ମୁମ୍ବାଇ: ବାବା ସିଦ୍ଦିକିଙ୍କୁ ହତ୍ୟା ପରେ ତାଙ୍କର ସବୁଠୁ ଘନିଷ୍ଠ କୁହାଯାଉଥିବା ସଲମାନ ଖାନଙ୍କ ସୁରକ୍ଷାକୁ ନେଇ ନଭି ମୁମ୍ବାଇ ପୋଲିସ ସତର୍କ ହୋଇଛି। ପୋଲିସ ସଲମାନ ଖାନଙ୍କ ଘର ପରେ ଏବେ ଫାର୍ମ ହାଉସରେ ମଧ୍ୟ ସୁରକ୍ଷା ବଢ଼ାଇଛି। ସଲମାନଙ୍କ ଫାର୍ମ ହାଉସ ନଭି ମୁମ୍ବାଇର ପନଭେଲରେ ରହିଛି । ଏହା ସହ ପୋଲିସ ସ୍ଥାନୀୟ ଗ୍ରାମବାସୀଙ୍କ ଠାରୁ ଆରମ୍ଭ କରି ଗୁଇନ୍ଦା ଏଜେନ୍ସୀଙ୍କୁ ମଧ୍ୟ ସତର୍କ କରାଇଛି। ପୋଲିସ କହିଛି କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିବାକୁ ପାଇଲେ ତୁରନ୍ତ ସୂଚନା ଦିଅନ୍ତୁ । ସ୍ଥାନୀୟ ଗ୍ରାମବାସୀ ମଧ୍ୟ ପୋଲିସକୁ ସହଯୋଗ କରୁଛନ୍ତି।
ପୋଲିସର ସୂଚନା ଅନୁଯାୟୀ, ପନଭେଲ ସ୍ଥିତ ଫାର୍ମ ହାଉସ ଭିତରେ ଏବଂ ବାହାରେ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଛି। ଅନେକ ସ୍ଥାନରେ ନାକାବନ୍ଦୀ ମଧ୍ୟ କରାଯାଇ ଗାଡ଼ି ମଧ୍ୟ ଯାଞ୍ଚ କରାଯାଉଛି। ବିଶ୍ନୋଈ ଗ୍ୟାଙ୍ଗ ଏହା ପୂର୍ବରୁ ମଧ୍ୟ ଅନେକ ଥର ଫାର୍ମ ହାଉସର ରେକି କରିସାରିଛି। ଅବଶ୍ୟ ଫାର୍ମହାଉସରେ ସଲମାନଙ୍କୁ କ୍ଷତି ପହଞ୍ଚାଇବାରେ ସଫଳ ହୋଇନଥିଲେବି।ସଲମାନଙ୍କ ଘର ଗାଲାକ୍ସି ଆପାର୍ଟମେଣ୍ଟରେ ଫାୟାରିଂ ହୋଇସାରିଛି।
ସୂଚନାଥାଉକି, ବାବା ସିଦ୍ଦିକିଙ୍କ ହତ୍ୟା ପରେ ସଲମାନ ଖାନଙ୍କ ଆପାର୍ଟମେଣ୍ଟର ସୁରକ୍ଷା ବଢ଼ାଯାଇଥିଲା। ମହାରାଷ୍ଟ୍ରର ପୂର୍ବତନ ମନ୍ତ୍ରୀ ସିଦ୍ଦିକିଙ୍କୁ ବାଦ୍ରାର ନିର୍ମଳ ନଗର ନିକଟରେ ଗୁଳିମାଡ଼ ହୋଇଥିଲା। ପରେ ଶନିବାର ବିଳମ୍ବିତ ରାତିରେ ଲୀଳାବତୀ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ସଲମାନ ମଧ୍ୟ ଲୀଳାବତୀ ହସ୍ପିଟାଲ ପହଞ୍ଚି ସମ୍ବେଦନା ଜଣାଇବା ସହ ସିଦ୍ଦିକିଙ୍କ ପରିବାର ସହ ସାକ୍ଷାତ କରିଥିଲେ। ସଲମାନ ଖାନ ଅନେକ ସମୟରୁ ଲରେନ୍ସ ବିଶ୍ନୋଇର ଟାର୍ଗେଟରେ ଅଛନ୍ତି।
