ନୂଆଦିଲ୍ଳୀ, ୩୧/୦୧: ୟୁକ୍ରେନର ବଖମୁଟ୍‌ ସହରର ଉତ୍ତରରେ ଥିବା ଏକ ଗ୍ରାମକୁ ନିଜ ଅକ୍ତିଆରକୁ ନେଇଥିବା ଦାବି କରିଛି ଋଷ। ଏଠାରେ ଏବେବି ଉଭୟ ଦେଶର ସେନା ବର୍ତ୍ତମାନ ଯୁଦ୍ଧ ଜାରି ରହିଛି। ବ୍ଲାଗୋଡାଟନି ଗ୍ରାମ ସୋଲିଡାରର ସଲ୍ଟ-ମାଇନିଂ ସହର ନିକଟରେ ରହିଛି। ସୋଲିଡାର ସହରକୁ ନିକଟରେ ଋଷିଆ ସୈନ ନିଜ ଅକ୍ତିଆରକୁ ନେଇଥିଲେ। ଆଉ ମଙ୍ଗଳବାର ଋଷ ଏହି ଗ୍ରାମକୁ ଅକ୍ତିଆର କରିଥିବା ନେଇ କହିଛି ଋଷ ପ୍ରତିରକ୍ଷା ମନ୍ତ୍ରାଳୟ। ଏହାପୂର୍ବରୁ ଶନିବାର ଋଷ ଓ୍ବାଗନର ଗ୍ରୁପ୍ ବ୍ଲାଗୋଡାଟନି ଉପରେ ଋଷ ସେନା କବ୍ଜା କରିଥିବା ନେଇ କହିଥିଲା। କିନ୍ତୁ କିଭ୍ କହିଥିଲା ଗାଁ ଉପରେ ହୋଇଥିବା ଆକ୍ରମଣକୁ ପ୍ରତ୍ୟାହାର କରିନେଇଛି।

ପ୍ରକୃତରେ ମସ୍କୋ ଗୁରୁତ୍ବପୂର୍ଣ୍ଣ ଡୋନବାସକୁ କବ୍ଜା କରିବାକୁ ଚାହୁଛି। ଏଥିପାଇଁ ୟୁକ୍ରେନ ଉପରେ ଆକ୍ରମଣ ପରଠାରୁ ହିଁ ଋଷ ଡୋନବାସ୍‌କୁ ଅକ୍ତିଆର କରିବାକୁ ଚେଷ୍ଟା କରୁଛି। ଆଉ ଏବେ ବାଖମୁଟ୍‌ ଯୁଦ୍ଧର ନୂଆ ସ୍ଥାନ ପାଲଟିଛି। ପୂର୍ବରୁ ଋଷ ଲୁହାନ୍ସକ ଉପରେ କବ୍ଜା କରିସାରିଛି। ଅଧା ଡୋନେସ୍କର ଏବେବି ୟୁକ୍ରେନ୍‌ ଅଧୀନରେ ରହିଛି। ସେପଟେ ବ୍ରିଟେନର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଋଷ ସୈନ୍ୟମାନେ ପଶ୍ଚିମ ଡୋନେସ୍କର ଭୁହୁଲଦାର ଏବଂ ପାଭଲିଭ୍କା ସହରରେ ଆଗକୁ ବଢ଼ୁଛନ୍ତି କିନ୍ତୁ ଏଠାରେ ସଫଳତା ପାଇବା ସମ୍ଭବ ନୁହେଁ।

ବେଲାରୁସ ସହ ମିଶି ସାମରିକ ତାଲିମ୍ କେନ୍ଦ୍ର ପ୍ରତିଷ୍ଠା କରିବ୍‌ ଋଷ:

ମଙ୍ଗଳବାର ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ବେଲାରୁସ୍‌ ସହ ମିଳିତ ଯୁଦ୍ଧାଭ୍ୟାସ ପାଇଁ ମିଲିଟାରୀ ଟ୍ରେନିଂ ସେଣ୍ଟର ତିଆରି ପାଇଁ ସମର୍ଥନ ଜଣାଇଛନ୍ତି। ଏହା ଦ୍ବାରା ମିନ୍ସକ ୟୁକ୍ରେନ ବିବାଦ ମଧ୍ୟରେ ପଶିପାରେ। ଏଥିପାଇଁ ପୁଟିନ୍ ପ୍ରତିରକ୍ଷା ଏବଂ ବିଦେଶ ମନ୍ତ୍ରୀଙ୍କୁ ବେଲାରୁସ ସହ କଥା ହେବା ଏବଂ ଚୁକ୍ତି କରିବା ପାଇଁ କହିଛନ୍ତି। ତେବେ କେଉଁ ସ୍ଥାନରେ ବେସ୍ ସ୍ଥାପନ ହେବ ସେନେଇ ସ୍ପଷ୍ଟ ହୋଇନାହିଁ। ମିନ୍ସକ ମସ୍କୋକୁ ଗତ ବର୍ଷ ୨୪ ଫବୃଆରୀ ଠାରୁ ବେଲାରୁସ ଅଞ୍ଚଳକୁ ଲଞ୍ଚ ପ୍ୟାଡ୍ ଭାବେ ବ୍ୟବହାର କରିବାକୁ ଅନୁମତି ଦେଇଛି। ସେପଟେ ବେଲାରୁସ୍‌ ନେତା ଆଲେକ୍ଜାଣ୍ଡାର ଲୁକାସେନକୋ କହିଛନ୍ତି ସେ ବେଲାରୁସର ସୈନିକଙ୍କୁ ୟୁକ୍ରେନକୁ ପଠାଇବେ ନାହିଁ ଏହା କେବଳ ଋଷିଆ ସହ ସାମରିକ ଅଭ୍ୟାସ।