଦେଶରେ ବଣ୍ଟନ କରାଯିବ । ସେ କହିଛନ୍ତି ଯେ, ବ୍ରିଟେନ ଏବଂ ୟୁରୋପରେ ଟିକା ବଣ୍ଟନ ପାଇଁ ଆଷ୍ଟ୍ରାଜିନିକା ଏବଂ ଅକ୍ସଫୋର୍ଡ କାର୍ଯ୍ୟ କରୁଛନ୍ତି । ପୁନାୱାଲା କହିଛନ୍ତି ଯେ ଆମଠାରୁ କେତେ ଡୋଜ କିଣାଯିବ ସେ ସମ୍ପର୍କରେ ଏପର୍ଯ୍ୟନ୍ତ ଭାରତ ସରକାରଙ୍କ ତରଫରୁ ଲିଖିତ ଆକାରରେ କିଛି ମିଳିନାହିଁ । କିନ୍ତୁ ଜୁଲାଇ ୨୦୨୧ ସୁଦ୍ଧା ୩୦ ରୁ ୪୦ କୋଟି ଡୋଜ କ୍ରୟ କରାଯିବ ବୋଲି ସୂଚନା ରହିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଅହମ୍ମଦାବାଦ, ହାଇଦ୍ରାବାଦ ଏବଂ ପୁଣେ ଗସ୍ତରେ ଯାଇ କରୋନା ଟିକା ବିକାଶର ସମୀକ୍ଷା କରିଛନ୍ତି। ଅହମ୍ମଦାବାଦ ନିକଟ ଫାର୍ମାସ୍ୟୁଟିକାଲ୍ କମ୍ପାନୀ ଜିଡସ୍ କାଡିଲା ପ୍ଲାଣ୍ଟ ପରିଦର୍ଶନ କରି ମୋଦୀ ସମୀକ୍ଷା କରିଥିଲେ । ଏହା ପରେ ସେ ହାଇଦ୍ରାବାଦର ଭାରତ ବାୟୋଟେକ୍ ପ୍ଲାଣ୍ଟରେ ପହଞ୍ଚି ପୁଣେର ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ପରିଦର୍ଶନ କରିଥିଲେ।