ନୂଆଦିଲ୍ଲୀ: ସେୟାର ବଜାର ନିୟାମକ ସଂସ୍ଥା ସେବି ସେକେଣ୍ଡ୍ରି ମାର୍କେଟ ଟ୍ରେଡିଂ ନିୟମରେ ବଡ଼ ପରିବର୍ତ୍ତନ କରିଛି । ଏବେ ନିବେଶକ ସେକେଣ୍ଡ୍ରି ମାର୍କେଟରେ ମଧ୍ୟ ଟ୍ରେଡିଂ ସମୟରେ ଟଙ୍କା ବ୍ଲକ୍ କରି ପାରିବେ । ଗୁରୁତ୍ୱପୂର୍ଣ୍ଣ କଥା ହେଉଛି ଯେପର୍ଯ୍ୟନ୍ତ ଟଙ୍କା ବ୍ଲକ ହୋଇ ରହିବ, ତାହା ଉପରେ ସୁଧ ମିଳିବ । ପ୍ରଥମ ଥର ପାଇଁ ସେକେଣ୍ଡ୍ରି ମାର୍କେଟରେ ବ୍ଲକ୍ ଟଙ୍କା ଉପରେ ସୁଧ ପ୍ରଦାନର ନିଷ୍ପତ୍ତିକୁ ସେବି ମଞ୍ଜୁରୀ ଦେଇଛି । ଉଲ୍ଲେଖଯୋଗ୍ୟ ଯେ ଏହି ସୁବିଧା ଆଜି ଯାଏ କେବଳ ପ୍ରାରମ୍ଭିକ ସାର୍ବଜନୀନ ଅଫର (ଆଇପିଓ) ପାଇଁ ରହିଥିଲା ।

ଯେତେବେଳେ ଆପଣ ଆଇପିଓ କିଣିବା ପାଇଁ ଟଙ୍କା ନିବେଶ କରିନ୍ତି, ସେତେବେଳେ ସେୟାର ଆଲଟମେଣ୍ଟ ପର୍ଯ୍ୟନ୍ତ ଆପଣଙ୍କ ଟଙ୍କା ବ୍ଲକ ହୋଇ ରହିଥାଏ । ଯଦି ଆଇପିଓ ଆପଣଙ୍କୁ ମିଳେ ତେବେ ବ୍ଲକ ଟଙ୍କା ଆପଣଙ୍କ ଆକାଉଣ୍ଟରୁ କଟିଯିବ । ସେହିପରି ସେୟାର ନ ମିଳିବା ସ୍ଥିତିରେ ଟଙ୍କା ବ୍ୟଙ୍କ ଆକାଉଣ୍ଟକୁ ଫେରି ଆସିଥାଏ ।

ସେୟାର ବଜାରରେ ପୂର୍ବରୁ ଉପଲବ୍ଧ ସେୟାରର କିଣା-ବିକା ପ୍ରକ୍ରିୟା ସେକେଣ୍ଡ୍ରି ମାର୍କେଟରେ ହୋଇଥାଏ । ସରଳ ଶବ୍ଦରେ କହିବାକୁ ଗଲେ ବିଏସଇ ଏବଂ ଏନଏସଇରେ ଯେଉଁ କମ୍ପାନି ସୂଚୀବଦ୍ଧ ଅଛନ୍ତି, ସେମାନଙ୍କ ସେୟାର କିଣା-ବିକା ପ୍ରକ୍ରିୟାକୁ ସେକେଣ୍ଡ୍ରି ମାର୍କେଟ ଟ୍ରେଡିଂ କୁହାଯାଏ । ଏହି ଟେଡ୍ରିଂ ସିଧାସଳଖ କରିପାରିବେ ନାହିଁ । ଏଥିପାଇଁ ଜଣଙ୍କୁ ବ୍ରୋକର ସହାୟତା ନେବାକୁ ପଡ଼ିଥାଏ । ଏଣିକି ଏପରି ବଜାରରେ ଟ୍ରେଡିଂ ଉପରେ ଟଙ୍କା ବ୍ଲକ ସୁବିଧା ଦିଆଯାଇଛି । ଏହି ବ୍ୟବସ୍ଥାକୁ ASBA (ଆପଲିକେସନ ସପୋର୍ଟେଡ୍ ଭାଆ ବ୍ଲକଡ ଆମାଉଣ୍ଟ ) ମଧ୍ୟ କୁହାଯାଏ । ଏହି ନିଷ୍ପତ୍ତିର ଉଦ୍ଦେଶ୍ୟ ହେଉଛି ନିବେଶକଙ୍କ ଟଙ୍କାକୁ ସେୟାର ବ୍ରୋକରଙ୍କ ଦୁରୁପଯୋଗରୁ ସୁରକ୍ଷିତ ରଖିବା ।