ନୂଆଦିଲ୍ଲୀ, ୧୩/୦୩: ଆଜିଠୁ ଆରମ୍ଭ ହେଉଛି ଦ୍ବିତୀୟ ପର୍ଯ୍ୟାୟ ବଜେଟ୍ ଅଧିବେଶନ। ଦ୍ବିତୀୟ ପର୍ଯ୍ୟାୟ ବଜେଟ୍ ଅଧିବେଶନ ଏପ୍ରିଲ ୬ ତାରିଖ ଯାଏଁ ଚାଲିବ। ଏହି ଅଧିବେଶନରେ ୧୭ ଟି କାର୍ଯ୍ୟ ଦିବସ ରହିଥିବା ବେଳେ ୩୫ ଟି ବିଲ୍ ଆଣିବା ଲାଗି କେନ୍ଦ୍ର ସରକାର ଯୋଜନା ରଖିଛନ୍ତି।
ତେବେ ପ୍ରଥମ ପର୍ଯ୍ୟାୟ ଭଳି ବଜେଟ୍ ଅଧିବେଶନର ଦ୍ବିତୀୟ ପର୍ଯ୍ୟାୟ ମଧ୍ୟ ସରଗରମ ହେବା ସମ୍ଭାବନା ରହିଛି । ଏହା ପୂର୍ବରୁ ସଂସଦକୁ ସୁଚାରୁ ରୂପେ ଚଳେଇବା ପାଇଁ ସର୍ବଦଳୀୟ ବୈଠକ ଅନୁଷ୍ଠିତ ହୋଇଯାଇଛି। ରାଜ୍ୟସଭା ଅଧ୍ୟକ୍ଷ ଜଗଦୀପ ଧନକଡ଼ ବିଭିନ୍ନ ଦଳର ନେତାମାନଙ୍କ ସହିତ ଆଲୋଚନା କରିଛନ୍ତି। ସେପଟେ ଗୃହକୁ ଶୃଙ୍ଖଳିତ ଭାବେ ଚଳାଇବା ପାଇଁ ସବୁଦଳର ସହଯୋଗ ଲୋଡ଼ିଛନ୍ତି ଧନକଡ଼।
ଅପରପକ୍ଷରେ ବିରୋଧୀ ଦଳ ମଧ୍ୟ ଗୃହର ଅଧ୍ୟକ୍ଷଙ୍କ ସହଯୋଗ ଲୋଡ଼ିଛନ୍ତି। ରାଜ୍ୟସଭାରେ କଂଗ୍ରେସ ସଂସଦୀୟ ଦଳ ନେତା ମଲ୍ଲିକାର୍ଜୁନ ଖଡଗେ ଆଜି ବିରୋଧୀ ଦଳମାନଙ୍କର ଏକ ବୈଠକ ଡାକିଛନ୍ତି। ଅଧିବେଶନରେ କେଉଁ ପ୍ରସଙ୍ଗ ଉତଥାପନ କରିବେ ସେ ସଂପର୍କରେ ଆଲୋଚନା କରିବେ। କେନ୍ଦ୍ରୀୟ ସଂସ୍ଥା ଗୁଡ଼ିକର ଅପବ୍ୟବହାର ଅଭିଯୋଗ ନେଇ ବିରୋଧୀ ଦଳଗୁଡ଼ିକ କେନ୍ଦ୍ର ସରକାରଙ୍କ ଉପରେ ଚାପ ପ୍ରୟୋଗ କରିବେ ବୋଲି ପୂର୍ବରୁ ସୂଚନା ଦେଇଛନ୍ତି।
ଏହି ପ୍ରସଙ୍ଗ ପାର୍ଲାମେଣ୍ଟରେ ପୁଣି ଉଠିପାରେ। ବଜେଟ ଅଧିବେଶନର ମଧ୍ୟାନ୍ତର ସମୟରେ ଆମ ଆଦମି ପାର୍ଟି ନେତା ମନୀଷ ସିସୋଦିଆଙ୍କୁ ଇଡି ଗିରଫ କରିଥିବା ବେଳେ ଆରଜେଡି ନେତା ତେଜସ୍ବୀ ଯାଦବଙ୍କ ଘରେ ମଧ୍ୟ ଇଡି ଚଢ଼ାଉ କରିଛି, ବିଆରଏସ ନେତା କେ କବିତାଙ୍କୁ ମଧ୍ୟ ଜେରା କରିଛି। ତେଣୁ ବିରୋଧୀଦଳଗୁଡ଼ିକ ମିଳିତ ଭାବେ ଏହି ପ୍ରସଙ୍ଗ ଉଠାଇବାର ସମ୍ଭାବନା ରହିଛି। ସେହିପରି ରାହୁଲ ଗାନ୍ଧି ବିଦେଶରେ ଦେଇଥିବା ବକ୍ତବ୍ୟକୁ ମଧ୍ୟ ସରକାରୀ ପକ୍ଷ ପ୍ରସଙ୍ଗ କରିପାରନ୍ତି।
