ମୁମ୍ୱାଇ ୨୪/୦୩: ମହାରାଷ୍ଟ୍ର ବିଧାନସଭା ପରିସରରେ ଗୁରୁବାର ଦେଖିବାକୁ ମିଳିଥିଲା ଅଭାବନୀୟ ଦୃଶ୍ୟ । ମହାବିକାଶ ଆଘାଡି (ଏମଭିଏ)ର ବିଧାୟକମାନେ ରାହୁଲ ଗାନ୍ଧୀଙ୍କ ପୋଷ୍ଟରକୁ ଚପଲ ମାରିବା ଅଭିଯୋଗରେ ଶାସକ ବିଜେପି-ଶିବସେନା ସଦସ୍ୟଙ୍କୁ ସମାଲୋଚନା କରିଛନ୍ତି ।

ରାହୁଲଙ୍କ ପୋଷ୍ଟରକୁ ମାଡ ମାରିବା ସହ ସେ ହିନ୍ଦୁତ୍ୱ ଭାବବାଦୀ ଭି ଡି ସାବରକରଙ୍କୁ ଅପମାନିତ କରିଥିବା ଅଭିଯୋଗ । ଶିବସେନାର ଭାରତ ଗୋଗାୱାଲେ ଏବଂ ବିଜେପି ବିଧାୟକ ଯୋଗେଶ ସାଗର ରାହୁଲ ଗାନ୍ଧୀଙ୍କ ପୋଷ୍ଟରକୁ ଜୋତାମାଡ କରୁଥିବା ଦେଖିବାକୁ ମିଳିଥିଲା।

ସେପଟେ ଘଟଣାକୁ ନେଇ ଆରମ୍ଭ ହୋଇଛି ତମ୍ୱିତୋଫାନ । କଂଗ୍ରେସ ବିଧାୟକ ଦଳ ନେତା ବାଲାସାହେବ ଥୋରାଟ ଚେତାବନୀ ଦେଇଛନ୍ତି ଯେ ଅନ୍ୟ ଦଳର ନେତାମାନଙ୍କ ନାଁ ବି ଅନେକ ଅଭିଯୋଗ ରହିଛି । ବିଧାନସଭା ବାଚସ୍ପତି ରାହୁଲ ନରୱେକର ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି । ସେପଟେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଆଶ୍ୱାସନା ଦେଇଛନ୍ତି ଯେ ଏଭଳି କାର୍ଯ୍ୟ ରାଜ୍ୟ ବିଧାନସଭା ଭିତରେ ଘଟିବା ନିନ୍ଦନୀୟ । ଆଉ ଥରେ ଘଟଣାର ପୁନରାବୃତ୍ତି ହେବନି ।

ବିଧାନସଭାରେ ଶିବସେନା ବିଧାୟକ ପ୍ରତାପ ସାରନାକ ଅଭିଯୋଗ କରିଛନ୍ତି ଯେ ରାହୁଲ ଗାନ୍ଧୀ ତାଙ୍କର ଭାରତ ଯୋଡା ଯାତ୍ରା ସମୟରେ ସାବରକରଙ୍କୁ ଅପମାନିତ କରିଥିଲେ । ଏବେ ବି ସୁଦ୍ଧା ସେ ଏମିତି କରିଚାଲିଛନ୍ତି । ଅନ୍ୟ ଜଣେ ସେନା ବିଧାୟକ ସଞ୍ଜୟ ଶିରସତ କହିଛନ୍ତି ଯେ ଗାନ୍ଧୀ ଉଦ୍ଦେଶ୍ୟମୂଳକ ଭାବେ ସାବରକରଙ୍କ ପରି ଜଣେ ସ୍ୱାଧୀନତା ସଂଗ୍ରାମୀଙ୍କୁ ଅପମାନିତ କରିଛନ୍ତି । ସେ ଏଥିପାଇଁ ନିହାତି କ୍ଷମା ମାଗିବା ଆବଶ୍ୟକ ।

ସେହିପରି ବିଜେପି ବିଧାୟକ ଆଶିଷ ଶେଲାର କହିଛନ୍ତି ଯେ ବିଦେଶୀ ମାଟିରେ ଭାରତକୁ ଅସମ୍ମାନ କରିଥିବାରୁ ଗାନ୍ଧୀଙ୍କ ବିରୋଧରେ ଏକ ସଂକଳ୍ପ ଆଣିବାକୁ ହେବ । ଶାସକ ଦଳର ବିଧାୟକମାନେ ଲଗାତାର ବିରୋଧ ଜାରି ରଖିଥିବାରୁ ନରୱେକର ଗୃହକୁ ୧୦ ମିନିଟ୍ ଏବଂ ପରେ ୩୦ ମିନିଟ୍ ପାଇଁ ସ୍ଥଗିତ ରଖିଥିଲେ ।

ଗୃହକାର୍ଯ୍ୟ ପୁଣି ଥରେ ଆରମ୍ଭ ହେବା ପରେ ଥୋରାଟ କହିଛନ୍ତି ଯେ ଗାନ୍ଧୀଙ୍କ ବିରୋଧରେ ଯେଉଁ ବିରୋଧ ପ୍ରଦର୍ଶନ କରାଯାଇଥିଲା । ଏହା ଅତ୍ୟନ୍ତ ନିନ୍ଦନୀୟ । ଆଜି ଜଣେ ନେତାଙ୍କ ଫଟୋ ଉପରେ ଏମିତି କରାଯାଇଛି । କାଲି ଅନ୍ୟ କେଉଁ ନେତାଙ୍କ ଫଟୋରେ ଏମିତି ହେବ । ଯେଉଁମାନେ ବି ଏମିତି କରିଛନ୍ତି ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ କରାଯାଉ ।