ନୂଆଦିଲ୍ଲୀ: ସାଉଦି ଆରବରେ କ୍ରାଉନ ପ୍ରିନ୍ସ ତଥା ପ୍ରଧାନମନ୍ତ୍ରୀ ମହମ୍ମଦ ବିନ ସଲମାନଙ୍କ ଶାସନ ଗାଦିରେ ବସିବା ପରଠୁ ଦେଶରେ ମୃତ୍ୟୁଦଣ୍ଡ ହାର ଦ୍ୱିଗୁଣିତ ହୋଇଛି । ଏକ ସଦ୍ୟ ରିପୋର୍ଟରେ ଏହା ଦାବି କରାଯାଇଛି । ବିନ ସଲମାନ ଦୁନିଆରେ ଜଣେ ସୁଧାରବାଦୀ ଏବଂ ବ୍ୟକ୍ତିର ସ୍ୱାଧୀନତା ସହ ଆଧୁନିକୀକରଣକୁ ଗୁରୁତ୍ୱ ଦେଉଥିବା ଶାସକ ରୂପେ ନିଜର ଛବିକୁ ଗଢିବାକୁ ପ୍ରୟାସ କରୁଛନ୍ତି । ଅନ୍ୟପଟେ କିନ୍ତୁ ମୃତ୍ୟୁ ଦଣ୍ଡ କମ ହେବା ପରିବର୍ତ୍ତେ ବଢିବାରେ ଲାଗିଛି । ଗତ ବର୍ଷ ସାଉଦି ଆରବରେ ମୃତ୍ୟୁ ଦଣ୍ଡ ପାଇଥିବା ଲୋକଙ୍କ ସଂଖ୍ୟା ୨୦୨୧ ତୁଳନାରେ ଦ୍ୱିଗୁଣ ଥିଲା ।

ରିପୋର୍ଟର ଦାବି ଅନୁସାରେ କ୍ରାଉନ ପ୍ରିନ୍ସଙ୍କ ରାଜନୈତିକ ବିରୋଧୀଙ୍କୁ ଅସନ୍ତୋଷ ପାଇଁ ଜିରୋ ଟଲରାନ୍ସର ସାମନା କରିବାକୁ ପଡୁଛି । ବିନ ସଲମାନ ଦେଶର ଉଦ୍ୟୋଗପତି, ବ୍ୟବସାୟୀ ଏବଂ ଧନିକ ପରିବାର ଗୁଡିକୁ ଅସାଧାରଣ ଶକ୍ତି ପ୍ରଦାନ କରିଛନ୍ତି । ଦ ଗାର୍ଡିୟନର ରିପୋର୍ଟ ଅନୁସାରେ, ସାଉଦି କ୍ରାଉନ ପ୍ରିନ୍ସ ମୃତ୍ୟୁ ଦଣ୍ଡରେ ଅଙ୍କୁଶ ଲଗାଇବା ନେଇ ଦେଇଥିବା ପ୍ରତିଶ୍ରୁତିକୁ ପାଳନ କରିନାହାନ୍ତି ।

୨୦୧୫ରୁ ୨୦୨୨ ମଧ୍ୟରେ ପ୍ରତିବର୍ଷ ହାରାହାରି ୧୨୯ ଜଣଙ୍କୁ ଫାଶୀ ଦିଆଯାଇଛି । ଏହି ସଂଖ୍ୟାରେ ୨୦୧୦-୧୪ ମଧ୍ୟରେ ୮୨ ପ୍ରତିଶତ ବୃଦ୍ଧି ରେକର୍ଡ ହୋଇଥିଲା । ଗତ ବର୍ଷ ୧୪୭ ଜଣଙ୍କୁ ଫାଶୀରେ ଝୁଲା ଯାଇଥିଲା । ଏଥି ମଧ୍ୟରୁ ମାତ୍ର ୯୦ ମାମଲାକୁ ହିଁ ହିଂସାତ୍ମକ ବୋଲି ଧରାଯାଇଥିଲା ।

ଗତ ବର୍ଷ ମାର୍ଚ୍ଚ ୧୨ରେ ୮୧ ଜଣଙ୍କୁ ମୃତ୍ୟୁ ଦଣ୍ଡ ଦିଆଯାଇଥିଲା । ଗୋଟିଏ ଦିନରେ ମୃତ୍ୟୁ ଦଣ୍ଡ ମାମଲାରେ ଆଜି ଯାଏ ଏହା ସର୍ବାଧିକ ଅଟେ । ସାଉଦି ଆରବରେ ଫାଶୀ ସହ ମୁଣ୍ଡ କାଟି ମୃତ୍ୟୁ ଦଣ୍ଡ ଦିଆଯାଇଥାଏ । ଅଧିକାଂଶ ସମୟରେ ଏହିପରି କ୍ରୁରତା ଦୁନିଆ ସାମନାକୁ ଆସିପାରି ନଥାଏ, କାରଣ ଆରବ ଦେଶରେ ମୁକ୍ତ ଗଣମାଧ୍ୟମ ନାହିଁ ।