ସାଲେପୁର ୦୨।୧୨: ସ୍କୁଲ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରିଛନ୍ତି । କିନ୍ତୁ ଏବେ ସ୍କୁଲରେ ପିଲାଙ୍କ ଉପସ୍ଥାପନ ଅଭାବରୁ ସେସବୁ ବନ୍ଦ କରି ନିକଟରେ ଥିବା ସ୍କୁଲ ସହିତ ମିଶ୍ରଣ କରିବାକୁ ନିଷ୍ପତ୍ତି ନେଇଛନ୍ତି । ତେବେ ବନ୍ଦ ହେବାକୁ ଯାଉଥିବା ବିଦ୍ୟାଳୟରେ ଉତ୍କଳ ଗୌରବ ମଧୂସୂଦନ ଦାସଙ୍କ ଗାଁ ସ୍କୁଲ ରହିଛି । ଯାହା ସତ୍ୟଭାମାପୁର ସରକାରୀ ବାଳକ ପ୍ରାଥମିକ ବିଦ୍ୟାଳୟ ଭାବେ ନାମିତ ଅଛି ।
ସତ୍ୟଭାମାପୁର ସରକାରୀ ବାଳକ ପ୍ରାଥମିକ ବିଦ୍ୟାଳୟ ୧୧୫ ବର୍ଷର ପୂରଣା ସ୍କୁଲ । ଯାହାକୁ ମଧୁ ବାବୁ ନିଜେ ଗଢିଥିଲେ । ଏହି ବିଦ୍ୟାଳୟ ଅନେକ ଭଲ ମଣିଷ ଗଢିବାରେ ସହାୟକ ହୋଇଛି । କିନ୍ତୁ ଆଜି ସେହି ବିଦ୍ୟାଳୟରେ ୨୦ରୁ କମ୍ ପିଲା ଥିବା ଦର୍ଶାଇ ବନ୍ଦ କରିବାକୁ ଏକ ତାଲିକା ପ୍ରକାଶ ପାଇଛି । ଯଦି ସ୍କୁଲ ବନ୍ଦ ହୁଏ , ତେବେ ବହୁ ଛୋଟ ଛୋଟ ପିଲା ଅନେକ ଅସୁବିଧାର ସମ୍ମୁଖୀନ ହେବ ବୋଲି ସ୍ଥାନୀୟ ଲୋକେ କହିଛନ୍ତି ।
ସାଲେପୁର ବ୍ଲକ ଅନ୍ତର୍ଗତ ମଧୁବାବୁଙ୍କ ଗାଁ ସତ୍ୟଭାମାପୁର ଗାଁରେ ଶିକ୍ଷାର ବିକାଶ ପାଇଁ ୨ଟି ବିଦ୍ୟାଳୟ ସ୍ଥାପନ କରାଯାଇଥିଲା। ଗୋଟିଏ ବିଦ୍ୟାଳୟ ୧୯୦୫ରେ ସତ୍ୟଭାମାପୁର ବାଳକ ବିଦ୍ୟାଳୟ ଭାବେ ସ୍ଥାପିତ ହୋଇଥିଲା । ଅନ୍ୟଟି ୧୯୧୧ରେ ମଧୁବାବୁଙ୍କ ନାଁରେ ଉତ୍କଳ ଗୌରବ ମଧୂସୂଦନ ସରକାରୀ ବାଳିକା ଉଚ୍ଚ ପ୍ରାଥମିକ ବିଦ୍ୟାଳୟ । ଅନେକ ମଣିଷ ତିଆରି କରିଛି ଏହି ବିଦ୍ୟାଳୟ । ଏପରିକି ମଧୁବାବୁଙ୍କ ଅନେକ ସ୍ମତିର ମୂକସାକ୍ଷୀ ରହିଛି ଏହି ସ୍କୁଲ।
ସତ୍ୟଭାମାପୁର ବାଳକ ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପିଲା ପାଠ ପଢନ୍ତି । କିନ୍ତୁ ସତ୍ୟଭାମାପୁର ବାଳକ ବିଦ୍ୟାଳୟରେ ଏବେ ମାତ୍ର ୧୫/୧୬ ଜଣ ପିଲା ପାଠ ପଢୁଛନ୍ତି। ଯାହାଫଳରେ ସରକାରୀ ସ୍ତରରେ ଏହି ବିଦ୍ୟାଳୟକୁ ବନ୍ଦ କରି ନିକଟସ୍ଥ ମଧୁବାବୁଙ୍କ ନାଁରେ ଗଢି ଉଠିଥିବା ବାଳିକା ବିଦ୍ୟାଳୟ ସହିତ ମିଶ୍ରଣ କରାଯିବ ବୋଲି ନିଷ୍ପତ୍ତି ନିଆଯାଇଛି । ମଧୁମାଟିର ଏହି ପୁରାତନ ତଥା ୧୧୫ ବର୍ଷର ସ୍କୁଲ ବନ୍ଦ ନହେବା ପାଇଁ ସ୍ଥାନୀୟ ବିଧାୟକ ସବୁସ୍ତରରେ ଚେଷ୍ଟା କରିବେ ବୋଲି କହିଛନ୍ତି।
