ନୂଆଦିଲ୍ଲୀ ୧୫।୧୧: ଭାରତୀୟ ବ୍ୟବସାୟ ଜଗତର ଏକ ବଡ ନାଁ ସୁବ୍ରତ ରାୟ । ଲୋକମାନଙ୍କ ସାହାରା ଶ୍ରୀ ହୋଇଯାଇଛନ୍ତି ଅସ୍ତ । ଚିଟଫଣ୍ଡରୁ ବୀମା, କ୍ରୀଡ଼ା, ଏୟାରଲାଇନସ୍, ହୋଟେଲ, ବିୟୁଟି ପ୍ରଡକ୍ଟ, ଗଣମାଧ୍ୟମ ସଂସ୍ଥା, ସବୁ କିଛିରେ ଥିଲା ସାହାରାର ଦବଦବା । ରାଜନେତାଙ୍କ ମଧ୍ୟରେ ତାଙ୍କର ଯେତିକି ଦବ୍‌ଦବା ଥିଲା କ୍ରୀଡ଼ାବିତ, ଫିଲ୍ମ ଷ୍ଟାରଙ୍କ ସହ ଥିଲା ସୁବ୍ରତଙ୍କ ଅତି ଘନିଷ୍ଠତା ।  କ୍ରିକେଟ୍ ଏବଂ ହକି ପ୍ରତି ଥିଲା ତାଙ୍କର ଦୁର୍ବଳତା ।

ଲଣ୍ଡନରୁ ନ୍ୟୁୟର୍କ ପର୍ଯ୍ୟନ୍ତ କିଣିଥିଲେ ସମ୍ପତ୍ତି । ତାଙ୍କ ପୁଅମାନଙ୍କ ବିବାହ ଏବେ ବି ଦେଶର ସବୁଠାରୁ ବଡ ବିବାହ ବୋଲି ବିବେଚନା କରାଯାଏ । ଏହି ଦିଗ୍ଗଜ ବ୍ୟବସାୟୀଙ୍କର ସାହାରାର ଯାତ୍ରା ସାଇକେଲରୁ ହୋଇଥିଲା ଆରମ୍ଭ  । ୧୦ ଜୁନ୍ ୧୯୪୮ରେ ବିହାର ଆରାରିଆରେ ଜନ୍ମ ହୋଇଥିଲେ ସୁବ୍ରତ । ଉତ୍ତରପ୍ରଦେଶ ଗୋରଖପୁରରୁ ଆରମ୍ଭ କରିଥିଲେ ନିଜ ଚିଟଫଣ୍ଡ ସଂସ୍ଥାର ପରିକଳ୍ପନା ।

୧୯୭୮ରେ ଜଣେ ବନ୍ଧୁଙ୍କ ସହ ମିଶି ଏକ ଚିଟ୍ ଫଣ୍ଡ କମ୍ପାନୀ ଆରମ୍ଭ କରିଥିଲେ । ସାଇକେଲରେ ବୁଲି ବୁଲି ଲୋକଙ୍କ ପାଖରୁ ଆଦାୟ କରୁଥିଲେ ଟଙ୍କା । ଆଉ ତାକୁ ନିବେଶ କରି ଡବଲ୍ କରିବାର ସ୍ୱପ୍ନ ଦେଖାଇଥିଲେ ସୁବ୍ରତ୍‌ । ଗରିବଙ୍କ ସେହି ସ୍ବପ୍ନ ପୂରଣ ବି କରିଥିଲେ ସାହାରା ଶ୍ରୀ । ଗୋଟିଏ ରୁମ୍‌ ୨ଟି ଚେୟାରରୁ ଆରମ୍ଭ ହୋଇଥିବା ଏହି କମ୍ପାନୀ  ମାତ୍ର କିଛି ସମୟରେ ସାରା ଦେଶରେ ହୋଇଥିଲା ଲୋକପ୍ରିୟ । ଏହାପରେ ସହରରୁ ସହର ଏବଂ ଗାଁକୁ ହୋଇଥିଲା ବିସ୍ତାର ।  

ମଧ୍ୟବିତ୍ତରୁ ନିମ୍ନବର୍ଗର ଲୋକମାନେ ସାହାରା ଉପରେ ପୁରା ବିଶ୍ୱାସ କଲେ ଏବଂ ସାହାରାରେ ନିବେଶ କରିଥିଲେ ।  ଶ୍ରମିକଙ୍କଠୁ ମାତ୍ର ୨ ଟଙ୍କା କରି ଆଦାୟ କରୁଥିବା କମ୍ପାନିରେ ଦିନେ ବଡ ବଡ ଲୋକ ବି ନିବେଶ କଲେ । ଚାହୁଁଚାହୁଁ କମ୍ପାନୀ ପାଲଟି ଯାଇଥିଲା ଦେଶର ସବୁଠୁ ବଡ଼ କମ୍ପାନୀ । ରେଲୱେ ପରେ ସବୁଠୁ ଅଧିକ ନିଯୁକ୍ତି ସାହାରା ଦେଇଥିଲା ।

୨୦୧୨ରୁ ସୁବ୍ରତ ରାୟଙ୍କ ଖରାପ ସମୟ ଆରମ୍ଭ ହୋଇଥିଲା । ବେଆଇନ ଅର୍ଥ କାରବାର, ଲୋକଙ୍କ ଟଙ୍କା ଠକିଥିବା ଅଭିଯୋଗ ପରେ ତଦନ୍ତ ଆରମ୍ଭ କରିଥିଲା SEBI । ଏପରିକି SEBI ତଦନ୍ତ ବେଳେ ୧୨୮ଟି ଟ୍ରକରେ ଭର୍ତ୍ତି ଡକ୍ୟୁମେଣ୍ଟ ଆଣି ଚର୍ଚ୍ଚାକୁ ଆସିଥିଲେ ସୁବ୍ରତ ରାୟ । ଆଇନ ଜାଲରେ ଛନ୍ଦି ହେବା ପରେ ସାହାରାର ପ୍ରାୟ ସବୁ ବ୍ୟବସାୟ ବନ୍ଦ ହୋଇଥିଲା ।

ସୁବ୍ରତ ରାୟ ଲୋକଙ୍କ ଟଙ୍କା ଠକିଥିବା ଅଭିଯୋଗ ପରେ ୨୦୧୪ ଗିରଫ ହୋଇ ତିହାର ଜେଲ ବି ଯାଇଥିଲେ । କିନ୍ତୁ କିଛି ଦିନ ପରେ ଜାମିନରେ ଆସିଥିଲେ ।  ତେବେ ସାହାରା ଚିଟଫଣ୍ଡର ପଇସା ଫେରି ପାଇବା ପାଇଁ କେନ୍ଦ୍ର ସରକାର କିଛି ମାସ ତଳେ ରିଫଣ୍ଡ୍ ୱେବସାଇଟ୍ ଆରମ୍ଭ କରିଥିଲେ । ଏବେ ତାଙ୍କ ଦେହାନ୍ତ ପରେ ଏ ପ୍ରକ୍ରିୟା କିପରି ପରିଚାଳନା ହେବ ତାକୁ ନେଇ ଦ୍ୱନ୍ଦ୍ୱ ଦେଖାଦେଇଛି ।

You Can Read: