ନୂଆଦିଲ୍ଲୀ: ୟୁକ୍ରେନ ଉପରେ ଋଷର ଘାତକ କ୍ଷେପଣାସ୍ତ୍ର ମାଡ଼ । ରୁଷ ସେନା ୟୁକ୍ରେନ ସହର ଉପରେ ଘନଘନ ମିସାଇଲ ମାଡ଼ କରିଛି । ରୁଷ ପକ୍ଷରୁ କିଭ୍ ଓ ଖାରକିଭର ଜନବସତି ଅଂଚଳରେ ମିସାଇଲ ଷ୍ଟ୍ରାଇକ୍ ଯୋଗୁ ପ୍ରାୟ ୧୪ଜଣଙ୍କ ମୃତ୍ୟୁ ହୋଇଛି । ବ୍ଲାଷ୍ଟରେ ଅନେକ ପ୍ରତିଷ୍ଠାନ ଧ୍ବଂସ ହୋଇଛି ।
ସୂଚନା ଅନୁଯାୟୀ, ନିପ୍ରୋ ସହରରେ ହୋଇଥିବା ମିସାଇଲ ମାଡ଼ରେ ସବୁଠାରୁ କ୍ଷୟକ୍ଷତି ହୋଇଛି। ଏକ ୯ ମହଲା କୋଠାକୁ ଟାର୍ଗେଟ୍ କରି କ୍ଷେପଣାସ୍ତ୍ର ମାଡ଼ କରାଯାଇଛି । ଏଥିରେ ୧୪ଜଣଙ୍କର ମୃତ୍ୟୁ ହୋଇଥିବା ବେଳେ ୬୦ରୁ ଅଧିକ ଆହତ ହୋଇଛନ୍ତି । ୩୭ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି । ମୃତକଙ୍କ ମଧ୍ୟରେ କିଛି ଛୋଟ ପିଲାଥିବା ମଧ୍ୟ ସୂଚନା ମିଳିଛି । ଧ୍ୱଂସାବଶେଷ ତଳୁ ଲୋକଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ଏବେ ବି ଭଗ୍ନସ୍ତୁପ ତଳେ ଲୋକମାନେ ଫଶି ରହିଥିବା ଆଶଙ୍କା କରାଯାଉଛି। ଉଦ୍ଧାରକାରୀ ଉଦ୍ଧାର କାର୍ଯ୍ୟାରେ ଲାଗିପଡ଼ିଛନ୍ତି । ଲୋକଙ୍କୁ ସୁରକ୍ଷତ ଭବେ ଉଦ୍ଧାର କରାଯାଉଛି।
ନିପ୍ରୋ ବ୍ୟତିତ କିଭ୍ ଓ ଅନ୍ୟ ଗୁରୁତ୍ୱପୂର୍ଣ୍ଣ ସହରଗୁଡ଼ିକରେ ଥିବା ଏକାଧିକ ପ୍ରତିଷ୍ଠାନକୁ ମଧ୍ୟ ରୁଷ ମିସାଇଲ ମାଡ଼ କରିଛି। ଫଳରେ ବିଜୁଳି ଓ ପାଣି ଭିତ୍ତିଭୂମି କ୍ଷତିଗ୍ରସ୍ତ ହୋଇଛି ରୁଷ ଆଟାକ କରିଥିବା ୩୩ ମିସାଇଲରୁ ୟୁକ୍ରେନ ସେନା ୨୧ଟିକୁ ମାରି ଖସାଇଥିବା ୟୁକ୍ରେନ ରାଷ୍ଟ୍ରପତି ଭ୍ଲାଦିମିର ଜେଲେନସ୍କି କହିଛନ୍ତି । ରୁଷର ଏପରି ମିସାଇଲ ମାଡ଼କୁ ନିନ୍ଦା କରିବା ସହ ପଶ୍ଚିମ ଦେଶଗୁଡ଼ିକୁ ପୁଣିଥରେ ସହଯୋଗ ପାଇଁ ନିବେଦନ କରିଛନ୍ତି ଜେଲେନସ୍କି।..
