ନୂଆଦିଲ୍ଲୀ ୦୮।୦୬: ଆଉ ଦିନକର ଅପେକ୍ଷା । ଜୁନ୍ ୯ରେ ହେବ ହାଇଭୋଲଟେଜ୍ ମ୍ୟାଚ୍ । ମୁହାଁମୁହିଁ ହେବେ ଭାରତ-ପାକ୍ । କିନ୍ତୁ ମ୍ୟାଚ୍କୁ ଘାରିଛି ଆତଙ୍କୀ ହମଲାର ଚିନ୍ତା । ISISର ଧମକ ଆସିବା ପରେ ପୁରା ସତର୍କ ନ୍ୟୁୟର୍କ । କିଛି ଦିନ ପୂର୍ବେ ଭାରତ-ପାକ୍ ମ୍ୟାଚ୍ରେ ଆତଙ୍କୀ ହମଲା ନେଇ ଆସିଥିଲା ଧମକ ।
କୁହାଯାଇଥିଲା କି ଲୋନ୍ ବୁଲ୍ଫ୍ ଆଟାକ୍ ହେବ । ଅର୍ଥାତ୍ କୌଣସି ସଂଗଠନ ନୁହେଁ ବରଂ ଏହି ଆଟାକ୍କୁ ଜଣେ ବ୍ୟକ୍ତି ହିଁ ସଫଳ କରିବ । ଏଥିପାଇଁ ନ୍ୟୁୟର୍କ ପୋଲିସ ପୁରା ସତର୍କ ରହିଛି। ଖାସ୍ କରି ନାସାଉ କାଉଣ୍ଟି ଷ୍ଟାଡିୟମ୍ ଏବଂ ଏହାର ଆଖପାଖ ଅଞ୍ଚଳରେ ସିକ୍ୟୁରିଟି ବଢାଇ ଦେଇଛି । ଆସନ୍ତୁ ଜାଣିବା କେମିତି ହୋଇଛି ସୁରକ୍ଷା ବ୍ୟବସ୍ଥା ? ଷ୍ଟାଡିୟମ୍କୁ କଣ କଣ ନେଇ ଯିବାରେ ଲାଗିଛି କଟକଣା ?
ନାସାଉ କାଉଣ୍ଟି ପୋଲିସ କମିଶନରଙ୍କ କହିଛନ୍ତି, "ଆମେ ସୁରକ୍ଷା ଉପରେ ତୀକ୍ଷ୍ଣ ନଜର ରଖିଛୁ। ଆମ ସହଭାଗୀମାନଙ୍କ ସହ ନିରନ୍ତର ଯୋଗାଯୋଗରେ ରହିଛୁ । କୁହାଯାଉଛି କି ପଡିଆକୁ ଏଣ୍ଟ୍ରି ଉପରେ ଲାଗିଛି ପ୍ରତିବନ୍ଧକ । ପଡିଆକୁ ଯାଉଥିବା ସମସ୍ତ ବ୍ୟକ୍ତିଙ୍କର କରାଯିବ କଡା ଚେକିଂ ।
ଏହାସହିତ ସବୁ ଜିନିଷର କରାଯିବ ଟିକ୍ନିକ୍ ଯାଞ୍ଚ। ପଡିଆକୁ ଏଣ୍ଟ୍ରି କରିବାକୁ ହେଲେ ସମସ୍ତ ଦର୍ଶକଙ୍କୁ କଡା ସୁରକ୍ଷା ପାର୍ କରି ଯିବାକୁ ପଡିବ । ଯେଉଁମାନଙ୍କ ପାଖରେ ଟିକେଟ୍ ନାହିଁ, ସେମାନେ ପଡିଆ ନିକଟରେ ଥିବା ସିଡର ପାର୍କରେ ଲାଗିଥିବା ବଡ ପରଦାରେ ଦେଖିପାରିବେ ଏହି ହାଇଭୋଲଟେଜ୍ ମ୍ୟାଚ୍ । ପାର୍କରେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।
ପୋଲିସର ସୂଚନାନୁସାରେ, ଲୋକମାନେ ସିଡର ପାର୍କ ଭିତରେ ବସି ମ୍ୟାଚ୍ ଦେଖିବା ପାଇଁ ବ୍ୟାଗ, କୁଲର ଏବଂ ଚେୟାର ଆଣିପାରିବେ । ପାର୍କର ବିଭିନ୍ନ ସ୍ଥାନରେ ସିକ୍ୟୁରିଟି ଚେକ୍ପଏଣ୍ଟ ଲାଗିଛି । ଏଥିରେ ଆତଙ୍କୀ ଉପରେ ରଖାଯିବ ନଜର । ତେବେ ମ୍ୟାଚ୍ ଖେଳାଯିବା ସମୟରେ ଷ୍ଟାଡିୟମ୍ ଏବଂ ଏହାର ଆଖପାଖ ଅଞ୍ଚଳକୁ ନୋ ଫ୍ଲାଇଙ୍ଗ୍ ଜୋନ୍ ଘୋଷଣା କରାଯାଇଛି ।
ଅନ୍ୟପଟେ ମ୍ୟାଚ୍ ସମୟରେ ପୋଲିସ ମଧ୍ୟ ବିମାନ ଉପରେ ନଜର ରଖିବା ସହ ତଦାରଖ କରିବ ।ରିପୋର୍ଟ ଅନୁଯାୟୀ, ଭାରତ-ପାକିସ୍ତାନ ମ୍ୟାଚରେ ଆତଙ୍କବାଦୀ ଆକ୍ରମଣ କରିବାର ଷଡଯନ୍ତ୍ର ଯୋଗୁଁ ଏପରି ନିଷ୍ପତ୍ତି ନିଆଯାଇଛି । ତେବେ ମ୍ୟାଚ୍ ସମୟରେ ଆତଙ୍କୀ ହମଲା ହେଉଛି କି ଏହା କେବଳ ଗୁଜବ ତାହା ତ ସମୟ କହିବ । କିନ୍ତୁ ସୁରକ୍ଷା ଦୃଷ୍ଟିରୁ ପୁରା ସଜାଗ ନ୍ୟୁୟର୍କ ପୋଲିସ ।