ନ୍ୟୁୟର୍କ ୦୬/୦୬: ଆୟର୍ଲାଣ୍ଡ ବିପକ୍ଷ ମ୍ୟାଚ୍ରେ ଅର୍ଦ୍ଧଶତକ ଅର୍ଜନ କରିବା ସହ ଟିମ ଇଣ୍ଡିଆ ଅଧିନାୟକ ରୋହିତ ଶର୍ମା ଏକାଧିକ ରେକର୍ଡ ସ୍ଥାପନ କରିଛନ୍ତି । ସେ ବିଶ୍ୱର ପ୍ରଥମ ଖେଳାଳି ଭାବେ ଅନ୍ତର୍ଜାତୀୟ କ୍ରିକେଟ୍ରେ ୬୦୦ ଛକା ପୂରଣ କରିଛନ୍ତି । ଏଥିସହ ଅନ୍ତର୍ଜାତୀୟ ଟି-ଟ୍ୱେଣ୍ଟିରେ ୪୦୦୦ ରନ ଓ ତୃତୀୟ ଖେଳାଳି ଭାବେ ଟି-ଟ୍ୱେଣ୍ଟି ବିଶ୍ୱକପ୍ରେ ୧୦୦୦ ରନ ପୂରଣ କରିଛନ୍ତି ।
ରୋହିତ ବହୁ ପୂର୍ବରୁ କ୍ରିସ ଗେଲ୍ଙ୍କ ସର୍ବାଧିକ ଛକା ରେକର୍ଡ ଭାଙ୍ଗି ସାରିଥିଲେ । ଆଜି ନୂଆ ମାଇଲଖୁଣ୍ଟ ଅତିକ୍ରମ କରିଥିଲେ । ସେ ୪୯୯ଟି ମ୍ୟାଚ୍ ଖେଳି ୬୦୦ ଛକା କ୍ଲବ୍ରେ ନାମ ଲେଖାଇଥିଲେ । ଗେଲ୍ ୫୫୧ଟି ଅନ୍ତର୍ଜାତୀୟ ମ୍ୟାଚ୍ ଖେଳି ୫୫୩ଟି ଛ କ । ମାରିଥିବାବେଳେ ସହିଦ ଆଫ୍ରିଦି ୫୦୮ଟି ମ୍ୟାଚ୍ ଖେଳି ୪୭୮ଟି ଛକା ମାରିଛନ୍ତି ।
ରୋହିତ ଦିନିକିଆରେ ୩୨୩ଟି, ଟି-ଟ୍ୱେଣ୍ଟିରେ ୧୯୩ଟି ଓ ଟେଷ୍ଟରେ ୮୪ଟି ଛକା ମାରିସାରିଛନ୍ତି । କେବଳ ସେତିକି ନୁହେଁ, ରୋହିତ ଟି-ଟ୍ୱେଣ୍ଟି କ୍ରିକେଟ୍ରେ ୪୦୦୦ ରନ୍ ପୂରଣ କରିଥିଲେ । ଆଜି ରୋହିତ ୩୭ଟି ବଲ୍ରୁ ୪ଚୌକା ଓ ୩ଛକା ବଳରେ ୫୪ ରନ୍ କରି ରିଟାୟାର୍ଡ ହର୍ଟ ହୋଇଥିଲେ । ନବମ ଓଭରରେ ଜୋସ ଲିଟିଲଙ୍କ ଏକ ବଲ୍ ତାଙ୍କ କାନ୍ଧରେ ବାଜିଥିଲା । ଅବଶ୍ୟ ଏହାପରେ ସେ ୨ଟି ଛକା ମାରିଥିଲେ ।
ଅର୍ଦ୍ଧଶତକ ଅର୍ଜନ କରିବା ପରେ ସେ ପାଭିଲିୟନ ଫେରିଯାଇଥିଲେ । ଆଜିର ମ୍ୟାଚ୍ ପୂର୍ବରୁ ସେ ୧୫୧ଟି ମ୍ୟାଚ୍ ଖେଳି ୫ଟି ଶତକ ବଳରେ ୩୯୭୪ରନ୍ ସଂଗ୍ରହ କରିସାରିଥିଲେ । ଟି-ଟ୍ୱେଣ୍ଟି କ୍ରିକେଟ୍ରେ ଭାରତ ପକ୍ଷରୁ ସର୍ବାଧିକ ରନ୍ ରେକର୍ଡ ରୋହିତ ଶର୍ମାଙ୍କ ନାମରେ ରହିଛି । ସେ ୧୧୭ଟି ଟି-ଟ୍ୱେଣ୍ଟି ଖେଳି ମୋଟ୍ ୪୦୩୭ ରନ୍ ସଂଗ୍ରହ କରିଛନ୍ତି ।
ବୁଧବାର ଅର୍ଦ୍ଧଶତକ ବଳରେ ରୋହିତଙ୍କ ରନ୍ ୪୦୨୬ରେ ପହଞ୍ଚି ଯାଇଛି । ଟି-ଟ୍ୱେଣ୍ଟି ବିଶ୍ୱକପରେ କୋହଲି ସର୍ବାଧିକ ୧୧୪୨ ରନ୍ ସଂଗ୍ରହ କରିଥିବାବେଳେ ଶ୍ରୀଲଙ୍କାର ମାହେଲା ଜୟବର୍ଦ୍ଧନେ ୧୦୧୬ରନ୍ ଓ ରୋହିତ ୧୦୧୫ ରନ ସଂଗ୍ରହ କରିଛନ୍ତି ।