ପୁରୀ: ପୁରୀ ତାଳବଣିଆ ସ୍ପୋର୍ଟସ କମ୍ପ୍ଲେକ୍ସ ଠାରେ ୪୪ତମ ସିନିଅର ଜାତୀୟ ସଫ୍ଟବଲ୍ ଚମ୍ପିୟାନସିପ୍ ଉଦଘାଟିତ ହୋଇଛି। ଏଥିରେ ଓଡ଼ିଆ ଏବଂ ଭାରତର ବିଭିନ୍ନ ରାଜ୍ୟରୁ ଉଭୟ ବାଳକ ଓ ବାଳିକା ବର୍ଗର ୫୦ଟି ଦଳ ଭାଗ ନେଇଛନ୍ତି। ପୁରୀ ଜିଲ୍ଲାପାଳ ସମର୍ଥ ବର୍ମା ଏହି ଚମ୍ପିୟନସିପକୁ ଉଦଘାଟନ କରିଥିବା ବେଳେ ବରିଷ୍ଠ ପ୍ରଶାସନିକ ଅଧିକାରୀ, ବିଜୁ ଯୁବ ଜନତା ଦଳର ଉପସଭାପତି, କ୍ରିଡ଼ା ସଂଗଠକ ଓ କ୍ରିଡା ପ୍ରେମୀ ମାନେ ଯୋଗ ଦେଇଥିଲେ। ସଫ୍ଟବଲ୍ କ୍ରିଡାକୁ ଓଡିଶାରେ ଲୋକପ୍ରିୟତା କରାଇବା ଦିଗରେ ଏହି ଜାତୀୟ ଚମ୍ପିୟନସିପ୍ ବେଶ୍ ସହାୟକ ହେବ ବୋଲି ଆଶା ରଖିଛନ୍ତି କ୍ରିଡ଼ା ସଙ୍ଗଠକ ଏବଂ ଖେଳାଳି।

୪୪ତମ ସିନିଅର ଜାତୀୟ ସଫ୍ଟବଲ୍ ଚମ୍ପିୟାନସିପ୍ ପୁରୀରେ ଆରମ୍ଭ ହୋଇଛି। ତାଳବଣିଆ ସ୍ପୋର୍ଟସ କମ୍ପ୍ଲେକ୍ସ ଠାରେ ଆୟୋଜିତ ଏହି ଜାତୀୟ ଚମ୍ପିୟନସିପକୁ ଜିଲ୍ଲାପାଳ ସମର୍ଥ ବର୍ମା ମୁଖ୍ୟ ଅତିଥି ଭାବେ ଯୋଗ ଦେଇ ଉଦଘାଟନ କରିଥିଲେ। କାର୍ଯ୍ୟକ୍ରମରେ ବରିଷ୍ଠ ପ୍ରଶାସନିକ ଅଧିକାରୀଙ୍କ ସମେତ ବିଜୁ ଯୁବ ଜନତା ଦଳର ଉପସଭାପତି ଶୁଭାଶିଷ ଖୁଣ୍ଟିଆ, ଭାରତୀୟ ସଫ୍ଟବଲ୍ ସଂଘର ସଭାପତି ମିତଲ ନାରଣ ପ୍ରମୁଖ ଯୋଗ ଦେଇଥିଲେ। ଏହି ଚମ୍ପିୟନସିପରେ ଦେଶର ବିଭିନ୍ନ ରାଜ୍ୟରୁ ଆସିଥିବା ୨୬ଟି ବାଳକ ଓ ୨୪ଟି ବାଳିକା ଦଳ ଅଂଶଗ୍ରହଣ କରିଛନ୍ତି। ଏହି ଚମ୍ପିୟନସିପକୁ ସଫଳ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ସୁବ୍ୟବସ୍ଥା କରାଯାଇଛି। ଜିଲ୍ଲା ପ୍ରଶାସନ ଏବଂ ରାଜ୍ୟ ସଫ୍ଟବଲ ସଂଘର ମିଳିତ ଆନୁକୂଲ୍ୟରେ ଏହି ଚମ୍ପିୟନସିପ ଆୟୋଜନ‌ କରାଯାଇଛି।

ରାଜ୍ୟ ତଥା ଦେଶରୁ ସାମିଲ ହୋଇଥିବା ଖେଳାଳି ମାନେ ପୁରୀରେ ଅନୁଷ୍ଠିତ ହେଉଥିବା ଏହି ଜାତୀୟ ସ୍ତରୀୟ ସଫ୍ଟବଲ୍ ଚମ୍ପିୟାନସିପକୁ ନେଇ ବେଶ୍ ଉତ୍ସାହିତ ଅଛନ୍ତି। ଚମ୍ପିୟନସିପରେ ଉଚ୍ଚକୋଟୀର ଖେଳ ପ୍ରଦର୍ଶନ କରି ନିଜ ରାଜ୍ୟକୁ ଚମ୍ପିୟାନ କରାଇବା ପାଇଁ ଲକ୍ଷ ରଖିଛନ୍ତି ସମସ୍ତ ଖେଳାଳି। ସେପଟେ ଓଡ଼ିଶାରେ ଅନେକ ପ୍ରତିଭାବାନ କ୍ରିଡ଼ା ବିତ୍ ଥିବାବେଳେ ସଫ୍ଟବଲ୍ ଖେଳ ପାଇଁ ଉପଯୁକ୍ତ ଖେଳ ଭିତ୍ତିଭୂମି ନଥିବାରୁ ଜାତୀୟ ସ୍ତରରେ ଓଡ଼ିଶା ଭଲ ପ୍ରଦର୍ଶନ କରିପାରୁନାହିଁ ବୋଲି କହିଛନ୍ତି ଖେଳାଳି। ତେବେ ଓଡ଼ିଶା ସରକାର ଏବେ କ୍ରିଡ଼ା କ୍ଷେତ୍ରକୁ ଅଧିକ ଗୁରୁତ୍ବ ଦେଉଥିବା ବେଳେ ସଫ୍ଟବଲ୍ ଖେଳର ପ୍ରଚାର ପ୍ରସାର ପାଇଁ ଆର୍ଥିକ ଅନୁଦାନ, ଖେଳ ଭିତ୍ତିଭୂମି ସାମଗ୍ରୀ ଯୋଗାଇଦେବାକୁ କ୍ରିଡ଼ା ବିତ୍ ମାନେ ଅନୁରୋଧ କରିଛନ୍ତି। ସେପଟେ ଜାତୀୟ ସଫ୍ଟବଲ୍ ଚମ୍ପିୟାନସିପରେ ଓଡ଼ିଶା ଭଲ ଖେଳ ପ୍ରଦର୍ଶନ କରିବ ବୋଲି ଆଶା ରଖିଥିବା କହିଛନ୍ତି ଖେଳାଳି।

ପୁରୀ ତାଳବଣିଆ ସ୍ପୋର୍ଟସ କମ୍ପ୍ଲେକ୍ସରେ ଉଦଘାଟିତ ହୋଇଥିବା ୪୪ତମ ସିନିଅର ଜାତୀୟ ସଫ୍ଟବଲ୍ ଚମ୍ପିୟାନସିପ୍ ପାଞ୍ଚଦିନ ଧରି ଅନୁଷ୍ଠିତ ହେବ। ଆସନ୍ତା ୯ ତାରିଖରେ ଏହି ଚମ୍ପିୟନସିପ ଉଦଯାପିତ ହେବାକୁ ଥିବାବେଳେ ଚମ୍ପିୟନ ଏବଂ ରନର୍ସ ଅପ୍ ଟିମକୁ ଟ୍ରଫି ସହ ପୁରସ୍କାର ଅର୍ଥରାଶି ପ୍ରଦାନ କରାଯିବ।