ଭୁବନେଶ୍ୱର ୧୬।୦୯ : ଫ୍ରାଞ୍ଚାଇଜ୍‌ ଦେବାର ପ୍ରଲୋଭନ ଦେଖାଇ ୨ କୋଟିରୁ ଅଧିକ ଟଙ୍କା ଠକେଇ  କରିଥିବା ଜଣେ କୁଖ୍ୟାତ ଠକକୁ ଗିରଫ କରିଛି ସ୍ପେଶାଲ  କ୍ରାଇମ ୟୁନିଟ୍‌ ଥାନା । ଗିରଫ ଠକ ଜଣଙ୍କ ହେଲେ  ହାଫରକ ଟେକ୍ନୋଲାଜି ପ୍ରାଇଭେଟ ଲିମିଟେଡର ନିର୍ଦ୍ଦେଶକ ସଚ୍ଚିଦାନନ୍ଦ ଭୋଇ । ଘର ସମ୍ବଲପୁର ଜିଲ୍ଲା ଅଇଁଠାପାଲ୍ଳି  ସ୍ଥିତ କେନ୍ଦୁପାଲି ଅଞ୍ଚଳରେ ।

ଖବର ଅନୁଯାୟୀ, ୩୦ ଜଣଙ୍କ ଠାରୁ ସେ ଠକେଇ  କରିଥିବା ଜଣାପଡିଛି । ପୁଲିସ୍‌ ତା’ଠାରୁ ବହୁ କାଗଜପତ୍ର  ଓ ଏକ ଦାମୀ କାର୍‌ ଜବତ କରିଛି ।  ସଚ୍ଚିଦାନନ୍ଦଙ୍କ ଶିକ୍ଷାଗତ ଯୋଗ୍ୟତା ବି.ଟେକ  ସହ ଏମ୍‌ବିଏ । ସେ ୨୦୧୭ ମସିହାରେ ହାଫରକ  ଟେକ୍ନୋଲାଜି ପ୍ରାଇଭେଟ ଲିମିଟେଡ୍‌ ନାମରେ ସେ ଏକ  କମ୍ପାନୀ ଖୋଲିଥିଲେ । ଏସପ୍ଲାନେଡ୍‌ ମଲରେ ଏହାର ଏକ  ଅଫିସ ରହିଛି । ରେଜିଷ୍ଟ୍ରାର୍‌ ଅଫ କମ୍ପାନୀ (ଆରଓସି) ରେ  ପଞ୍ଜିକୃତ ବି ଅଛି । ପତ୍ନୀ ଅନୀତା ପୋଢୱାଲ ଉକ୍ତ ସଂସ୍ଥାରେ  ନିର୍ଦ୍ଦେଶକ ଅଛନ୍ତି । ଗୋ ଆଣ୍ଡ ଗୋ ସ୍ପିଡ ଅଧୀନରେ  ଉକ୍ତ କମ୍ପାନୀ କାର୍ଯ୍ୟ କରୁଥିଲା।

ବିଭିନ୍ନ କର୍ମଚାରୀ ଏବଂ  ବିସ୍ତୃତ ମାର୍କେଟିଂ ଅଭିଯାନ ମାଧ୍ୟମରେ ଲୋକଙ୍କୁ ବଡ  ବଡ଼ ହୋଟେଲକୁ ଡକାଇ ସମ୍ମିଳନୀ କରି ପ୍ରଲୋଭିତ  କରୁଥିଲେ । ଅଧିକ ବିଶ୍ୱାସଭାଜନ ହେବାକୁ ଏହା  ପ୍ରଧାନମନ୍ତ୍ରୀ ରୋଜଗାର ଯୋଜନା, ଷ୍ଟାର୍ଟଅପ ଓ ଷ୍ଟାଣ୍ଡ ଅପ  ଓଡ଼ିଶାର ପ୍ରମୁଖ କାର୍ଯ୍ୟକ୍ରମ ବୋଲି ଲୋକଙ୍କୁ କହିବା ସହ  ସୋସିଆଲ୍‌ ମିଡିଆରେ ବିଜ୍ଞାପନ ଦେଉଥିଲେ । ୧୦ ଲକ୍ଷ  ଟଙ୍କା ନିବେଶ କଲେ କୋଟିପତି ହୋଇଯିବ ବୋଲି ମଧ୍ୟ  ପ୍ରତିଶ୍ରୁତି ଦେଉଥିଲେ ।

ତା’ଛଡା ବିଭିନ୍ନ ଉପକରଣ ସହିତ  କଷ୍ଟମାଇଜ୍‌ ଯାନ କ୍ରୟ, ଏଣ୍ଡ-ଟୁ-ଏଣ୍ଡ ଅଟୋମୋବାଇଲ  ପାଇଁ ଉପଯୁକ୍ତ ସାରଞ୍ଜାମ, ମରାମତି ସେବା ପାଇଁ କମ୍ପାନୀ ପକ୍ଷରୁ ତିନୋଟି ମେକାନିକ୍ସ ସହିତ ଡ୍ରାଇଭର ଯୋଗାଇବା  ଏବଂ ଦଶଟି ମୋବାଇଲ ସେବା ୟୁନିଟର କାର୍ଯ୍ୟକୁ ସୁଗମ  କରିବାକୁ ମଧ୍ୟ ନିବେଶକଙ୍କୁ କହୁଥିଲେ । ଯେଉଁମାନେ  ଫ୍ରାଞ୍ଚାଇଜ ନେବେ ସେମାନେ ମାସିକ ୧.୩ ଲକ୍ଷ ଟଙ୍କା  ରୋଜଗାର କରିପାରିବେ ବୋଲି କହି ଲକ୍ଷ ଲକ୍ଷ ଟଙ୍କା  ଆଦାୟ କରିଥିଲେ ।

ସବୁଠାରୁ ବଡ଼ କଥା ହେଲା ଜିଲ୍ଲା  ଶିଳ୍ପ କେନ୍ଦ୍ର (ଡିଆଇସି) କୁ ଋଣ ଆବେଦନ କରିବାକୁ  ମଧ୍ୟ କହିଥିଲେ । କିଛି କ୍ଷେତ୍ରରେ ଅଭିଯୁକ୍ତ ଲୋକମାନଙ୍କୁ  ଦେଇଥିବା ପ୍ରତିଶ୍ରୁତି ପାଳନ କରିଥିଲେ । ହେଲେ ଅଧିକାଂଶ  କ୍ଷେତ୍ରରେ ଫେଲ୍‌ ମାରିଥିଲେ । ଏନେଇ ବିଭିନ୍ନ ବ୍ୟକ୍ତି ଓ  କମ୍ପାନୀଗୁଡିକ ତାଙ୍କ ନାଁରେ ଅଭିଯୋଗ କରିବା ପରେ  ପୁଲିସ୍‌ ତାଙ୍କୁ ଗିରଫ କରିଛି ।