ଭୁବନେଶ୍ବର ୬|୭: ଆଉ ରାଜରାସ୍ତାରେ ଶୁଣିବାକୁ ମିଳିବନି କର୍କସ ପେଁ ପାଁ ହର୍ଣ୍ଣ । ଏବେ ନିୟମ କଡାକଡି । ଭୁବନେଶ୍ବର ଆରଟିଓଙ୍କ ପକ୍ଷରୁ ବାଣୀବିହାର ଓଭରବ୍ରୀଜ ଉପରେ ଏନେଇ ଘରୋଇ ବସଗୁଡିକର ଯାଞ୍ଚ କରାଯାଇଛି । ଯେଉଁ ବସରେ ନିର୍ଦ୍ଧାରିତ ଶବ୍ଦ ଠାରୁ ଅଧିକ ମାତ୍ରାର ହର୍ଣ୍ନ ଲାଗିଛି ତାହାର କାହାଳି ବା ସ୍ପିକର ଖୋଲିନିଆଯାଇଛି ।
ଏବେ ଆଉ ବସ୍ ର ହର୍ଣ୍ଣରେ ହଟାତ ଚମକି ପଡିବେନି କିମ୍ବା ଡରିଯିବେନି ଅନ୍ୟ ପଥଯାତ୍ରୀ । କାରଣ ଉଭୟ ଘରୋଇ ଏବଂ ସରକାରୀ ବସ୍ର ହର୍ଣ୍ଣ ଉପରେ ଅଙ୍କୁଶ ଏବେ କଡାକଡି । ବସରେ ଲାଗିଥିବା ହର୍ଣ୍ଣ ନିର୍ଦ୍ଧାରିତ ମାତ୍ରା ଠାରୁ ଅଧିକ ଆବାଜ କରିବା ମନା । ଯଦି ଏହି ନିୟମ ଉଲଂଘନ ହୁଏ, ତେବେ ବସ୍ର ରୁଟ ପରମିଟକୁ ବାତିଲ କରିଦିଆଯିବ । ଟ୍ରାନ୍ସପୋର୍ଟ ବିଭାଗ ପକ୍ଷରୁ ଏହା ସ୍ପଷ୍ଟ କରିଦିଆଯାଇଛି । ଏପରିକି , ଏଥିଲାଗି ଶନିବାର ବାଣୀବିହାର ଓଭରବ୍ରୀଜ ଉପରେ କରାଯାଇଥିଲା ଅତର୍କୀତ ଯାଞ୍ଚ । ପ୍ରତି ବସକୁ ଅଟକାଇ ସଗୁଡିକର ହର୍ଣ୍ନ ଚେକିଂ କରିଥିଲେ ପରିବହନ ବିଭାଗ କର୍ମଚାରୀ । ଅଧିକ ଆବାଜ କରୁଥିବା ହର୍ଣ୍ନ ସବୁର କାହାଳୀ ଗୁଡିକୁ ବସ୍ରୁ କାଢି ନେଇଥିଲେ ଆରଟିଓ କର୍ମଚାରୀ ।
ଆରଟିଓର କଡା ଯାଞ୍ଚ ବେଳେ ବସ୍ କର୍ମଚାରୀଙ୍କ ସଫେଇ କିନ୍ତୁ ଅଲଗା । ସେମାନଙ୍କ କହିବା କଥା ହେଲା, ରାସ୍ତାରେ ଲୋକେ ସାମାନଙ୍କ ଯାନ ଅକାଇ କଥା ବାର୍ତ୍ତା ହେବା ଆଳରେ ବାଟ ଛାଡୁ ନାହାନ୍ତି । ଅନ୍ୟ ଯାନ ବି ସାଇଡ୍ ଦେଉନଥିବାରୁ ଉଚ୍ଚ ସ୍ବରର ହର୍ଣ୍ଣ ଲାଗାଇବାକୁ ସେମାନେ ବାଧ୍ୟ ହେଉଥିବା କହିଛନ୍ତି ବସ୍ ଚାଳକ ।