ଭଦ୍ରକ ୯/୮: ଭଦ୍ରକରେ ମାତିଛନ୍ତି ଲୁଟେରା । କେଉଁଠି ଗ୍ରୀଲ ଭାଙ୍ଗୁଛନ୍ତି ତ ଆଉ କେଉଁଠି କବାଡ ତାଡୁଛନ୍ତି । ଏମିତିକି ପୋଷା କୁକୁରକୁ ବି ନିଶା ଟାବଲେଟ୍ ଦେଇ କଳାକନା ବୁଲାଉଛନ୍ତି । ପୋଲିସ ତଦନ୍ତ କରୁଛି,ସନ୍ଧାନୀ କୁକୁର ବୁଲୁଛି ହେଲେ ଲୁଟେରାଙ୍କ ଟେର୍ ପାଉନି । ଗୋଟିଏ ସପ୍ତାହରେ ୫ଟି ଘରୁ ଲୁଟ୍ପାଟ ହୋଇଥିବା ଅଭିଯୋଗ ହୋଇଛି । ସହରର ନିଛାଟିଆ ସ୍ଥାନରେ ଥିବା ଚରମ୍ପାର ବରାଳପୋଖରୀ ଓ ଡଗରା ସାହିରେ ଥିବା ଘର ଗୁଡିକୁ ଟାର୍ଗେଟ କରୁଛନ୍ତି ଲୁଟେରା ।
ପ୍ରଥମେ ଘରର ଗ୍ରୀଲ କାଟି,ପରେ ଝରକା ଭାଙ୍ଗି ଘର ଭିତରକୁ ପଶି ନଗଦ ଟଙ୍କା ସହ ସୁନା ଗହଣା ନେଇ ଯାଉଛନ୍ତି । ପୋଷା କୁକୁରଙ୍କୁ ନିଶା ଦେଇ ଶୁଆଇ ଦେଉଛନ୍ତି । ଅଭିଯୋଗ ପରେ ସାଇଣ୍ଟିଫିକ୍ ଟିମ୍ ସହାୟତାରେ ସନ୍ଧାନୀ କୁକୁର ଧରି ଛାନ୍ଭିନ୍ ଚଳାଇଛି ପୋଲିସ । ହେଲେ ଲୁଟେରାଙ୍କ ପତ୍ତା ମିଳୁନି । ପୋଲିସକୁ ଚକ୍ମା ଦେଇ ଲୁଟି ଚାଲିଛନ୍ତି ଲୁଟେରା । ପୋଲିସ ଠିକ ଭାବରେ ତଦନ୍ତ କରୁନଥିବା ଅଭିଯୋଗ ଆଣିଛନ୍ତି ସାଧାରଣ ଲୋକ । ସେପଟେ ପୋଲିସ କହୁଛି ତଦନ୍ତ ଚାଲିଛି ଚୋର ଖସିପାରିବେନି ।
।
