ନୂଆଦିଲ୍ଲୀ ୨୮/୧୧ : ଭାରତୀୟ ନୌସେନାର ମିଗ୍-୨୯ ଲଡାଖୁ ବିମାନ ଆରବ ସାଗରରେ ଦୁର୍ଘଟଣାଗ୍ରସ୍ତ ହେବା ପରେ ନିଖୋଜ ପାଇଲଟ ନିଶାନ୍ତ ସିଂହଙ୍କୁ ଖୋଜାଖୋଜି ଜାରି ରହିଛି । ନୌସେନାର ଜଣେ ପ୍ରବକ୍ତା କହିଛନ୍ତି ମିଗ୍-୨୯ ବିମାନର ପାଇଲଟ ନିଖୋଜ ହେବାର ୪୦ ଘଣ୍ଟା ପରେ ମଧ୍ୟ ସେନା ପକ୍ଷରୁ ଖୋଜାଖୋଜି ଚାଲୁ ରହିଛି ।

ସେ କହିଛନ୍ତି, ଉଦ୍ଧାର କାର୍ଯ୍ୟ ପାଇଁ ଆହୁରି ଅଧିକ ସଂଖ୍ୟକ ବିମାନ ଏବଂ ସେନାଙ୍କୁ ନିୟୋଜିତ କରାଯାଇଛି । ସୂଚନା ଅନୁସାରେ ଆଇଏନଏସ ବିକ୍ରମାଦିତ୍ୟରୁ ଦୁଇ ଜଣ ପାଇଲଟଙ୍କ ସହିତ ଲଡାଖୁ ବିମାନ ଉଡାଣ ଭରିଥିଲା । ତେବେ କିଛି ସମୟ ପରେ ଆରବ ସାଗରରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା । ତେବେ ବିମାନରେ ଥିବା ଦୁଇ ପାଇଲଟଙ୍କ ମଧ୍ୟରୁ ଟ୍ରେନର ପାଇଲଟଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା । କିନ୍ତୁ କମାଣ୍ଡର ନିଶାନ୍ତ ସିଂହ ଏବେ ମଧ୍ୟ ନିଖୋଜ ଅଛନ୍ତି ।

ଜଣେ ଅଧିକାରୀ କହିଛନ୍ତି ଯେ ବାୟୁ ଏବଂ ସ୍ଥଳ ୟୁନିଟ୍ ଦ୍ୱାରା ସର୍ଚ୍ଚ ଅପରେସନ୍ ଚାଲିଛି। ଗୁରୁବାର ସନ୍ଧ୍ୟା ପ୍ରାୟ ପାଞ୍ଚଟା ବେଳେ ଘଟିଥିବା ଘଟଣାର ତଦନ୍ତ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି । INS ବିକ୍ରମଦିତ୍ୟ ମାଲାବାର ଅଭ୍ୟାସରେ ଦ୍ୱିତୀୟ ପର୍ଯ୍ୟାୟର ଅଂଶ ଥିଲା ଯେଉଁଥିରେ ଭାରତ, ଆମେରିକା, ଅଷ୍ଟ୍ରେଲିଆ ଏବଂ ଜାପାନର ନୌସେନା ସାମିଲ ଥିଲେ । ୧୭ ରୁ ୨୦ ନଭେମ୍ବରରେ ଅନୁଷ୍ଠିତ ହେବାକୁ ଥିବା ଏହି ବୃହତ ନୌସେନା ଅଭ୍ୟାସରେ ମିଗ୍ -29 ବିମାନ ମଧ୍ୟ ସାମିଲ ଥିଲା ।